2 SAMUEL 21 - DAÜLANGPÜ LAIHING (BSI)

Saulei Hühihathü Jütükpü

¹ David vanglem lempü hepak kü nedoh-i bong jem thahshi münghishaü nyuteke, hatü Davidi Shembüpa kü ha nang phe. Shembüpai, “Saul hatü jomei shemong kü iy yenpü mang nyüke; mehenangkü büpai Gibeon am jütükpeih” shei e.

² Hanangkü ongpai Gibeon am nyükei jom mü etei. Gibeon amü Israel am nevai, Amor am nyuteke. Israel ami Gibeon amü nejütüki tuhhen vangteke, shejao Sauli Israel hatü Judah kü nyakpükenpü nangkü monghumpai jom li hümtükhen kheteke.

³ Davidi Gibeon am kü, “Ngei am kü mehe dükphahenang? Ammi Shembüpalei nanglakthü kü moihimanphahen shingvaishi ngei mekeipü jiüteipaiteihen dou dükphahen ang?” shei phe.

⁴ Gibeon ami büpa kü, “Jen aa kü hon hi ngin nang nevai, hatü Saul hatü jomei shem am nang nevai, nevaijü Israel kü hanei am jütükhen nangao nevai” shei e. Büpai, “Ngei am kü mehe nyemtükpha shei enya?” shei e.

⁵ Jomi ongpa kü, “Israel kahmük kü hamei li hümtükhen hatü jütükhen shei üami kon lingnya,

⁶ büpalei hapeüthü jom nyet hamei lak kü yahshih, hatü hami Shembüpalei kahshang Gibeonei Shembüpa touei jühen hih” shei e. Ongpai, “Ngei jom yepei yahphahen hih” shei e.

⁷ Shejao ongpai Jonathanei cheha Mephibosheth yangei tuh; mehenangkü David hatü Saulei cheha Jonathan nyi aa kü Shembüpalei men kü vangteitükpü nyuteke.

⁸ Ongpai Rizpahlei yiükha Aiah-i Saul kü bühjapü Armoni hatü Mephibosheth nyi, hatü Meholath am Barzillailei cheha Adriel kü Saulei yiükha Merab-i bühjapü yeshangthü jom nga yah-ei,

⁹ büpai hathü Gibeon am kü yepei shuoh, hatü jomi hathü jüei Shembüpalei kahshangei yaüphong. Jom nyetphen chem kü mah. Hathüyü barley hah vetpü shongpü nyih nyuteke.

¹⁰ Hahepak kü Aiahlei yiükha Rizpah-i dhoila ashak yah-ei pinnyü shing yaongnyü shangkü tapshaü lingtü mahngthü yomei hatvet chongpanghinüng bang hepak vang mangkei thahshi nyihnüng asha alang nepeihüi hatü yanüng yemhamakha nepeihüi yomei nyu.

¹¹ Mechem David kü, Saulei yiükphü Aiahlei yiükha Rizpah-i dükpü jung ejapa,

¹² Philistia ami Gilboalei Saul hatü cheha Jonathan nyi jüei Beth-Sheanei sheüei tuhpü Jabesh Gilead ami güh-ei yahlangpü vangthü Davidi yah-ei leiteke.

¹³ Büpai Saul hatü cheha Jonathan nyilei vangtao, hatü halei jütü shükshi chongjapüthülei vang koei lei.

¹⁴ Jomi ongpai epükei Saul hatü Jonathan nyilei vang leiyei chepa Kishlei mahngchongei Benjamin kahmük Zelalei dungphong. Hapheikü kahdok men kü phoppü kü Kahvangi jangteke.

Philistia am mü Hokpü

¹⁵ Shao Philistia hatü Israel nyi aa kü vehok vam. David hatü büpalei veshanthü Philistia am mü hoknüng dai. Jomi Philistia am mü hokei David longi nyiuteke.

¹⁶ Rapha am shennyak hük, Ishbi-Benob shei mentü nyu; büpalei phunghak dokshuohjü dok jem mü dokbhao hatü phunglang ja notü David jühen hih shei e.

¹⁷ Shejao Zeruiahlei cheha Abishai peiyei David kü sheüh, hatü Philistia naüha jü. Hapheikü Davidei shennyakthüi büpa kü lah-ei, “Israel amei vangngai awdük nemettükhen shingvaishi hajük kü nüng ham mü vehokei nedeihahpih” shei e.

¹⁸ Hapheikü, Goblei Philistia am mü vehok vam. Hahepak kü Hushath leipü Sibbekai-i bümlong wong kohpü Rapha am shennyak hük Saph jü.

¹⁹ Haphei kao shao Philistia am mü Goblei hok. Hahepak kü Bethlehem leipü Jairlei cheha Elhanani Gath leipü Goliath jü; büpalei phung büm ashak dakteipü miyaung kei nyuteke.

²⁰ Shao nedoh-i Gathlei vehok vam. Halei bümlong wong kohpü Rapha am shennyak hük lakjaang lajaang kuk vok baong, peüshep hapüali kohtü shennyak hük nyu.

²¹ Mechem büpai Israel am kü yaüeilungei ejapa, Davidei chenaü Shimeilei cheha Jonathani büpa jü.

²² Jom aliphen Gathlei nyupü Raphalei bümlong wong kohpü li nyuteke, hatü jom peü David hatü büpalei shennyakthülei lak kü mahkem.