2 TIMOTI 1 - DAÜLANGPÜ LAIHING (BSI)

Selam Shah

¹ Paul, Khrista Jisu kü nyupü yangnyuyem lahpü keiha Kahvangi mongpü homei Khrista Jisulei phongshani,

² Ngei bampü ha Timoti touei Phahji, yahyang hatü Pa Kahvang hatü Khrista Jisu, jenei SHEMBÜPAleipü chingmei nyute.

Menvih Shuohpü hatü Nangthongpü

³ Mechem ngei nyakhingai thüngei phoppü kü ngei nüng deihei danghenshang, bühipai khümpükei ngelei chudeih mongdang daülangpai khümpü Kahvang kü ngei menvih shuohnyeih.

⁴ Nüngei mükphi deihshingkü ngei mongongi mahen shingvaishi ngei nüng mü ponghünyüke.

⁵ Ambi Lois kü shongei nyupü hatü anyü Eunice kü nyupü hinglempü ha nüng kü shaangao nya-aipih shei deihnyeih, hatü nüng kü nyupü hinglempü lekpü ha ngei deih-ei dangnyüke.

⁶ Ngelei lak nüng kü shüngshingkü Kahvangi nüng kü shuohpü thintho ha bahhühen nangkü ngei nüng kü ha deih-ei lehühen enyeih.

⁷ Mehenangkü Kahvangi jen kü nyemhen veühen laangha nevai, shejao ngan, bampü hatü ungeiaeipü laangha shuohpeih.

⁸ Jenei Shembüpa jung denpü nangkü nevaijü büpa nangkü khoklatei nyupü ngei nangkü nüng teveü, shejao Kahvangei ngan kü mongnyangtü shahjang meipü nangkü shangponghen ngei mü shepkei.

⁹ Jenei dou aimü nevai shejao büpalei mükhong hatü phahji aimü büpai jen yangpeih, hatü daülangpü nyükpü homei jen kü nyükpeih. Hapa phahjiyü denshemthü chongpang shekü Khrista Jisu kü büpai jen kü shuohpeih,

¹⁰ shejao shaang hapayü jen Yemleipü Khrista Jisu yiüpü homei dipü mahtük, hatü shahjang meipü homei yangnyu hatü nemahnemenpü touei vangngai koei peipai shakei vamteke.

¹¹ Hapa shahjang meipü nangkü ngeiyü shah baongbü, phongshan hatü nyuhbü vaihen jeteke,

¹² hatü ha tata kü ngei shangpongnyeih. Hei shejao ngei neveünyih; mehenangkü ngei üpa kü hinglem, ha ngei nying, hatü hapa nyih shingvaishi ngei mehe büpa kü nangei tuhphong, büpai ha yomaokhen shei ngei monglempü nyüpeih.

¹³ Khrista Jisu kü nyupü hinglempü hatü bampü mü nüngi mepa ngei leipü nyuhpüvenpü meipü dantepa, ha kü wongshongi shoungtuh.

¹⁴ Jen kü nyupü Laangha Daülangpai sheühpai nüng kü nangei tuhpü doumei yomtuh.

¹⁵ Asia kü nyupü peü, Phegelus hatü Hermogenes-ao omshi ngei tuhphongteke shei nüngi nyingei nyüke.

¹⁶ Shembüpai Onesiphorus am shemong kü phahji nyemshuohma; mehenangkü büpai düngei ngei mongdhüng vamhünyeih, hatü ngei khoklatei nyupü kü veüei neshiü;

¹⁷ mechem büpa Romei peipa, büpai mong shuoh-ei ngei yemei dangteke.

¹⁸ Hapa nyih kü büpai SHEMBÜPAleipü phahji danghen mü Shembüpai büpa kü nyemyahshuohma! Ephesialei büpai meshük dou dükpa nüngi meishi nyingei nyüke.