AMOS 3 - DAÜLANGPÜ LAIHING (BSI)

Israel amei Mang hatü Hanghi

¹ Oh Israel nanglakthü, Shembüpai Ijip leipü müei leipü jat kemei, büpai am khüei epü shah bangtuh.

² Kahdoknyü jatthü peü khongkü ngei am mon nyingpeih; Hanangkü ammei mang lemphü nangkü ngei am hanghihühen.

³ Chemi daihen nemongteipü kü shennyak nyi chemi dainyu hiang?

⁴ Hahying neshiüjü yingnyülei mailang vaünyu hiang? Büpai meheyao neyepjü jepei ngüngnyu hiang?

⁵ Taikam neshiüshiüi ou-i tai kü mannyu hiang? Meheyao nemanmani taikam shaatei aongdainyu hiang?

⁶ Mechem vebaong shemm kaonghenshang, nanglakthü nenyemnyu hiang? Shembüpai neshompheikü chingnyü hük kü vongshüh peinyu hiang?

⁷ Hingmei, Shembüpai büpalei küpjan büpa chongphopü thibüthü kü ne-epheikü meheyao nedüknyih.

⁸ Mailang vaüjü üpai nenyemhenang? Shembüpa Kahvangi mechem ehen, üpai netetnevani nyuaokhenang?

Samaria Mahhen Nang

⁹ Ashdod leipü hatü Ijip leipü penyüshathü kü baongeishuoh: “Am nyingi Samaria kahshangthülei thaituh, hatü hapa mongkü bukpüshaanpü longpü hatü halei shüveidoidei nyupü kü veituh.”

¹⁰ Ha nanglakthülei shemü gühdou, hatü deyeilaoei aetpüshepü doui maei nyüke. Jomi mehe jiü, ha dükhen nenyingnyu shei Shembüpai enyüke.

¹¹ Hanangkü Jeiyong Shembüpai hapakei enyüke: Vepa hüki kahdok ngümtükhen, hatü ammei veyom shing bentükhen, hatü shemdou peü aetlanghen.

¹² Mi yombü hüki shahnyüi hahtükpü mi hükei la nyi nevaijü dhaong hük dangpü keiha, Israel am Samarialei nyupüthü üami uoshing phangei peekshi, hatü lüng phangei lemshi johen, jom mon yanghen.

¹³ Hapa bangtuh, hatü Jakob phang khüei denpü shuohtuh shei Jeiyong Shembüpai enyüke.

¹⁴ Ngei Israel am jomei mang nangkü hanghihüpü nyih ngei Bethel leipü moidü peü mangtükhen, hatü moidü leipü shongnyü douthü mangtükhen, hatü kahdokei dodaihen.

¹⁵ Ngei jom ünyü hepak kü nyuteipü shemthü, hatü shaonyü hepak kü nyuteipü shemthü bentükhen, hatü meinyübha-i vepü shemthü, hatü longpü shemthü peü benei mangtükhen shei Shembüpai enyüke.