2 SHÜPPÜKENGPÜ 1 - DAÜLANGPÜ LAIHING (BSI)

Solomoni Kihikon Yüpü

¹ David ongpalei cheha Solomoni Israel ongching wong kohshi ling; Shembüpa, büpalei Kahvang büpa mü nyu hatü büpa ahshi-üng longpü leihüteke.

² Solomoni Israel am peü haja kü, hatü kho shak kü mübüthü, shahphenbüthü, Israel am mübüthü hatü phang kü shangjingthü peü nyük.

³ Hahepak kü Solomon hatü büpa mü nyupü khong peü Gibeonei nyupü khümshingei thai; mehenangkü Shembüpalei chongphobü Mosai jahpanei nyushi lingpü ashakshem halei shiüteke.

⁴ (Shejao Vangpüshuwpü Pelayü Davidi Kiriath-Jearim leipü anei büpai Jerusalemei tuhhen vepü ashakshemei tuhteke.)

⁵ Halei Urilei cheha, Hurlei chehü Bezaleli lingpü melangnyiam moidü Gibeonei hapa ashakshem chingshelei tuh-ei nyu. Solomon hatü thaipü khongi halei Shembüpa kü khüm.

⁶ Solomoni ashakshem touei nyupü melangnyiam moidü touei peiyei Shembüpa kü halei haja longi yemhimak jüei jakpü moila shuoh.

⁷ Ha ya Solomon touei Kahvang vamei büpa kü, “Ngei nüng kü mehe nyemyahpha shei deihnya, yütuh” shei e.

⁸ Solomoni Kahvang kü, “Nüngi ngelei opa David kü bampü longi hu, hatü nüngi büpa jeiyei ngei ong vaihüteke.

⁹ Oh Shembüpa Kahvang, ngelei opa David kü nüngi lahpü jiühütuh; mehenangkü nüngi ngei molo bhihhiphang kei nyupü nanglak shak kü ngei ong vaihüteke.

¹⁰ Ngei hathü nanglak shak kü vanglem lemhen kihikon hatü nyingpühingpü yahshih; hei nevaijema mekei etü hajükpü nüngei nanglakthü kü vanglem lemaokhenang?” shei e.

¹¹ Kahvangi Solomon kü, “Mehenangkü hapa mon nüngei mongei nyupü nangkü, nüngi mophimo, dhüm nevaijü vepathü neühen hatü yangnyu shosho neyü, shejao nüngi ong vaihen tuhpü ngelei nanglak shak kü vanglem lemhen kihikon hatü nyingpühingpü yüpü nangkü,

¹² ngei nüng kü kihikon hatü nyingpühingpü shuohnyeih. Shao ngei nüng kü ha kü üei üpa ongpaiyao nüng shekü nedangpü hatü nüng pheikao nedanghen mophimo hatü vangdhüm longpü shuohhen” shei e.

Solomon Ongpalei Wong hatü Mop

¹³ Hanangkü Solomon Gibeon leipü ashakshem toueipü khümshing tuhtü Jerusalemei lei. Halei büpa Israel shak kü vanglem lemteke.

¹⁴ Solomoni koyei khari hatü koyeithü chemi thaishingkü koyei khari haja hük mü kho ali, koyei haja anpünyi nyu. Büpai hathü hanei lebü chingnyüthülei hatü hanei Jerusalemei tuh.

¹⁵ Ongpai Jerusalemei hon hi nginü yaongphaang kei, hatü cedar püyü Shephelah leipü bhukjükpüthü kei bhuh-eilinei angteke.

¹⁶ Solomonei koyeithüyü Ijip hatü Kue leipü shakei lei. Ongpalei bhei leihpüthüi bhei shangshi shuohtü shakei leiteke.

¹⁷ Jomi Ijip leipü shakei leiyei shao koyei khari hük kü ngin kho vok kü hatü koyei hük kü ngin kho hük mü pinyipüan baong kü Hit hatü Aram am kü yushuohteke.