AMOS 1 - DAÜLANGPÜ LAIHING (BSI)

¹ Hapayü Judah kü Uzziah ongpa hatü Israel kü Joashlei cheha, Jeroboam ong vaipü hepak kü pedi vükhen bong nyi shekü Israel am nangkü Tekoa am miyombü Amos-i eepü manghkhang nyüke.

Israel amei Chingyow Jatthü kü Shahphenpü

² Amos-i e: Shembüpai Zion Kahshang leipü ngüngnyüke, hatü Jerusalem kübü büpalei ngeü annyüke; mi yombüthülei het ühshing phenha kaudaiteke, Karmel kahshang leipü thüng vandaiteke.

³ Shembüpai hapakei enyüke: Damaska amei mang jem nangkü, hatü ali shingvaishi ngei hanghi neyahlangpih; mehenangkü pinnyüi Gilead am kü nyiamvüi bheiteke.

⁴ Hanangkü ngei Hazael ongpalei shem kü aw shomhen, hatü hapai Ben-Hadadei penyüsha hahtükhen.

⁵ Ngei Damaska penyüsha bentükhen, Aven kahji kü nyupüthü, hatü Beth-Eden kübü vanglem lempüthü changtükhen; hatü Aram shennyakthü Kirlei wüpküpei deishihhen shei Shembüpai enyüke.

⁶ Shembüpai hapakei enyüke: Gaza amei mang jem nangkü, hatü ali shingvaishi ngei hanghi neyahlangpih; mehenangkü jomi jat kemei wüpküpei yah-ei daiyei Edom am kü shuohtükteke.

⁷ Hanangkü ngei Gaza amei penyü kü aw shomhen, hatü hapai penyüsha hahtükhen.

⁸ Ngei Ashdod kü nyupüthü, hatü Ashkelon kübü vanglem lembüthü changtükhen; Ngei Ekron am khüei lak nohen, hatü Philistia am aopüthü peü mahtükhen shei Shembüpai enyüke.

⁹ Shembüpai hapakei enyüke: Tyre amei mang jem nangkü, hatü ali shingvaishi ngei hanghi neyahlangpih. Mehenangkü jeihinaü mü vangteipü deih-ei nedangi jomi jat kemei wüpküpei deiyei Edom am kü yutükpeih.

¹⁰ Hanangkü ngei Tyre amei penyü kü aw shomhen, hatü hapai penyüsha hahtükhen.

¹¹ Shembüpai hapakei enyüke: Edom amei mang jem nangkü, hatü ali shingvaishi ngei hanghi neyahlangpih; mehenangkü büpai yanlu noshi chenaü changtük, hatü phahji neshiüi dükteke; büpalei mongshih neyeplangi düngei aw kei bah-ei angteke.

¹² Hanangkü ngei Teman am kü aw shomhen, hatü hapai Bozrah amei penyüsha hahtükhen.

¹³ Shembüpai hapakei enyüke: Ammon amei mang jem nangkü, hatü ali shingvaishi ngei hanghi neyahlangpih; mehenangkü jomei kahmük viong dahen nangkü Gilead amei büm nekongpü nyühathülei vom shaaktükteke.

¹⁴ Hanangkü ngei Rabbah khüei aw bahhühen, hatü hapai penyüsha hahtükhen. Hapa thepju nyih kü vaüpü eepü nyuhen, hatü yinglükleisho kei hokpü heipü nyuhen.

¹⁵ Hahepak kü jomei ong hatü büpalei lakchongbüthü chemi wüpküpei daihen shei Shembüpai enyüke.