2 SAMUEL 23 - DAÜLANGPÜ LAIHING (BSI)

Davidei Shahshom

¹ Hathüyü Davidei shahshomthü khih: Jesselei cheha Davidi epü, Kahvangi longei anshihpü shennyakei shah; Jakob, Kahvangi jepü shennyak, Israel amei kesho venbü.

² Shembüpalei laanghai ngei homei enyüpeih, büpalei shah ngelei yeijaangei nyüpeih.

³ Israel Kahvangi eteke; Israel amei Yaongnyüi ngei kü eteke: Kahvang nyemshi üpai ngelei nanglak kü shahhing kü vanglem lemnya,

⁴ büpayü phum neshiüpü nepnüng vanghela vangngai le-angpeih.

⁵ Ngelei mong Kahvang mü hapakei nenyupü je? Lemphü kü shüpeikengei, yangei, büpai ngei mü nedohnetenpü vangpüshuwpü nelingangpü je? Büpai ngei napü peü kü betjük nejükhühen je?

⁶ Shejao nemeipü shennyakthüyü hühhihang kei yaktükhen; Mehenangkü hathüyü laki homei neyah-aoknyih.

⁷ Hathü kü dükhenü nyiamlüngi nevaijü lüngi yahnyüpeih; Hathüyü haüpü shingei aw kü jaktüknyeih.

⁸ Hathüyü Davidei veshanthülei men khih: Tahkhemon am Josheb-Basshebeth, büpayü jom jem khongkü longpü; büpai vehok shan hük kü shennyak kho shet büpalei phungi hümei jüteke.

⁹ Büpa phangkü nyipabüyü Ahoh am Dodolei cheha Eleazar nyuteke. Büpa vehokbü jom jem khongkü hük vaipü nangkü hokhen shingvaishi Pas-Dammimlei thaipü hepak kü Philistia am kü yaüeilungei epü hepak kü büpa David mü nyu. Hapheikü Israel am nyokei leidai,

¹⁰ shejao büpa lakshing yaongtü büpa lak mangshaok thahshi hatü yan kü büpalei lak mangkham thahshi Philistia am jüteke. Shembüpai ha nyih aokpü longpü danghü. Hapheikü shennyakthü büpa touei shangjing mon dakhen nyokei lei.

¹¹ Büpa pheikü jempabüyü Harar am Ageelei cheha Shammah nyuteke. Mechem Philistia ami Lehilei lentil mon maei nyupü kahlei thaipa, Israel veshanthü nyemei nyaidai.

¹² Shejao Shammah-i kah jiamei bangei yaongtü Philistia am jü; hatü Shembüpai aokpü longpü danghü.

¹³ Hah vetei chongpanghen hepak kü hampa jom hapüan khong kü jom jem David nyupü Adullam yaongshalei yiü; hahepak kü Philistia veshanthü Rephaim kahjilei baümtap vetü nyu.

¹⁴ Hahepak kü Davidü pe showtükpü shangching hükei nyu, hatü Philistia amei veyom shingü Bethlehemei nyu.

¹⁵ Davidi yahyangei, “Oh hanei ami Bethlehem yungkuk penyüsha toueipü yung yinghen yahphülangmeyo?” shei e.

¹⁶ Hahepak kü hampa jom jemi Philistia amei baümtap benei shüei penyüsha yopailei nyupü Bethlehem yungkuk leipü yung shoei leiyei David kü shuoh. Shejao büpai hapa nenyingi Shembüpa touei langteke.

¹⁷ Büpai, “Ngei hapa yinghenü Shembüpai nemongnyih. Laophülei yangnyu mahhen kao nenyemi daipü shennyakthülei iy ngei yinghen je?” shei e. Hanangkü büpai ha neying. Hampathü jom jemi hathü dük.

¹⁸ Joabei chenaü Zeruiahlei cheha Abishaiyü hapüan kü mübü nyu. Büpai phung mon notü shennyak kho jem mü hok, hatü jom jütük, hatü jom jem kei-üng büpayao men-e lei.

¹⁹ Büpayü hapüan khongkü longi men-e shennyak nyuteke, hatü büpa jomei mübü vai, shejao büpai jom jem kei payü men-e nelei.

²⁰ Jehoiadalei cheha Benaiah-ü Kabzeel leipü hampa nyuteke; büpai dounyü longi dük; büpai Moab am Arielei cheha nyi jütük. Shü vüpü nyih büpai yiüei kahsha leipü mailang hük jü,

²¹ hatü büpai Ijip am shennyak longpü hük jü. Hapa Ijip am shennyakei lakei phung noshi nyu, shejao Benaiah-i lenshuoh hük notü büpa mü hokhen heih, büpai Ijip am shennyakei lak leipü phung aetei yahtü büpalei phungi hümei jü.

²² Hapa keiha Jehoiadalei cheha Benaiah-i dük, hatü wong kohpü shennyak jem mü lenei büpayao men-e lei.

²³ Hapüan khongkü büpayü men-e shennyak lei, shejao büpa jom jem kei payü men-e shennyak nelei, hatü Davidi büpayü büpa yombü vaihü.

²⁴ Hapüan khongkü lebüthüyü: Joabei chenaü Asahel; Bethlehem leipü Dodolei cheha Elhanan;

²⁵ Harod am Shammah; Harod am Elika;

²⁶ Pelet am Helez; Tekoa am Ikkeshlei cheha Ira;

²⁷ Anathoth am Abiezer; Hushah am Mebunnai;

²⁸ Ahoh am Zalmon; Netophah am Maharai;

²⁹ Netophah am Baanahlei cheha Heleb; Benjamin kahdok Gibeah leipü Ribailei cheha Ittai;

³⁰ Pirathon am Benaiah; Gaash kahji leipü Hiddai;

³¹ Arabah am Abi-Albon; Bahurim am Azmaveth;

³² Shaalbon am Eliahba, Jashenei hapeüthü:

³³ Harar am Shemmahlei cheha Jonathan; Harar am Shararlei cheha Ahiam;

³⁴ Maakah am Ahasbailei cheha Eliphelet; Gilon am Ahithophelei cheha Eliam;

³⁵ Karmel am Hezro; Arab am Paarai;

³⁶ Zobah am Nathanei cheha Igal; Gad am Bani;

³⁷ Ammon am Zelek; Zeruiahlei cheha Joabei vehok phunglang kobü Beeroth am Naharai;

³⁸ Jattir am Ira hatü Gareb nyi;

³⁹ Hit am Uriah-peüshep jom hapüanpü nyet nyuteke.