2 SAMUEL 4 - DAÜLANGPÜ LAIHING (BSI)

Ishbosheth Jütükpü

¹ Mechem Saulei cheha Ishbosheth-i Hebronei Abner jütüktekeja shei danpa, büpa mong maanei nyem, hatü Israel am kemei mong mahdai.

² Ishboshethlei veshan mübü shennyak nyi nyuteke; hükei menü Baanah hatü hükpalei menü Rekhab nyuteke. Jijiyü Beeroth leipü Benjamin am Rimmonei cheha nyi nyuteke; mehenangkü Beeroth amü Benjamin am shei nyingnyüke.

³ Shaang Beeroth am kemei Gittaimlei nyaiyei dai, hatü shinnyih thahshi halei benha kei nyunyüke.

⁴ Saulei cheha Jonathanei hapeü hük la nyiphen mangdaitü nyu. Jezreelei Saul hatü Jonathan nyi jütükpü shahjang leipü hepak kü büpa nyübüh vangbong nga nyu. Büpa kü jungpü nyüha hüki büpa pohtü shülangi daishingkü büpa dok leipü vüshih; hanangkü büpa la mangdai. Büpalei men Mephibosheth nyuteke.

⁵ Shaang Beeroth am Rimmonei cheha Rekhab hi Baanah nyi nyihnüng vanghe phangkü Ishbosheth nyiumeiyei nyushingkü shemei pei.

⁶ Jijinyi shem mongei wheat hah yahnüng shüpükei shüei büpa kü vom kü bapei jüphongtü Rekhab hi Baanah nyiyü nyaidai.

⁷ Shaang büpa laophülei shinshingei shishi nyushingkü shemongei shüei baptü jüei büpalei shangjing dakei kotü Arabah lemei dai.

⁸ Jijinyi-i Hebronei David kü Ishboshethlei shangjing koei peiyei ongpa kü, “Hapayü nüng jühen yempü nüngei vepa Ishboshethlei shangjing hih; Shembüpai hamei ongpalei bhüh Saul hatü büpalei hühihathü kü yemteke” shei e.

⁹ Davidi Beeroth am Rimmonei cheha Rekhab hi Baanah nyi kü, “Ngelei vepathü peü kübü ngei yangpü vanyangyem Shembüpalei men kü ngei vangei enyeih,

¹⁰ ngei kü shahjangmei koei peinyeih shei deihshi, ‘Veituh, Saul didaiteke’ shei epü shennyakao ngei yepei büpa Ziklagei jütükpeih; hapa shahjangmei kü ngei büpa kü hapa laklei yahshuohpeih.

¹¹ Shejemü nemeipü shennyakthüi pungpü neshiüpü shennyak lüngei nyeanshi jüpeyü meshük nemeipü ten vaihenang! Shaang ngei büpalei iy anji kü neyühen je?” shei e.

¹² Hanangkü Davidi nethethü kü shah shuohtü jiji jütük; jomphongi jijilei lakhila dehtüktü büm mon Hebron yungkuk touei shükphong. Shejao Ishboshethlei shangjingü jomi yah-ei Hebronei Abnerlei mahngchongei vüteke.