AMOS 8 - DAÜLANGPÜ LAIHING (BSI)

Betjükshüm Mühdow Hük

¹ Shembüpa Kahvangi ngei kü betjükshüm mühdow hük huteke.

² Shembüpai ngei kü, “Amos, nüngi mehe eenyüke?” shei phe, hatü ngei, “Betjükshüm mühdow hük eenyüke” shei e. Hahepak kü Shembüpai ngei kü, “Ngelei nanglak Israel am shingvaishi dohpü ngoikünyüke; Hajük kü ngei jom neyangpih.

³ Hapa nyih phopshemei lokpü haipeyü mahng theppü leihen. Shing peüei mahmahng longi nyuhen. Jomü lavüngtoipü shing kü yakphonghen.”

⁴ Hapa bangtuh, am nehahneyingpü hatü kahmük kübü taopathü kü la-i shouppüthü:

⁵ “Hami hah yuhen shingvaishi mechem Lenja Mo peihdaiphahenang? hatü hami wheat hah yuhen mechem Sabbath dohdaiphahenang? Dokyaong gühhen, bhei aonghen, hatü dok gühpai bhei shakpü am kü lueilemhen.

⁶ Lop hük kü taopathü, hatü nehahneyingpüthü lathuh jora hük kü shakhen, hatü wheat hahbhang kü bhei wongshi yuhen.

⁷ Shembüpai Jakob changmeipü kü vangeishuwteke: ‘Jomei douten ngei meheyao nebepih.’

⁸ Hapa nangkü kahdok nekheühen je? hatü halei nyupüthü peü mahng nethephen je? Kahdoknyü kemei Ijip leipü Nile yungyen keiha aongtü shü, aongtü shüei nyuhen.”

⁹ Hapa nyih kü, Shembüpa Kahvangi enyüke: “Ngei vanghenyü haümhah hepak kü shüshihtükhen, hatü nyihnüng heshoya vangnyak leitükhen.

¹⁰ Ngei ammei mohitap mahng theppü leitükhen, hatü ammei kesho nyahhai peü mahng kesho leitükhen. Ngei am peü dhoila ashak ümhühen, hatü ammei sho chaei kuptükhen. Ngei hapa hepak kü halom dipü kü nyühipai youngpükei leihühen. Hapa nyih dohpeyü shahyakpü nyih hük leihühen.”

¹¹ “Ha hepak hingmei peikünyüke” shei Shembüpa Kahvangi enyüke. “Ngei kahmük kü shaühile hük shomhen, hapa shaühileyü nük-aei yunglepü shaühile nevai, shejao Kahvangei shah nedani taopü shaühile hük nyukahen.

¹² Shennyakthüi yungching kübü yungching dohpü ngoishi; hatü heong kübü heshü ngoishi Kahvang shah yemei longteihen, shejao jomi ha nedangpih.

¹³ Hapa nyih kü themei lameithüi yung lepai shomei yinghen.

¹⁴ Üami Samaria amei lajei kü, hatü Dan amei kahvang kü, nevaijü Beer-sheba amei kahvang men kü shei vangeishuwnya, jom dohen, hatü haleipü hajük kü nepao-aokhen.”