AMOS 6 - DAÜLANGPÜ LAIHING (BSI)

Jerusalem Mangtükhen Nang Epü

¹ Zionlei mong hüshemei nyupüthü, hatü Samaria kahshang kü mong nyaangpüthü, jatthü khongkü shongpü hamhiman vamshing, üam touei Israel nanglakthüi sheühpü yemei peinya, Onyükei!

² Kalnehlei daituh hatü jom kü veituh; Haleipü Hamath chingnyü longpülei heihhümao. Philistia kahdok Gathlei yiühümao. Amü ha ongchingthü mü meinyeih shei deihnyu je? Nevaijü ammei kahmükü jom mü longpeih shei deihnyu je?

³ Ammi nemeipü nyihthü tailuei yaktüknyüke, shejao ammei doui nemeipü nyihthü yah-ei peihahnyüke.

⁴ Ammi meinyübha-i lingpü lüng kü lemnyüke, hatü uoshing yaongshing meipü kü uonyüke; ammi mi khong kübü mi cheha, hatü khaok leipü mohoh nitshüpü hahnyüke.

⁵ Ammi Davidi kei keshothü linghünyüke, hatü liping kongkoih shanghünyüke.

⁶ Ammi yiüshong maei yiü yinghünyüke, hatü peü mü meipü mainga nyiohünyüke, shejao ammi Joseph bhihdai maandaipü kü mong kü netüngnyu.

⁷ Hanangkü wüpküpei daihen kü jom shongpü vaihen; ammei mohitap, mongongmongle peü dohdaihen.

Shembüpa i Israel am Changmeipü Jiühitnyeih

⁸ Jeiyong Shembüpai büpa nyingi vangeishuwteke Jeiyong Shembüpai enyüke: “Ngei Jakob changmeipü nelümnyih, hatü jomei penyüsha kü jiühitnyeih. Ngei hapa chingnyü hatü halei nyupü lemphü vepa kü shuohtükhen.”

⁹ Shem hük kü shennyak an nyujema jom peü didaihen,

¹⁰ hatü dipü shennyakei shem ami mahng vühen shingvaishi shem leipü mahng ngaihen shüei tukshoukei nyupü hanei am kü phehen, “Nüng mü lebü hanei nyüla?” Ngeü hüki janghen, “Üpayao neshiü.” Hahepak kü shem ami, “Nenmü nyutuh! Jeni Shembüpalei men houmei ne-eteihen vongbong” shei ehen.

¹¹ Mehenangkü Shembüpai shahkung shuohteke, hatü shem longpü khih mü bentükhen, hatü shemhathü ashüi ngümtükhen.

¹² Koyeithü yaongvak kü moknyu je? Shennyak hüki mohoh müshi yungching shangkü han hoknyu hiang? Shejao ammi shahhingü leü nemeipü leitük, hatü daülangshemshepü shahyakpü betjük leitükteke.

¹³ Ammi Lo-Debar am neüaokpü nangkü ngam yahnyüke hatü enyüke, Hami Karnaim amao hamei wongi neühah shepeih shei changmeiyei enyüke.

¹⁴ Mehenangkü Shembüpa Kahvangi enyüke, “Oh Israel nanglakthü, ngei am khüei jat hük vamhühen. Jomi am kü Lebo-Hamath kübü Arabah kahji thahshi shüveihen.”