2 SAMUEL 19 - DAÜLANGPÜ LAIHING (BSI)

Joabi David kü Lohpü

¹ “Ongpai Absalom nangkü thepei youngnyüke” shei Joab kü eshuoh.

² “Ongpai cheha nangkü mahng thepnyüke” shei epü danei ha nyih vehok neüpeyü veshanthü peü shingvaishi mahng theppü nyih leidai.

³ Veshanthü mih toueipü nyemei nyaiyei leipükei veshanthü kemei ching yemei joei leikemteke.

⁴ Ongpai büpalei dhe kü jümtü wongmü lenei, “Oh ngelei ha Absalom! Oh ngelei ha, Absalom! Ngelei ha! Ngelei ha!” shei thep.

⁵ Hahepak kü Joabi ongpalei shemei peiyei, “Shinnyih nüngi nüngei yangnyu, nüngei hapeüthü, nüngei nyühathü hatü nüngei yiükphüthü yangpü nüngei shennyakthü hai danghüteke;

⁶ mehenangkü nüngi nüng kü jiühitpüthü kü bam, nüng kü bampüthü kü jiühitteke. Shinnyih nüngei dou homei nüngei veshan mübüthü hatü shennyakthü-ü nadang neshiü shei lekei huteke. Shinnyih ham peü didaitü Absalom yemmü nyulangmeyü nüng mongonghen vaipü khih.

⁷ Hanangkü nüng chem vamei nüngei chongphobüthü kü mongyang shah eyeishuoh. Shembüpalei men kü ngei vangei enyeih, nüngi hapakei nedükjema sheya nyakpü thahshi üpa shennyakao nüng mü nenyuküpih. Nüng hashih hepak kübü shaang thahshi peipü shanghah peü mü hapa-üng peü mü nemeipüba chongkahen” shei e.

⁸ Hanangkü ongpai yaongei büpalei uoshing yah-ei peshadenei uo. Mechem shennyakthü kü, “Ongpa uoshi nyüke” shei eshuohpa, jom peü büpa touei pei. Hahepak kü Israel am kemei laophülei shemei nyaiyei leiyei nyu.

David Jerusalemei Leipü

⁹ Israel jatthü peülei nanglakthü kemei, “Ongpai jenei vepathülei lak kübü jen yangpeih, hatü büpai jen Philistia amei lak kübü yangpeih shejao büpai cheha Absalom tata kü hapa kahdok leipü paüei daiyei nyüke.

¹⁰ Shejao jen kü ong nyemvaikei shei jehahpü Absalomü vehokei daiyei mahdaiteke. Hanangkü mehekei shaang ongpa müei leihen meheyao ne-enya shei jom deteke.”

¹¹ David ongpai Zadok hi Abiathar ngongpa nyi kü shah shomei, “Judah am behethü kü, ‘Mehekei ongpa büpalei shemei müei leihen nangkü amphongang peü mü shompü vaihenang? Israel ami eteipü kemei ngei thahteke.

¹² Amphongü ngelei jeihinaü, ngelei iy hatü ngelei phai. Hanangkü ongpa müei leihen nangkü amphongang mehekei shompü shennyak vaihenang? shei etuh’ ” shei e.

¹³ Davidi Amasa kao, “Nüngü ngelei iy hatü ngelei phai nevaipü je? Shaang mü leitü Joab nangjei nüng ngelei veshan mübü nevaihüjema Kahvangi ngei kao ha mü nyeishi nyemdükpha” shei e.

¹⁴ Amasa-i Judah am shennyak kemei mong hük mü, hatü ongpa kü, “Nüng hatü nüngei shennyakthü peü leikei” shei shah shom.

¹⁵ Hahepak kü ongpai Jordan thahshi nyokei lei, hatü Judah shennyakthüi ongpa ombaongei Jordan homei leihen shingvaishi Gilgal thahshi dai.

¹⁶ Geralei cheha Shimei Bahurim leipü Benjamin am David ongpa ombaonghen Judah am mü shülangi layaong.

¹⁷ Büpa mü Benjamin am haja hük, hatü Saulei shemei chongphobü Ziba, hatü büpalei hapeüthü jom anpünga hatü chongphobüthü jom kukha mütü Jordanei ongpa touei shülangi heih.

¹⁸ Jomi yung taenshing mü yung homei ongpalei shem am mühen hatü büpai napü dükhen shingvaishi dai. Mechem Geralei cheha Shimei Jordan homei heihpa, büpa ongpa touei aümei sha,

¹⁹ hatü büpa kü, “Ngelei shembü ongpa, nüng Jerusalem tuhtü daipü nyih nüng chongphobü ngei nüng kü nejiüi dükpü kü mang tükshih, hatü nüng hapa deihshi techongkei. Ongpai hapa betüktuh.

²⁰ Ngei nüng touei mang thahteke shei nüngei chongphobüi nyingteke, shejao shinnyih ngei Joseph am shem peü kü shongpüba ngelei shembü ongpa mü pongteihen peikünyeih” shei e.

²¹ Hahepak kü Zeruiahlei cheha Abishai-i, “Shembüpai jepü ongpa kü thaüvaüjao ha tata kü Shimei tejütük” shei e.

