2 SAMUEL 22 - DAÜLANGPÜ LAIHING (BSI)

Davidei Menvih Kesho

¹ Mechem Shembüpai büpalei vepathü hatü Saulei lak kübü yangshuohpa, Davidi Shembüpa kü hapa kesho lok:

² Shembüpa ngelei yaongnyü, ngelei penyüsha hatü ngei yangbü;

³ Ngelei Kahvangü ngelei yaongnyü, ngei büpa kü loinyeih, ngelei inyüshung hatü ngei yemleipü vaung. Büpa ngelei penyüsha, ngei loishing, ngei yemleipü, nüngi ngei nemeipü shennyakthü kübü yangpeih.

⁴ Menlong ngampai yahhen shangpü Shembüpa kü ngei nyük; hatü ngei ngelei vepathü kübü yangpeih.

⁵ Dihen yungmoki ngei shonlang, mangpü yungmoki ngei bhonglang;

⁶ Sheol vülepi ngei hinlangteke, dihen aethitai-i ngei kü bangnyüke.

⁷ Ngelei shanghah kü ngei Shembüpa kü nyük; ngei ngelei Kahvang kü nyük. Büpalei khümshem leipü ngei lenpü büpalei dhaongei shü.

⁸ Hahepak kü kahdok kheü hatü jen; vangsho chongnyiam yaongthü kheü hatü jen; Mehenangkü büpa mongshih-ei nyuteke.

⁹ Büpalei shongju leipü awshit vam, hatü lühbenüng aw büpalei ju leipü vam, bahpü awtao büpa leipü vamteke.

¹⁰ Büpai vangsho yamtüktü yiü; phumnyakthü büpalei labha mongei nyu.

¹¹ Büpai cherubim kü uotü piyei dai; Büpai vanglükei yang kü uotü dai.

¹² Büpai laophü kü vangnyaki jümhah; yungmongei nyupü phumnyaki büpa kü shonhahnyüke.

¹³ Büpa nyangnyangtoptoppü nangkü awtao kao awlom vamnyüke.

¹⁴ Shembüpai vangsho leipü vangmuk khungnyüke; Jaipübai büpalei ngeü annyüke.

¹⁵ Büpai lahhan kaptü vepathü yantük, klang vangtengi jomphong nyaitükkem.

¹⁶ Shembüpai lohpü nangkü büpalei shongsha leipü ngü laopai, yungching ilangmongao shakei vam, kahdoknyü chongnyiam shingao kong leihü.

¹⁷ Büpa shangpa leipü yiüei ngei kü shoung; Büpai ngei yungching ilangmong leipü tukei an.

¹⁸ Büpai ngei longi wong kohpü; ngei mao wong kohpü vepathü leipü yang.

¹⁹ Ngei shanghahpü nyih jomi ngei mü hokhen pei, shejao Shembüpai ngei kü sheühpeih.

²⁰ Büpai ngei shingmei phangmapülei müei dei. Büpai ngei kü monghahpü nangkü büpai ngei yangpeih.

²¹ Ngei daülangshemshepü aimü Shembüpai ngei kü dükpeih; Ngelei lak daülangpü aimü büpai ngei kü laklei shuohpeih.

²² Mehenangkü ngei Shembüpalei lem kü kam; Ngei Kahvang toueipü yanei daiyei douten nedük.

²³ Büpalei shahkungnyüthü peü ngei düknyüpeih; Ngei büpalei shahkungnyü nebangi nelepdai.

²⁴ Büpa touei ngei eela neshiüi nyupeih, hatü ngei mang nethah-i nyupeih.

²⁵ Ngei daülangshemshepü aimü, ngei büpa touei daülangi nyupü aimü Shembüpai ngei kü laklei shuohpeih.

²⁶ Hingshangpüthü touei nüngi hingshangi hunyüke; Eela neshiüpüthü touei eela neshiüi hunyüke.

²⁷ Daülangpüthü touei nüngi daülangi hunyüke, hatü kaokpüthü touei nüngi kaokei hunyüke.

²⁸ Nüngi nenteiaokpüthü yangnyüke, shejao nebahnevaipüthü vüshihhen nüngei mük chishi nyüke.

²⁹ Oh Shembüpa, nüngü ngelei vangngai awdük; Shembüpai ngelei vangnyak vangngai leihünyeih.

³⁰ Nüngi sheühpai ngei vepathü ngümtükaokhen; Ngelei Kahvang mü ngei pe homei shüaokhen.

³¹ Kahvangei lemü changpüshapü; Shembüpalei shah-ü mong yangbenüng. Büpa kü loipüthü peü kü büpayü inyüshung.

³² Shembüpa mü lenei Kahvang üpa nyüpa? Jenei Kahvang mü lenei Yaongnyü üpa nyüpa?

³³ Ngei wong kohhüpeyü Kahvang, hatü ngelei lem jiüshangi lingphünyeih.

³⁴ Büpai ngelei la shaokei la kei shangkhah-i ling, Büpai ngei vakhivien kao yaonghüaoknyeih.

³⁵ Büpai ngei kü hokhen nyuhphünyeih, ngelei laki melangnyiam lah-ao komtüknyeih.

³⁶ Nüngi ngei kü nüngei aokpü inyüshung shuoh, ngei longpü leihühen ngei kü sheühpeih.

³⁷ Nüngi ngelei lem bhashahshi ling, hatü ngelei la nekükhü.

³⁸ Ngei ngelei vepathü kü changei dai hatü jütükkem, hatü jom mangjükem thahshi nyokei nelei.

³⁹ Neyangaokhen mü ngei jom ngümei jütük, jomphong ngelei la phangei dopeih.

⁴⁰ Hokhen shingvaishi nüngi ngei wong kohhü; Nüngi ngelei vepathü ngelei la tüngei doei lemhü.

⁴¹ Nüngi ngelei vepathü nyemei ngei toueipü nyaitükhü, hatü ngei kü jiühitpüthü peü ngei jütük.

⁴² Jomi sheühpü yemjao üpaiyao jom yanghen neshiü; Jomi Shembüpa kü nyük, shejao Shembüpai jomi nyükpü kü nejang.

⁴³ Ngei jomü kübhih leishi nihtük; Ngei jomü chingshong leipü nyaühut kei nyeüei shuoptük.

⁴⁴ Nüngi ngelei nanglakthülei lak kübüao yang; Nüngi ngei jatthü kü shangjing vaishi tuh. Ngei nenyingpü nanglakthüiyao ngei chongpho.

⁴⁵ Kung shennyakthüao ngei touei aümei shatü pei; Jomi ngei epü danhinüng ngei epü bang.

⁴⁶ Kung shennyakthüi mong mahdaitü, penyüsha kübü laoei ngei touei kheüyaki pei.

⁴⁷ Shembüpa yemmü nyüpeih! Ngelei Yaongnyü moihimantuh! Ngelei Kahvang, ngei yemleipü Yaongnyü longei anshihtuh!

⁴⁸ Büpayü ngei aokpü danghüpü Kahvang; hatü jatthü ngelei la phangei tuhpeih.

⁴⁹ Büpai ngelei vepathü toueipü ngei bümei leihü; Nüngi ngelei vepathü shak kü ngei longei anshih, hatü nemeipüthü leipü nüngi ngei yangpeih.

⁵⁰ Hanangkü jatthü peü khongkü ngei nüng vihshah, Oh Shembüpa; Ngei nüngei menvih kesho lokhen.

⁵¹ Büpai ongpa kü aokpü longpü shuohpeih; Büpai laophüi jepü kü; David hatü büpalei hühihathü peü kü düngei bampü hunyeih.