2 TIMOTI 4 - DAÜLANGPÜ LAIHING (BSI)

¹ Kahvang hatü Khrista Jisu ompü touei, üpai yemmü nyupü hatü didaipüthü shahphenhen, hatü büpa yiükahen hatü büpalei ongching danei ngei nüng kü ha nangei tuhnyeih:

² Shahjangmei chongventuh; dühü kü hatü dühü nevaipü hepak kü temei nyutuh, inyainyempü longpai, hatü kenhingei nyuhpai nejiüpü kü yeantuh, loh-eishuoh, hatü nangthongtuh.

³ Mehenangkü shennyakthüi nyuhpü venpü meipü kü nebanghen hepak hük peikahen, shejao jomi lümpü kü jiüshi ejahen, hatü jomei dhaongi banghahhüpü aimü ejahen nangkü jom shinei nyuhbüthü longi thaihahhen,

⁴ hatü shahhing shah banghen kübü lepei lüdaihen hatü yimpilathü kü mong shuohdaihen.

⁵ Shejao nüng payü düngei ungei-aeiyei nyutuh, tok vaipü munentuh, chongvenbülei dousho düktuh, nüngei chongphopü dousho den ngoiyei düktuh.

⁶ Ngei shingvaishiyü jakpü moila yiü langpükei leidaiteke, hatü ngelei yangnyu lüdaihen hepak ngoiteke.

⁷ Ngei vehok meipü hoktepih, ngei mokpü lemsho laitepih, ngei hinglemei nyutepih.

⁸ Shaang mü leitü ngei shingvaishi daülangshemshepü ong athen hük shahhing shahphenpü Shembüpai hapa nyih ngei kü shuohhen temei nyüke, hatü hayü ngei kü mon nevai, shejao büpa yiükahen ongyangei danpüthü peü kü shuohhen.

⁹ Ngei touei lomi peikahen khetuh;

¹⁰ mehenangkü Demas-i kahdoknyü bampü nangkü ngei tuhphongtü Thesalonikalei heihdaiteke. Krescens-ü Galatialei, hatü Titus-ü Dalmatialei heihdaiteke,

¹¹ Luk mon ngei mü nyüpeih. Nüng mü Markao müei heihkei; mehenangkü büpai ngelei chongphopü dousho kü ngei kü longi sheühnyeih.

¹² Ngei Tekhikus Ephesialei shomtüktih.

¹³ Mechem nüng peikahenshang ngei Troaslei Karpus mü tuhpü ngelei ashakviha, hatü ngelei laidü, anyei vaishi phaishuw kü nyangpü laidü koei heihkei.

¹⁴ Nyiam shükbü Alexanderi ngei kü longi nemei-i dükphopeih. Büpai mehe dük, hapa kü Shembüpai shemshuohhen.

¹⁵ Nüngao büpa touei lishi nyutuh; mehenangkü büpai jenei shahjangmei kü wongmü khüei yaongnyüke.

¹⁶ Shelei ngei, ngei yanghen nang eshingkü üpaiyao ngei kü sheüh-ei nepeikei, peüi ngei tuhphongpeih. Hapa kü jom khüei Kahvangi meheyao nyemtedükshuohma.

¹⁷ Shejao ngei homei shahjangmei changshi baonghen, hatü Kung ami ha danhen shingvaishi Shembüpa ngei mü nyu, hatü ngei kü wong shuohpeih, hatü ngei mailangei jusha kübü yangpeih.

¹⁸ Mangi shüveidoideipü peü kübü Shembüpai ngei yangphahen, hatü ngei yangei büpalei vangsho ongchingei ngei mülanghen. Büpa kü müknyinshekhang den den kü nyute. Amen.

Dohpü Selam

¹⁹ Priscilla hatü Aquila, hatü Onesiphorus am shem kü selam ete.

²⁰ Erastus Korintlei nyupü khih; ngei Trophimus Miletuslei tüngei tuhpeih.

²¹ Ünyü shekü ngei touei peikahen kentuh. Eubulus-i nüng kü selamja, hatü Pudens, Linus, Klaudia hatü jeihinaü nyahinaüthü peüi selamja.

²² Shembüpa nüngei laangha mü nyute. Phahji amphong mü nyute.