AMOS 9 - DAÜLANGPÜ LAIHING (BSI)

Shembüpa lei Shahphenpü

¹ Ngei moidü touei Shembüpa yaongshi ee, hatü büpai eteke: Chongnyiam shing jenhen mü phopshem shemnyü ajung kü hateishuoh, hatü hathü benei nanglakthülei shangjing kü shükeishuoh, hatü ha kübü yangpüthü ngei ngelei yani mahtükhen. Jom hükao nyaiyei nedaiaokhen, jom hükao neyanghen.

² Jomi Sheol thahshi kahdok shoei shüdailangmao, haleipao ngelei laki jom ngaihen; jom vangsho thahshi aongdajao, haleipao ngei jom shüei vühen.

³ Karmel shangchingei jom aongei jodaijao, haleipao ngei jom yemei yepei leihen, hatü jomi ngei toueipü yungching shaongdohlei shüei jodailangmao, haleipao ngei yungching biünyü kü ngeükhüam shuohhen, hatü hapai jom kü kaokhen.

⁴ Vepathüi jom wüpküpei yah-ei daijao, haleipao ngei jom jühen ngeükhüam shuohhen. Ngei mei shingvaishi nevai, shejao ten shingvaishi ngei jom kü mük neshai-i veihen.

⁵ Shembüpa Kahvangi kahdok kü hongjü hapa nyaüdainyeih; Halei nyupüthüi mahng thepnyüpeih, hatü Ijip leipü Nile yungyen keiha kahdok kemei longei aongtü shemmei shünyüpeih.

⁶ Shembüpai büpa nyushing vangshothü kü lingnyeih, hatü chongnyiam shing kahdoknyü kü lingnyeih. Büpai yungching yung kü nyüknyeih, hatü kahdok shak kü langnyüpeih, Shembüpayü büpalei men nyüke.

⁷ Ngei kü amphongü Ethiopia am nelepü je? Oh Israel nanglakthü shei Shembüpai enyüke. Ngei Israel am Ijip leipü; Philistia am Kaphtor leipü; hatü Aram am Kir leipü müei neleiangpü je?

⁸ Hingmei, Shembüpalei müki nemeipü Israel ongching kü veishi nyüke, hatü jom kahdok shak kübü mahtükhen, shejao Jakob am phang chemjalak kü nemahtükhen, shei Shembüpai enyüke.

⁹ Mehenangkü ngei ngeükhüam shuohhen, hatü ngei Israel am jatthü touei aungsheen kü sheenpükei sheenhen, shejao aungbhang hükao chongei nevühen.

¹⁰ Ngelei nanglak khong kübü mang shennyakthü peü kemei, hatü üami, “Mehe tenao jen kü nedhaümküpih nevaijünepongpih” shei epüthü peü vepalei lak kü mahkemhen.

Israel am Jatongei Leihen

¹¹ “Hapa nyih kü, ngei dodaipü David ongching lingei leihen. Ngei hapa leipü bentükpü shinghipheithü lingei leihen, hatü shelei nyupükei ja lingei leihen.

¹² Shejüang Edom ami mehe aoei tuh, ha Edom ami yahlanghen, hatü ngelei men kü nyükpü jatthü peü kemei Shembüpai ha douthü dükkahen shei enyüke.

¹³ Han hokpü shennyaki hah vetpülei she yeihen, hatü nyalingngupai ngümpü shennyaki sheipülei phei thahhen, hatü kahshangthü leipü vüngnyangpü yiü shühkahen, hatü shangtaothü kü ha yenkahen, hapa hepak hingmei ngoikünyüke shei Shembüpai enyüke.

¹⁴ Ngei wüpküpei lüdaipü ngelei Israel nanglakthü müei leihen. Jomi bentükpü chingnyüthü ja lingei leihen, hatü halei chingchingei nyuhen. Jomi nyalingngupai sheihen, hatü haleipü yiü yinghen. Jomi pe showhen hatü haleipü betjük hahhen.

¹⁵ Ngei jomei kahdok kü jom sheiphonghen, hatü ngei jom kü shuohpü kahdok kübü ne-yei nebhitükhen” shei Shembüpa, ammei Kahvangi enyüke.