2 TIMOTI 2 - DAÜLANGPÜ LAIHING (BSI)

Jisu Khristalei Veshan Meipü

¹ Nüng, ngelei hapeü, Jisu Khrista kü nyupü phahji kü wong kohtuh;

² hatü denpü longi homei nüngi mepa ngei leipü danpa, ha mih kao nyuh-aokhen monglemaokpü shennyakthü kü koeishuoh.

³ Khrista Jisulei veshan hük keiha shanghah peü kü hanteituh.

⁴ Veshan dousho kü chongphopü hüki büpa dok kübü veshan lakchongbü mong hahhühen nangkü büpai nanglakei shahhidou kü ne-omteinyih.

⁵ Hapa leshi ngapüjapü shennyaki shahkung kü jiüshi ngaei netempheikü aokpü athen nedangnyih.

⁶ Kah lingbü üpai dou kheyei dük, büpai shongpü betjük phaihan danghen vongbong.

⁷ Ngei mehe enya, ha meishi deih-ei dangtuh; mehenangkü nüng kü Shembüpai dou lemphü kü danaokpü yahphahen.

⁸ Davidei li kübü Jisu Khrista dipü kübü yangei leipü deih-ei dangtuh; hapayü ngelei shahjangmei;

⁹ ha tata kü shahkung shaipü hük keiha nyiamvüi shahahpü thahshi ngei hanghi pongpeih. Shejao Kahvangei shah shaei netuh.

¹⁰ Hanangkü nedohnetenpü müknyinshekhang mü Khrista Jisu kü jomphongao yemleipü danghen shingvaishi jepüthülei men kü ngei lemphü munennyeih.

¹¹ Hapa shah-ü hingshangpü: “Jeni büpa mü dipü vaijema, jenphongao büpa mü yemmü nyuhen;

¹² jeni munenjema, jenao büpa mü vanglem lemhen; jeni büpa nelahjema, büpaiyao jen nelahhen;

¹³ jeni hinglempü nenyujema, büpa shahhing kü nyuhen; mehenangkü büpai laophü-üng laophü yaktüknüng neaok.”

Kahvangi Yah-aokpü Dou Dükbü

¹⁴ Jomphongi ha deihhen nangkü etuh, hatü jomi shah nangkü nelangmaanteihen Kahvang touei jom kü shahvüng shuohtuh; mehenangkü hapai meheyao mei nedüknyih, shejao hapa bangpüthü lomohnyeih.

¹⁵ Kahvangi yah-aokpü shennyak keiha büpa kü nüngi shuoh-aokhen shingvaishi nüng kü nyupü meipübai düktuh; Kahvangei shahhing shah jiüshi nyuhpüvenpü shennyaki veühen napü neshiü.

¹⁶ Nedaünelangpü shah jaüteipü kübü yantuh; mehenangkü hapai shennyakthü nyeinya nyeinya nedaüpü lemei mülanghen,

¹⁷ hatü jomei shah-ü maten kei daei daikahen. Hathü khongkü Hymenaeus hatü Philetus nyi nyüke;

¹⁸ jijiyü shahhing yakphongtü vaipüthü hanei mongshanghüei yangei leipeyü dhaümei landaitih shei enyüke.

¹⁹ Shejao Kahvangei chongnyiam shing lakshing wongshongi hapa nyangtü yaongshi nyüpeih: “Shembüpai büpa lompüthü nyingei nyüpeih” hatü, “Üami Shembüpalei men kü nyük, nemeipü leipü lepei leituh.”

²⁰ Shem longpü hükei dükhi-üm hon hatü ngini lingpü mon nevai, shejao pü hatü ashemi lingpao nyunyeih; haneiyü hayaoha hepak kü noteihen; haneiyü heüheü kü noteihen nyunyeih.

²¹ Ngei epü douthü kübü laophü nyingi daüei nyupüthü peü shem shembü am kü doumei lemphü shingvaishi noteihen daütüktü temei tuhpü dükhi-ümthü leihen.

²² Thehila hepak iyjeiphailei kübü nyaidaituh, hatü daülangshemshepü, hinglempü, bampü hatü chingmeivangmei changei daülangpü mongdang kübü vamei Shembüpa kü nyükpüthü mü daituh.

²³ Yoishah hatü sholi neshiüpü shah teshüktei; hathüi dehilao vamhünyeih shei nüngi nyingei nyüke.

²⁴ Shembüpalei chongphobü hükü nedenelaohen vongbong, shejao peü kü shinshanghen, nyuh-aokpü, nenteiaokpü,

²⁵ laophü kü khüpüthü kü inyainyemi yeanpü shuohaokpü vaihen vongbong. Üpai nying, jom mong lepei shahhing nyingei leihen Kahvangi shuohhen aok,

²⁶ hatü kahshih-i mongpükei dükhen shingvaishi büpai jom yepei küppü tai kübü jom yangdaihen aok.