2 SAMUEL 9 - DAÜLANGPÜ LAIHING (BSI)

David hatü Mephibosheth

¹ Davidi, “Jonathanei men kü Saul am shem kü ngei phahji yahyang huhen üpayao aoei nyüla?” shei phe.

² Shaang Ziba shei menpü Saul am shemei chongphobü hük nyu, hatü David touei büpa nyükei deiyei ongpai büpa kü, “Nüngü Ziba je?” shei phe. Büpai, “Hih” shei e.

³ Ongpai, “Ngei Kahvang bampü huhen mü Saul am shem üpayao aoei nyüla?” shei phe. Zibai ongpa kü, “Jonathanei cheha hük la nyiphen mangdaitü nyüpeih” shei e.

⁴ Ongpai, “Büpa melei nyüpa?” shei phe. Zibai, “Büpayü Lo-Debarlei Ammielei cheha Makir am shemei nyüpeih” shei e.

⁵ Hanangkü ongpai shennyak shomei büpa Lo-Debar leipü Ammielei cheha Makir am shem leipü büpa müei lei.

⁶ Mechem Saulei chehü, Jonathanei cheha Mephibosheth David touei peipa, büpai büpa kü dhüm huei aümei sha.

⁷ Davidi, “Mephibosheth” shei nyüktü, “Nüng tenyem; mehenangkü ampa Jonathanei men kü ngei hingmei nüng kü phahji yahyang huhen. Ambü Saulei kahdok kemei nüng kü nyokei shuohhen, hatü nüng düngei ngei mü nükdü hük kü hahhen” shei e.

⁸ Mephibosheth-i aümei shatü, “Nüngei chongphobü ngei shimahng keipü kü nüngi phahjihen ngei üpaang?” shei e.

⁹ Hahepak kü ongpai Ziba, Saulei chongphobü kü nyükei büpa kü, “Ngei nüngei shembülei hapeü kü Saul hatü jom shemei mophimo lemphüli shuohtüktih.

¹⁰ Nüng hatü anhapeüthü hatü nüngei chongphobüthüi büpa shing kah linghen, hatü halei vampü hahyingi nüngei shembülei hüpeü hamhen; shejao nüngei shembülei hüpeü Mephibosheth-ü düngei ngei mü nükdü hük kü hahhen” shei e. Zibalei hapeüthü jom anpünga hatü chongphobüthü jom kukha nyu.

¹¹ Hahepak kü Ziba-i ongpa kü, “Ngelei shembü ongpai epü keiha nüng chongphobüi dükhen hih” shei e. Hanangkü Mephiboshethao Davidei nükdülei ongpalei hapeüthü hük keiha hahyingei nyu.

¹² Mephiboshethlei yeshang hük meni, Mika shei nyu, hatü Zibalei shemei nyupüthü kemei Mephiboshethlei chongphobüthü leiteke.

¹³ Mephibosheth-ü Jerusalemei nyu; mehenangkü büpai düngei ongpalei nükdülei hahyingteke. Büpa la nyiphen mangdaitü nyu.