AMOS 4 - DAÜLANGPÜ LAIHING (BSI)

Mong Neleppü Israel am

¹ Samaria kahshangei nyupü nyühathüi hapa bangtuh: Taopa hatü nehahneyingpüthü kü shüveipüthü, hatü laophülei baha kü, “Yiü yinghen deikei” shei epüthü.

² Shembüpa Kahvangi büpa daülangpai vangei eteke: Jomi am nyiamphaak kü manei, hükao ne-ao-i nyahyep nyiamphaak kü manlanghen, hapa nyih hingmei am touei ngoikünyüke.

³ Am peü pewo homei shüktükhen, hatü am peü Harmon philei shüktükhen.

⁴ Bethelei daituh hatü mang thahtuh, Gilgalei heihtuh hatü nyeinya mang düktuh. Ammei jakpü moila nepjeih deikei, ammei ankhong moila nyih jem nyih jem kü deikei.

⁵ Menvih moila daw shihpü aan deikei, hatü ammi haüpüwongpü moila shuohpü kü mongmeituh; mehenangkü ammi henüng dou dükhen kennyüke, Oh Israel nanglakthü, shei Shembüpai enyüke.

⁶ Ngei ammei chingnyü peü kü vomkong nyuhen shuohteke, hatü jila peü kü hahyingi taohü, shejao ngei touei am mong nelep shei Shembüpai enyüke.

⁷ Hah vethen len jem nyushi ngei vang nekeihüi shonglang, ngei chingnyü hük kü vang keihü, shejao hükpa kü nekeihü; kah hük kü vang keihü, shejao hük kü nekeihüi vantükteke.

⁸ Hanangkü jila nyi jem kübü jila hükei yung yemei longtei, shejao yungle meishi yinghen nedang, hapaiyao am ngei touei mong nelep shei Shembüpai enyüke.

⁹ Ngei ammei pe hatü nyalingngupai kahthü chami jütükteke; shoukhanbaongi ammei adhapü, hatü olive püthü hahtükteke, shejao am ngei touei mong nelep shei Shembüpai enyüke.

¹⁰ Ngei Ijip am kü shompükei am kü cham shom, ngei ammei nethethü vehok kü jütük, hatü koyeithü yah-ei lüdai; Ammei shemei mahngshie ngü püpai ammei shongsha mahü, shejao am ngei touei mong nelep shei Shembüpai enyüke.

¹¹ Ngei Sodom hatü Gomorrah mahtükpükei, ngei am hanei mahtük. Amü awbhaong leipü leppü awjung kei nyuteke, shejao am ngei touei mong nelep shei Shembüpai enyüke.

¹² Hanangkü, Oh Israel am, ngei am hanghihühen, hatü ngei am kü hapakei dükhen vaipü nangkü ammei Kahvang mü pongteihen temtuh, Oh Israel!

¹³ Veituh, üpai kahshangthü shüknya, hatü vanglük lingnya, shennyak kü büpalei mongdeih ngaiyei enya, dhomi vangnyak leitüknya, hatü kahdok shaopüthü kü kamnya, hapayü Jeiyong Shembüpa Kahvang, büpalei men nyüke.