AMOS 7 - DAÜLANGPÜ LAIHING (BSI)

Manghkhang kü Shoukhanbaong Eepü

¹ Shembüpa Kahvangi ngei kü hapa huphüteke: Ongpalei phaihan vetlangpheikü shao nyipabü phenha neenpü hepak kü büpai shoukhanbaong longi temei ngei manghkhang kü eeteke.

² Mechem jomi kahdok kübü phenha cha-ei hahtüki eepa, ngei eteke, “Jeiyong Shembüpa, mang tükshih! Mekei etü Jakob yemmü nyuaokhen? Jomü ahshi-üng maanpü am nyüke!”

³ Hahepak kü Shembüpa mong leiteke; “Hapa am kü nevamküpih” shei Shembüpai ephüteke.

Manghkhang kü Aw Eepü

⁴ Jeiyong Shembüpai ngei kü shao hapa huphüteke: Shembüpa Kahvangi aw homei hanghihühen tempü eeteke; hapa aw yungching longpü kü bah, hatü kahdokao hahtük.

⁵ Hahepak kü ngei eteke, “Oh Shembüpa Kahvang, ngei khümei enyüpeih, dohtuh! Jakob mekei etü yemmü nyuaokhen? Büpa ahshi-üng maanpü nyüke!”

⁶ Hahepak kü Shembüpa mong leiteke; “Hapa am kü nevamküpih” shei Shembüpa Kahvangi ephüteke.

Vü Hük Manghkhang kü Eepü

⁷ Büpai ngei kü shao hapa huphüteke: Vü shetei lingpü bham touei Shembüpai büpalei lakei vü hük notü yaongshi ee.

⁸ Büpai ngei kü, “Amos, nüngi mehe eenyüke?” shei pheteke. “Vü hük eenyüke” shei ngei jangei e. Hahepak kü Shembüpai eteke, “Veituh, ngei ngelei nanglak Israel am chi kü vü hük kangnyüpeih; ngei hajük kü jom kü mang netükpih.

⁹ Isakei hühihathü khümshing mangtükhen, hatü Israel amei daülangpü shingthü bentükhen; Ngei yanlu yah-ei Jeroboam ongpalei ongching khüei yaonghen.”

Amos hatü Amaziah

¹⁰ Hahepak kü Bethel leipü ngongpa Amaziah-i Israel amei ongpa Jeroboam touei shahjang shom: “Amos-i nüng khüei Israel kahdok kü küpjan nemeipü lingnyüke. Büpalei shah-i kahmük tentükhen khih.”

¹¹ Amos-i hapakei enyüke: “Jeroboamü vepalei lak kü mahhen, hatü Israel amü nyübüh kahdok tuhtü wüpküpei daihen.”

¹² Hahepak kü Amaziah-i Amos kü e, “Oh thibüpa, leidaituh! Judah kahdokei leidaituh! Halei leiyei nüngei shünyü lathahtuh, hatü halei teteivanei ejatuh.

¹³ Hajük kü Bethelei teteivanei meheyao te-ekei; mehenangkü hatou shingü ongpalei daülangpü shing, hatü hapa ongchingei khümshem nyüke.”

¹⁴ Amos-i Amaziah kü jangei e, “Ngeiyü thibü hükao nevai, nevaijü thibülei hapeüao nevai, shejao ngeiyü mi yombü hük, hatü bhukjük pü kah lingpü shennyak hük nyuhampeih.

¹⁵ Shejao Shembüpai ngei kü mi yompü dousho kübü nyükei ngei kü, ‘Daituh, hatü ngelei nanglak, Israel am kü teteivanei eyeishuoh’ shei ephopeih” shei e.

¹⁶ Hanangkü shaang Shembüpai mehe enya, ha bangtuh. “Nüngi Israel am khüei thihivam shah te-e; Isak am phang khüei chongteven” shei enyüke.

¹⁷ Hanangkü Shembüpai hapakei enyüke: “Anyühayü chingyangshongei büm yupü am leihen, hatü nüngei hapeüthü vehokei mahhen. Nüngei kahdokü hantü mih kü shuohtükhen, hatü nüngü kung kahdokei dihen. Hingmei Israel am laophülei kahdok tuhtü wüpküpei daihen.”