2 SAMUEL 20 - DAÜLANGPÜ LAIHING (BSI)

Sheba-i David Khüei Yaongpü

¹ Shaang Benjamin am Bikrilei cheha Sheba longi nebahnevaipü shennyak halei nyu. Büpai amit vüngtü lenei, “Ham David mü phaihan neshiüpih, Jesselei cheha mü hean neshiüpih! Ashakshem mongei nyupüthü peü, Oh Israel!” shei e.

² Hanangkü Israel shennyakthü peü David yakphongtü Bikrilei cheha Sheba phei mü, shejao Judah nanglakthüi Jordan kübü Jerusalem thahshi jomei ongpa phei mong shuoh-ei mü.

³ Mechem David Jerusalemei büpalei shemei leipa, büpai shem veihen tuhpü yiükphü jom an yah-ei shem hükei yomshi tuh. Büpai jomphong kü hahying shuoh, shejao jomphong mü neshi. Mangdi thahshi vaümnyüthü kei küpshi angteke.

⁴ Hapheikü ongpai Amasa kü, “Judah am shennyakthü peü kü nyih jem mongkü ngei touei peihen nyüktuh, hatü nüngao hatouei chongkei” shei e.

⁵ Hanangkü Amasa-i Judah am nyükhen dai, hatü ongpai itpü nyih kü nyeishi büpai hepak yah.

⁶ Davidi Abishai kü, “Shaang Bikrilei cheha Sheba-i Absalomi dükpü mao nemeipüba dükphahen khih; ngelei shennyakthü mütuh hatü büpa changei daituh, hei nevaijema büpai penyü showtükpü chingnyü mongei shüei jen toueipü yangdaihen khih” shei e.

⁷ Hanangkü Joabei shennyakthü Kereth hatü Peleth hatü wong kohpü veshanthü peü Abishai-i mütü Jerusalem leipü layaongei Bikrilei cheha Sheba changei dai.

⁸ Mechem jom Gibeonei yaongnyü longpü touei nyupa, Amasa-i jom mü pongteinüng pei. Shaang Joab-ü veshan ow owtü ha shangkü yanpishung kü yanlu laptü shüng kü shepshi nyu; büpa daishingkü ha laoei vüdai.

⁹ Joabi Amasa kü, “Mongjempa, mekei nyüpa?” shei phe, hatü Joabi Amasa kü büpalei jumum kü düktü büpalei lakdah phi-i büpa kü om kü jüphen khaai.

¹⁰ Shejao Joabei lakei yanlu noshi nyupü Amasa-i nenying; Joabi büpalei vom kü baptü leihilang peü kahdokei chinshi hatouei büpa di. Büpai nyipabü nebap. Hapheikü Joab hatü chenaü Abishai-i Bikrilei cheha Sheba changei dai.

¹¹ Joabei shennyak hük Amasalei büm kü yaongtü, “Üpai Joab hatü David nyi phei kü mühünya, Joab phei kü mütuh” shei e.

¹² Amasayü iy lüptü lem jiamei shükshi nyu, hatü hapa shennyaki Joabei veshanthü kemei hatouei yaongshi nyupü ee. Mechem büpai Amasa touei peipü peü yaongshi nyüke shei nying, büpai büpa lem leipü kahlei shüei deitü ha shangkü ashak hüki jümphong.

¹³ Lem leipü Amasa shüei deitükpheikü shennyak peü Joab mü Bikrilei cheha Sheba phei changhen dai.

¹⁴ Sheba-i Israel jatthü peü homei Abel-Beth kahdok Maakah chingnyü ngoi, hatü Bikri am peü thaitü büpa phei mü.

¹⁵ Joab mü nyupü veshanthü peü peiyei Abel Beth kahdok Maakahlei Sheba shümteke. Jomi chingnyü thahshi kahdok shaokei an hatü chingnyü bham laamhühen kahdok thukteke.

¹⁶ Hahepak kü chingnyü mongeipü kon kohpü nyüha hüki, “Bangtuh! bangtuh! ‘Hatouei heihkei ngei nüng mü shah eteihüangke’ shei Joab kü etuh” shei nyük.

¹⁷ Büpai pinnyü yopailei heih, hatü hapa nyühai, “Nüngü Joab je?” shei phe. Büpai, “Hih” shei e. Hahepak kü pinnyüi, “Nüngei chongphobüi epü shahthü kü bangtuh!” shei e. Büpai, “Ngei bangnyüpeih” shei e.

¹⁸ Hahepak kü pinnyüi, “Aivang den mü jomi, ‘Abel chingei heihei phetuh hatü haleipü jangpü yahtuh’ shei ehampeih, hatü hapakei jomi dükhampeih” shei e.

¹⁹ “Ngeiyü Israel kü chingmei, hatü shahhing kü bampü khongkü hük hih; nüngi Israel kü nyü vaipü chingnyü hük mangtüknüng khenyu je? Mehekei nüngi Shembüpalei mükjüp lühtüknüng khenya?” shei e.

²⁰ Joabi jangei, “Ngei hapa chingnyü lühtükhen nevaijü mahtükhen shei deihpü nevaipih!

²¹ Hapakei nevaipih! Shejao phaüshang kahmük Ephraim leipü Bikrilei cheha Sheba shei menpü shennyaki David ongpa khüei yaongnyüke. Hapa shennyak mon yepei yahshih, shejema ngei hapa chingnyü leipü leidaiphahen” shei e. Hapa nyühai Joab kü, “Pe daüei büpalei shangjing dakei shükphahen hih” shei e.

²² Hahepak kü hapa nyühai longi kon kohshi chudeih shuoh-ei jomei shennyakthü kü eyei dai, hatü jomi Bikrilei cheha Shebalei shangjing dakei Joab kü shükshuohteke. Hanangkü büpai amit vüngtü büpai büpalei shennyakthü chingnyü leipü yanhütük, hatü peüi laophülei shem yemei leidaikem, hatü Joabü Jerusalemei ongpa touei leiteke.

²³ Joab-ü Israel veshanthü peü shak kü mübü vai; Jehoiadalei cheha Benaiahyü Kereth hatü Peleth am shak kü mübü vaiteke.

²⁴ Adoniramü dou dükpüthü kü hienbü vai; Ahiludei cheha Jehoshaphat-ü nyangbü vai;

²⁵ Shevayü laknyangbü vai; Zadok hi Abiathar nyi-ü ngongpa vai,

²⁶ hatü Jair am Irayü Davidei ngongpa nyuteke.