2 SHÜPPÜKENGPÜ 3 - DAÜLANGPÜ LAIHING (BSI)

Solomoni Phopshem Vepü

¹ Solomoni Jerusalemei Moriah Kahshangei Shembüpalei shem vehen chongpang. Hatouei chepa David kü Shembüpa vamei hushuohteke. Hapayü Jebus am Araunahlei hah tenshing Davidi jepü shing nyuteke.

² Büpai vanglem lempü bong ali mü len nyi mü nyih nyipabü kü hapa shem vehen chongpang.

³ Hathüyü Kahvangei shem vehen nangkü Solomoni shetpü nyuteke: Yang kü meter hapünyet, hatü ba kü meter shü nyuteke.

⁴ Phopshem chingshephi kü shemshom kü meter shü shem ba aimü nyu; hatü shaopü kü meter pinyipüanpüali nyu. Büpai shemong kemei honi mon shaokei ling.

⁵ Shongnyü dungü cedar pü yah-ei aptü honi jüm, hatü ha kü palm pü hatü nyiamkhai ow lingei bakteke.

⁶ Ongpai phopshem kü douvang yaongi hatü Parvaim leipü leipü honi ow shih-ei ling.

⁷ Hanangkü büpai phopshem bham, taangbhag, shakung, shaden hatü shaküp kemei honi jümei ling. Büpai bham shangkü cherubimei lajei bak.

⁸ Büpai Longi Daülangpü Shing hapa phopshem ba shük lushi ling, hatü hapa yang kü meter shü, ba kü meter shü nyu. Hapa hon ton kukha yah-ei jümei ling.

⁹ Hon gram 570 yah-ei kojal ling, hatü dokpa dung-am kao honi jümei ling.

¹⁰ Longi Daülangpü Shingei büpai cherubim nyi ling, hatü ha kü honi jümei ling.

¹¹ Cherubim nyilei yang lupü peüshep meter 8.8 lushi nyu. Shongpü cherubei yang hük kü meter 2.2 lushi nyu, hatü hapai phopshem bham kü hongshi nyu, hatü hükpa yangü hükpa cherubei yang kü hongshi nyu.

¹² Hapa keiha nyipabü cherubei yang hük kü meter 2.2 lushi nyu, hatü hapai phopshem bham kü hongshi nyu, hatü hükpa yangü hükpa cherubei yang kü hongshi nyuteke.

¹³ Cherubim nyilei yangü meter 8.8 lushi nyu, hatü la shihtü yaongshi, phopshem mong philei dhe meeshi tuh,

¹⁴ hatü Solomoni thüngshingpü, manghshempü, iyshüm kei hakpü ashak hatü nyemin ashak yah-ei haenhen ashak lingtü ha kü cherubim lajei bakei ling.

Melangnyiam Shemnyü Nyi

¹⁵ Phopshem shelei büpai melangnyiam shemnyü nyi, hük kü meter 15.5 lushi ling, hatü shemnyü ieyei kü shemnyü ju kü ow lingpü kü meter 2.2 lushi nyu.

¹⁶ Büpai ha kü nyiamkhai lingtü hapa shemnyü ju kü shinei shih; hatü büpai pomegranat betjük lajei kho hük lingtü nyiamkhai kü sheüteke.

¹⁷ Büpai hapa shemnyü nyi phopshem chingshelei hük lakdah lemei, hük laknyong lemei haongei tuh. Lakdah lemeipü shemnyü kü büpai Jakhin shei men, hatü laknyong lemeipü shemnyü kü büpai Boaz shei men.