2 SAMUEL 16 - DAÜLANGPÜ LAIHING (BSI)

David hatü Ziba Nyi

¹ Mechem Davidi shangtao maani homei heihjapa, Mephiboshethlei chongphobü Ziba büpa mü pongteinüng danei nyu. Büpa mü gadu nyi kü aan pha kho nyi, nyalingngupai vani lingpü aan kho hük, hatü betjükchoung kho hük hatü yiü-üm hük kotü nyuteke.

² Ongpai Ziba kü, “Mehekei nüngi hathü koei peiküpa?” shei e. Ziba-i, “Gadu-ü ongpa am shemi uoteihen shingvaishi, aan hatü betjükü ongpalei shennyakthüi hahhen, hatü yiü-ü jahpanei nyiueinangei nyupüthüi yinghen deiküpeih” shei e.

³ Ongpai, “Nüngei shembülei hapeü melei nyüpa?” shei phe. Ziba-i büpa kü, “Büpayü Jerusalemei nyüke; mehenangkü büpai, ‘Shinnyih Israel phangi ngei kü obülei ongching nyokei yahphahen shei eküpeih’ ” shei e.

⁴ Hahepak kü ongpai Ziba kü, “Mephibosheth-i angpü kemei nüngei vaihen” shei e. Ziba-i, “Ngei nüngei chongphobü, ngei düngei nüngi monghahshi nyuhen” shei e.

David hatü Shimei

⁵ Mechem David Bahurim ngoipa, Saul am phang shennyak hük Geralei cheha Shimei vamei David kü thaüvaüteke.

⁶ Veshanthü hatü yombüthü Davidei laknyong lakdah shinei nyulangmao büpai David hatü ongpalei veshanthü kü yaongi shük.

⁷ Büpai David kü thaüvaüshingkü, “Leidaituh! Leidaituh! shennyak jüteipü shennyak! Yahlak neshiüpü shennyak!

⁸ Nüngi Saulei ongching yahlangpeih; shaang Saul am shem iy yenhüpü nangkü Shembüpai nüng kü bhüh yemnyu khihma. Shembüpai nüngei ongching anha Absalom kü shuohtüktü nüngü ponghahnyu khihma; mehenangkü nüngü hangku iy yenhüpü shennyak” shei e.

⁹ Hahepak kü Zeruiahlei cheha Abishai-i ongpa kü, “Mehekei hapa shimahngi ngelei shembü ongpa kü hajük thaüvaühenang? Ngei heih-ei büpalei shangjing daklangküshah” shei e.

¹⁰ Shejao ongpai, “Zeruiahlei hapeüthü, ngei am mü sheishowpü mehe nyüpa? Shembüpai, büpa kü, ‘David kü thaüvaütuh’ shei eshuohpü kü epü vaijema üpai ‘Mehekei nüngi hapakei düknya? shei eaokhen’ ” shei e.

¹¹ Davidi Abishai hatü büpalei chongphobüthü peü kü, “Ngelei hapeü dangkao ngei jühen yemjü Benjamin ami neyemhen je? Büpa hei-üng nyemnyu, hatü büpai nyemthaüvaü; mehenangkü Shembüpai hapakei dükhen eshuohpü khih.

¹² Shembüpai ngelei shanghah kü veihen hatü shinnyih ngei hapa thaüvaü dangpü shing lemhük meipü nyokei yahphahen aokpeih” shei e.

¹³ Hanangkü David hatü büpalei shennyakthü leidaishingkü Shimei jom mü shangching lemei müshi daiyaki thaüvaüei yaong hatü kübhihyaongphang homei jomphong kü shükyaki dai.

¹⁴ Ongpa hatü büpalei shennyakthü Jordan ngoishingkü longi nyiueinangei ngoi, hatü halei büpa nyiumei.

Absalom Jerusalemei Nyupü

¹⁵ Shaang Absalom hatü Israel am kemei Jerusalem ngoi hatü Ahithophelao büpa mü nyu.

¹⁶ Hahepak kü Ark am Davidei mongjempa Hushai-i Absalom touei peiyei, “Ongpa den lushi nyutuh! Ongpa den lushi nyutuh!” shei e.

¹⁷ Absalomi Hushai kü, “Laophülei mongjempa kü bampü hupeyü ha je? Nüngei mongjempa mü mehekei nedainya?” shei phe.

¹⁸ Hushai-i Absalom kü, “Hapakei nevai, Shembüpa hatü büpalei nanglakthüi hatü Israel am kemei-i üpa jenya, ngeiyü büpalei vaihen, hatü ngei büpa mü nyuhen.

¹⁹ Ha mü lenei ngei üpa chongphohen? Ngei cheha chongnephohen je? Ngei ampa chongphopü keiha ngei nüng chongphohen” shei e.

²⁰ Absalomi Ahithophel kü, “Mehe dükhen? Nüngi deihpü shahnyingao ekütuh” shei e.

²¹ Ahithopheli, “Ongshem veihen shingvaishi ampai nüng mü tuhphongpü yiükphüthü mü shituh. Hahepak kü ampai nüng mü vepa leidaiteke shei nyinghen, hatü nüng mü nyupüthüi monglonghen” shei e.

²² Hanangkü jomi jom shing shem adokei ashakshem hük ve, hatü büpai Israel am peüi eeshi chepalei yiükphüthü mü shi.

²³ Hathü nyih kü Ahithopheli epü shahnyingü Kahvangei shah kei yahhamteke. Hanangkü David hatü Absalom nyipheni Ahithophelei shahnyingü vihyaki yah.