2 SAMUEL 3 - DAÜLANGPÜ LAIHING (BSI)

¹ Saul hatü David am shem nyi aa kü luangi hokteke, hatü David wong kohpüba kohpüba lei, shejao Saul am shem wong nekohpüba lei.

Davidei Chehathü

² Hebronei nyushi David kü yeshangthü bühjateke. Büpalei hashongpa Amnonü Jezreel am Ahinoami büh;

³ nyipabü yeshang Kileabü Karmel am Nabali tuhphongpü vaümnyü Abigaili büh; jempabü-ü Absalom, Geshur am Talmai ongpalei yiükha Maakah-i büh;

⁴ alipabü-ü Adonijah, Haggith-i büh; ngapabü-ü Shephatiah, Abitali büh;

⁵ hatü vokpabü-ü Ithream, Davidei chenyüha Eglah-i büh. Hathüyü David Hebronei nyushi bühjapü hapeüthü nyuteke.

⁶ David hatü Saul am phang nyi hokshingkü Saul am shem kü Abner longi wong koh-ei men-e lei.

⁷ Shaang Saulei yiükphü hük Aiahlei yiükha Rizpah shei nyu. Nyih hük Ishbosheth-i Abner kü, “Nüng mehekei opalei yiükphü mü shipa?” shei eela-ei e.

⁸ Abneri Ishboshethlei shah kü longi mongshih-ei, “Ngeiyü Judah amei shi shangjing hih shei deihnyu je? Shinnyih thahshi ngei ampa Saulei, hatü büpalei shem am hatü küphüthü shing lanei shuoh-ei heihnyüpeih, hatü Davidei lak kü nüng neshuohtükangpih; shejema shaang nüngi ngei kü hapa nyüha mü pungpeih shei ngei kü mang yepnyu je?

⁹ Shembüpai David kü lahpükei ngei David kü nedükjema Kahvangi Abner kao hapakei nemei-i nyemdükshuoh.

¹⁰ Dan kübü Beer-sheba thahshi Saul am phang kübü ongching yah-ei David kü shuohtü Israel hatü Judah kempü kü David-i vanglem lemhen.

¹¹ Ishbosheth-i Abner kü lebü shah phahükao ne-eaok; mehenangkü büpa nyemteke.”

¹² Abner-i Hebronei shahjang kobü hük shomei David kü e, “Hapa kahdok üpaleiang? Nüngi ngei mü vangteishuwteipü lingjema Israel am kemei nüngei lak kü shuohhen ngei sheühphahen hih” shei e.

¹³ Davidi, “Meiteke, ngei nüng mü vangteishuwteipü linghen. Shejao nüngi hapakei dükphahen-ü, mechem nüng ngei touei peikahenshang Saulei yiükha Mikhal nemü-i tepeikei” shei e.

¹⁴ Hapheikü Davidi Saulei cheha Ishbosheth kü “Ngei Philistia am shennyak kho hükei shuw shuohtü yahhahpü ngelei shembünyü Mikhal yahshih” shei e.

¹⁵ Hanangkü Ishbosheth-i shah shomei chepaha Paltiel, Laishlei cheha leipü pinnyü müei deilang.

¹⁶ Shejao chepahai lemyang kü Bahurim thahshi pinnyü phei müshi thepyaki dai. Hahepak kü Abneri “Shemei leidaituh” shei e. Hanangkü büpa nyokei leidai.

¹⁷ Abneri Israel am behethü kü shah shomei, “Hepak luangi ammi Davidi ong nyemvaikei shei deihshi nyupeih.

¹⁸ Hepak mei shaang khih! Mehenangkü Shembüpai David kü, ngelei chongphobü David homei ngei ngelei nanglak Israel am Philistia hatü jomei vepathü peü leipü yanghen” shei lahpeih shei e.

¹⁹ Abneri Benjamin am kao pongteiyei eshuoh; hapheikü Abneri Hebronei heih-ei David kao Israel hatü Benjamin phang kemei hapakei dükhen temei nyüke shei eshuohteke.

²⁰ Mechem Abneri shennyak kukha mütü Hebronei David mü pongteinüng heihjapa, Davidi Abner hatü büpa mü heihpü shennyakthü kü mo temteke.

