2 SAMUEL 8 - DAÜLANGPÜ LAIHING (BSI)

Davidi Vehok Neüpü

¹ Hepak kanja angpheikü Davidi Philistia am mü hok, hatü neü. Davidi Philistia amei lak leipü Metheg-Ammah omei yah.

² Büpai Moab amao neütük, hatü yeppüthü kemei kahdokei lemhütü büpai vü yanghük yah-ei jomphong kü shetteke. Büpai jütükhenthü kü vüyang nyipa shet, hatü yangei tuhhenthü kü vüyang hüki chem mon shet. Hanangkü Moab am David phangkü nyu, hatü jomi büpa kü bom ühhamteke.

³ Rehobei cheha, Zobah amei ongpa Hadadezeri Euphrates yungyen kü nyupü kahmükthü büpai shümei omlanghen daiyei nyushingkü Davidi büpa mü hokei neüteke.

⁴ Davidi jomei koyei khari kü uopü shennyakthü haja hük mü kho nyet, hatü la mü daiyei hokpü veshan haja kukha yepei yah. Büpai koyei khari kho hük mon tuhtü aopü kemei la bhagtükkem.

⁵ Mechem Damaska leipü Aramea am Zobah ong Hadadezer kü sheühhen heihpa, Davidi Aramea am shennyak haja hapünyi jütük.

⁶ Hapheikü Davidi Damaskalei Aramea am kü veshanthüi yomei tuh, hatü Aramea am David phangkü nyu, hatü büpa kü bom ühteke. David melemei dai, peü lem kü Kahvangi aokpü danghü.

⁷ Hadadezerlei chongphobüthüi koshi nyupü hon-iithü yah-ei Jerusalemei leilang.

⁸ Hadadezerlei jila Betah hatü Berothai leipü David ongpai melangnyiam longi yahteke.

⁹ Mechem Hamath leipü Toi ongpai Hadadezerlei veshanthü peü Davidi neütükpüja shei danpa,

¹⁰ Toi ongpai David ongpa touei cheha Joram shomei Hadadezer ongpa neütükpü nangkü longi mongmeipü shah eteke. Mehenangkü Hadadezeri düngei Toi am mü hokhamteke. Jorami büpa mü ngini lingpü douthü, hon hatü melangnyiam koei pei.

¹¹ David ongpai lebü jatthü: Edom, Moab, Amalek hatü Zobah am Rehobei cheha ongpa Hadadezer,

¹² hathü leipü vehok neütü leipü hon hi ngin mü hathüao omei Shembüpalei men kü daühüteke.

¹³ Davidi Hüm Kahjilei Edom am haja anpüshet jütü leipheikü büpa longi men-e lei.

¹⁴ Büpai Edom kahdok kempülei veshanthü khong longpü tuh, hatü Edom am kemei David phangkü nyu. Shembüpai David daipü lem peü kü aokpü danghü.

¹⁵ Davidi nanglakthü peü kü mehe shahhing hatü jiüshangpü ha dükei Israel am peü shak kü vanglem lem.

¹⁶ Zeruiahlei cheha Joabü veshanthü shak kü mübü vai; Ahiludei cheha Jehoshaphat-ü nyangbü vai;

¹⁷ Ahitubei cheha Zadok hatü Abiatharlei cheha Ahimelekh nyi ngongpa vai; Seraiah-ü laknyangbü;

¹⁸ Jehoiadalei cheha Benaiah-ü Kereth hatü Peleth am shak kü veihen tuh, hatü Davidei chehathü ngongpathü vaiteke.