²² Davidi, “Zeruiahlei hapeüthü, ngei mü am showsheipü mehe nyüpa? Shinnyih amphongü ngelei vepathü leiteke! Shinnyih Israel kü shennyak hanei jühen je? Ngei shinnyih Israel amei ongpa hih shei ngei nenyingnyu je?” shei e.

²³ Ongpai Shimei kü, “Nüng nedipih” shei e, hatü ongpai büpa kü vangpüshuwpü shuoh.

²⁴ Saulei chehü Mephibosheth-i ongpa mü pongteinüng yiü. Büpai la nephu, jumum nekup, nevaijü ongpa Jerusalem leipü lüdaipü manglei thahshi büpai ashakviha nedhu.

²⁵ Mechem büpa Jerusalem leipü ongpa mü pongteinüng heihpa, ongpai büpa kü, “Mephibosheth, nüng mehekei ngei mü nedaiküpa?” shei phe.

²⁶ Büpai ongpa kü, “Ngelei shembü ongpa, nüngei chongphobü ngeiyü la mangdaipü nangkü, ‘Ngei nüng mü daiaokhen shingvaishi gadu kü uotü daishah’ shei ngei büpa kü epeih, shejao ngelei chongphobü Ziba-i ngei kü lupeih” shei e.

²⁷ “Ngelei shembü ongpa touei büpai ngei kü lupeih. Ngelei shembü ongpayü Kahvangei phongshan kei nyüke; hanangkü nüng kü meipükei düktuh.

²⁸ Ongpa touei opa am shemü jütükhen mon nyupeih, shejao nüngi nüngei chongphobü kü nüng mü nükdü hük kü hahhen hanteke. Hanangkü ongpa shao yühen mü ngei mehe jiüpü nyüpa?” shei e.

²⁹ Ongpai büpa kü, “Nüngei nang hajük kü ehen neshiüpih. Ziba anji aa kü kahdok hanteihen ngei temtüktü nyüpeih” shei e.

³⁰ Mephibosheth-i ongpa kü, “Büpai peü nyemyahhah; ngei shingvaishiyü ngelei ongpa meishi leiküphei keyü changpeih” shei e.

Davidi Barzillai kü Bampü Hupü

³¹ Gilead am Barzillai Rogelim leipü ongpa kü Jordan thahshi yomhen yiü.

³² Barzillaiyü viüei bong büali nyuteke. Büpa longi shemmei vaipü nangkü büpai David Mahanaimei nyushi hahying shuoh.

³³ Ongpai Barzillai kü, “Ngei mü Jerusalemei leishah, hatü ngei nüng kü junghen hih” shei e.

³⁴ Shejao Barzillai-i ongpa kü, “Jerusalemei ongpa mü leiyei ngei vangbong meshük nyukününg!

³⁵ Ngei sheyü vangbong büali lomdaiteke. Mehe mei hatü ten ngei baong hanei eaokhen je? Ngei mehe hahnya hatü yingnya, ha ngelei jui nenyingaoknyu. Ngei nethe nelathüi lokpü haipü danaokhen je? Ngei leihahpai nüng shing hanggovih-ang vaikahen hih.

³⁶ Nüng chongphobüi ongpa mü Jordan homei kanja hük mon heihkahen, shejao ongpai ngei kü hapa keipü laklei mehekei yahphahenang?

³⁷ Ngei ngelei nyushingei onyü opa amei mahngchong yopailei dihen shingvaishi nüngei chongphobü nyokei leishihte, shejao halei nüngei chongphobü Kimham nyüke. Büpa ngelei shembü ongpa mü nyemleikei, hatü nüng kü mepa mei, ha büpa kü dükeishuoh” shei e.

³⁸ Ongpai, “Kimham ngei mü nyemleikei, hatü nüng kü mepa mei, ha ngei büpa kü dükhen, hatü nüngi ngei leipü napü peü nüng leimao ngei büpa kü dükhen” shei e.

³⁹ Hapheikü David hatü nanglakthü peü Jordan homei lei. Ongpai Barzillai kü om kü jüptü moihimanshuoh, hatü büpa laophülei shemei leidai.

⁴⁰ Mechem ongpa Gilgal hompa, Kimhamao büpa mü lei. Judah veshanthü kemei, hatü Israel veshanthü hükkei shingi ongpa müei lei.

⁴¹ Hahepak kü Israel am kemei ongpa touei peiyei büpa kü, “Mehekei hamei jeihinaü Judah shennyakthüi ongpa hatü büpalei shem am, hatü Davidei shennyakthü Jordan homei jomi mon yomshi müei daipa?” shei e.

⁴² Judah ami Israel am kü, “Ongpayü ham mü yopü shem am hih. Hapa nangkü mehekei ammi lohnya? Hami ongpalei hahying hahpü je? Nevaijü büpai ham kü thintho shuohpü je?” shei jangei e.

⁴³ Shejao Israel ami Judah am kü, “Hamphongü ongpa mü phaihan an nyüpeih. Mehekei ammi ham kü ne-ienelemnya? Ongpa müei leihen nangkü shongei eyei pangpeyü ham nevaipü je?” shei jangei e. Shejao Israel am leimeyü Judah am nyeishi shahlong eteke.