²¹ Abneri David kü, “Ngei Israel kahdok peü lemei daishah hatü ngelei shembü nüng ong vaihen hatü jomi nüng mü vangpüshuwpü linghühen, hatü nüngei mongi lümpükei Israel kempü kü vanglem lemhen” shei e. Hanangkü Davidi Abner leishih hatü büpa meishi leiteke.

Joabi Abner Jütükpü

²² Meshük neangi Davidei shennyakthü hatü Joab shei chinghah daipü dounyünangba longi koei lei. Shejao Abner-ü Hebronei David mü nenyu; mehenangkü Davidi büpa leishihtük hatü büpa meishiüng leiteke.

²³ Mechem Joab hatü büpa mü nyupü veshanthü nyokei leipa, Joab kü, “Nerlei cheha Abner ongpa touei peitü meishi-üng ongpai büpa leishihtüktih” shei eteke.

²⁴ Hahepak kü Joab ongpa touei peiyei, “Nüngi mehe dükpa? Abner-ü nüng touei peiküjü mehekei leishihtükpa?

²⁵ Nerlei cheha Abner-ü nüng luhahnüng shei peipü khihma. Büpai nüng daipü leipü hatü nüngei dükhiling nyinghahnüng shei peipü khih, ha nüngi nyingei nyüke” shei e.

²⁶ Joab David toueipü vamei daipheikü Joabi Abner phei changei phongmokbüthü shomei jomi büpa Sirah yungkuk leipü müei lei, shejao Davidi ha jung nenying.

²⁷ Mechem Abner Hebronei müei leijapa, Joabi büpa penyüsha lemei shahjo eshuohnüngkei müei daiyei vom kü baptü jütük. Hanangkü büpa Joabei chenaü Asahel jüpü med kü büpaao mah.

²⁸ Hapheikü mechem Davidi ha jung danpa, büpai, “Ngei hatü ngelei ongchingi Nerlei cheha Abnerlei iy yenpü nangkü Shembüpa touei ha mang nekopih” shei e.

²⁹ “Hapa mangü Joabei shangjing kü, hatü chepalei shem am peü kü hettuh; hatü am shem kü düngei hanei-i payü mashü yenpü nevaijü ngomdin kohpü nevaijü lakkholano nevaijü mih-ei yannah kü mahpü nevaijü taopünangpü nedoh-i nyutuh!” shei e.

³⁰ Hanangkü Joab hatü büpalei chenaü Abishai nyi-i Gibeonei hokshingkü Abneri jijilei chenaü Asahel jütükpü nangkü büpa-ao jütük.

³¹ Hapheikü Davidi Joab hatü büpa mü nyupü shennyakthü kü, “Ammei büm-ow shaaktuh; dhoila ashak ümtü Abner nangkü mahng theptuh” shei e, hatü mahng vühen daishingkü David ongpa mahng pheilei müei dai.

³² Jomphongi Abner Hebronei vüphong. Ongpai ngeüwong anei Abnerlei mahngchongei thep, hatü nanglakthü peüi thep.

³³ Ongpai Abner kü hapa mahng kesho lok: “Ngapa hük dipükei Abner mehekei dihenang?

³⁴ Nüngei lak kü nesha-angpih, nüngei la kü nengeih; Nemeipü am touei hanei am dopükei nüng doteke.” Hapa keiha nanglakthü peüi büpa kü shao mahng thep.

³⁵ Hahepak kü shennyak peüi David kü lemhük dangkao hahtuh shei yawhhen thai, shejao Davidi lah-ei, “Vanghe mangshü thahshi ngei lemhük dangkao hahjema Kahvangi ngei kao hapakei nyemdükpha” shei e.

³⁶ Nanglakthü peüi ha nying hatü mong hah-ei deih.

³⁷ Hanangkü nanglakthü hatü Israel am kemei ha nyih Nerlei cheha Abner jüpü kü ongpai hean neyah-ang shei nying.

³⁸ Hatü ongpai büpalei chongphobüthü kü, “Israel kü shinnyih longhiong hatü hamhiman mahpeih shei nenyingnyu je?

³⁹ Shinnyih ngei ong vailangmao wong neshiü; Zeruiahlei hapeüthüi ngei kü longi nemei-i dükteke. Nemeipü am kü nemeipü shangshi Shembüpai nyemyahshuoh” shei e.