2 SHÜPPÜKENGPÜ 2 - DAÜLANGPÜ LAIHING (BSI)

Phopshem Vehen Tempülempü

¹ Solomoni Shembüpalei men kü phopshem hük hatü büpa shing ongshem hük vehen tem.

² Solomoni dou shethen shennyak 70, 000 hatü yaong shanghen shennyak 80, 000 hatü hapa dousho kü veihen shennyak haja 3, 600 thahshi phaüshang kahmükei anei tuh.

³ Solomoni Tyre am Hiramc ongpa kü hapa shahjang shomei e: “Ngelei opa David kü nüngi ongshem vehen cedar pü shompükei ngei kao cedar pü shomshih.

⁴ Shaang ngei Shembüpa, ngelei Kahvangei men kü phopshem hük vehen temnyüpeih, hatü halei büpa kü ayingshü jakhen, daütükpü aan düngei tuhhen, dhom hi om kü Sabbath kü, Lenja Mo kü hatü Shembüpa, hamei Kahvang kü dhüm shuohpü lebü daülangpü nyihthü kü jakpü moila shuohhen. Hapayü Israel am shingvaishi den kü dükhen vanglem hih.

⁵ Ngei vehen shei tempü phopshemü longshi nyukahen; mehenangkü hamei Kahvangü lebü kahvangthü mü longpüba.

⁶ Shejao üpai büpa shing shem hük veaokhen, mehekei shejü büpayü vangsho, hakei-üng shaopü vangsho kao büpa nechapih. Büpa kü moila shuohhen shing mü lenei büpa shing shem vehen ngei üpaang?

⁷ Hanangkü shaang ngei touei hon, ngin, melangnyiam, nyiam, hatü ashak long manghshempü, iyshüm kei hakpü, hatü thüngla kü dükaokpü hatü ownyülangha lingei shih-aokpü lahhinpü shennyak hük shomshih, hatü büpayü Judah hatü Jerusalemei opa Davidi jeyei tuhpü dou dükbüthü mü chemi dükhen.

⁸ Ngei kü Lebanon leipü cedar pü, cypress pü, hatü algum pü taukta shomshih; mehenangkü nüngei dou dükbüthüyü Lebanon taukta kü dükhen manpü ngei nyingei nyüpeih. Ngelei nanglakthü nüngei nanglakthü mü,

⁹ taukta changshi vetkahen nangkü chemi dou dükhühen; mehenangkü ngei vehen shemü ahshi longshi hatü yashanshi chongkahen.

¹⁰ Ngei nüngei nanglak taukta vetpüthü kü wheat ton haja nyi, barley ton haja nyi, yiü liter haja kho ali, hatü olive mainga haja kho ali shomphahen hih” shei e.

¹¹ Tyre am Hiram Ongpai Solomon kü lainyok shomei hapakei nyang: “Shembüpai laophülei nanglakthü kü bampü nangkü büpai nüng jom shak kü ong vaihüpü khihma.”

¹² Shao Hirami, “Kahdok vangsho lingpü, David kü kon kohpü, yao-aokpü hatü danaokpü koni maei Shembüpa kü phopshem hük vehen hatü laophü shing ongshem vehen nangkü hapeü shuohpü Shembüpa, Israel Kahvangei men longtuh” shei e.

¹³ “Ngei nüng touei Huram-abi, lahhinei dou dükaokpü shennyak shomphünyeih.

¹⁴ Büpalei chenyü-ü Dan lapeü, chepayü Tyre am hih. Büpayü hon, ngin, melangnyiam, nyiam, yaong, hatü pü, ashak long manghshempü, iyshüm kei hakpü, thüngla hatü nyemin ashak hatü yaong hi pü thukei ownyülangha büpa kü eshuohpü kemei linghen manpü shennyak hih. Büpai nüngei dou dükbüthü hatü ampa David ongpalei dou dükpüthü mü dükhütuh.

¹⁵ Shaang wheat, barley, mainga, hatü yiü nangkü nüngi mehe etepa, hayü nüngei chongphobüthü mü shomshihma.

¹⁶ Nüngi napükei hami Lebanon leipü taukta vethen hatü Joppa thahshi phenei lingtü yung kü bhongei shanphahen, hatü nüngi Jerusalem thahshi anhahte” shei e.

Phopshem Dou Chongpangpü

¹⁷ Chepa Davidi shangkuk iepü keiha Solomon ongpai Israel kahdokei nyupü kung shennyak peü ieteke. Shennyak peüshep 153, 600 nyu.

¹⁸ Büpai jom 70, 000 dou shethen, jom 80, 000 yaong shanghen hatü jom 3, 600 thahshi hapa dousho kü veihen phaüshang kahmükei anei tuh.