2 SAMUEL 15 - DAÜLANGPÜ LAIHING (BSI)

Absalomi Khüei Yaongpü

¹ Hapheikü Absalomi laophü shing koyei kharithü, koyeithü hatü shennyak pinyipüan büpa shekü daihen tem.

² Büpai nepnüng dhom mü lomi paoei chingnyü penyüsha lemei aongpü lemhaoei yaongtü mechem shennyak hanei-i ongpa touei shahphenhen mü shahhidou koei peijahenshang Absalomi büpa kü nyüktü, “Nüng mepa shingeipü peikünya?” shei phehamteke. Mechem hapa shennyaki, “Nüngei chongphobü Israel jat hapa hapa leipü peiküpeih” shei eshuohhenshang,

³ Absalomi, “Veituh, nüngi epeyü meiangke, hatü jiüangke shejao nüngi epü bangei dükphahen ongpai üpayao jeyei neshiü” shei ehamteke.

⁴ Absalomi shao, “Kahdok kü shahphenbü vaishi ngei kü jephülangmeyü ngei büpa kü jiüpü shahphen shuohaokhen” shei üei eteke.

⁵ Mechem hanei ami Absalom touei aümei shajahen, büpalei lak kü düktü anei ju kü jüphamteke.

⁶ Absalomi hapa keiha ongpa touei jiüpü shahphenpü yahhen peijajü Israel am peü kü hapakei dük, hatü Israel nanglakthülei mong yawhlangteke.

⁷ Vangbong ali pheikü Absalomi ongpa kü, “Ngei Hebronei heihshah, hatü ngei Shembüpa kü lahtükpü dükshah.

⁸ Mehenangkü nüngei chongphobü ngei Aram kahdok Geshurlei nyushi Shembüpai ngei Jerusalemei nyokei leijema Hebronei Shembüpa kü khümhen shei lahpeih” shei e.

⁹ Ongpai büpa kü, “Meishi heihte” shei e. Hanangkü Absalom Hebronei heih.

¹⁰ Hapheikü Absalomi Israel jatthü peü touei joei phongmokbüthü shomei, “Amphongi amit ngeü danhinüng, ‘Absalomü Hebron ongpa’ shei lentuh” shei e.

¹¹ Jerusalem leipü Absalom mü shennyak kho nyi heih; jomphongü yenpa kü kei nyükshuoh-i mehe vamhen ha nenyingi heih.

¹² Mechem Absalomi moila shuohpa, büpai David mü shahnying eteipü Giloh jila leipü Ahithophel kao nyüknüng shom. Ongpa khüei kon lingpü wong kohpüba lei, hatü Absalom phei müpüthü nyeipüba leiteke.

David Jerusalem Leipü Lüdaipü

¹³ Phongmokbü hük David touei leiyei, “Israel nanglakthülei mong kemei Absalom pheikü lepdaikemteke” shei e.

¹⁴ Hahepak kü Davidi büpalei lakchongbüthü büpa mü Jerusalemei nyupüthü kü, “Temtuh, jen peü nyaidaishah, hei nevaijema Absalom toueipü yanglem neshiü. Jen lomi lüdaishah, hei nevaijema büpa lomi leiyei jen neütüktü hapa chingnyü kübü jen peü jütükhen khih” shei e.

¹⁵ Ongpalei lakchongbüthüi, “Hamei shembü ongpai mehe enya ha dükhen nüngei chongphobüthüi temei nyüpeih” shei e.

¹⁶ Hanangkü ongpai shem kü veihen yiükphü jom an mon tuhphongtü büpalei shem am peü mütü dai.

¹⁷ Ongpai büpalei nanglakthü peü mütü daiyei shompü shemei hakteke.

¹⁸ Büpalei lakchongbüthü, Kereth am, hatü Peleth am kemei, hatü Gath leipü Gath am shennyak kho vok peü kemei büpa phei müei dai, hatü büpa peih-ei dai.

¹⁹ Hahepak kü ongpai Gath am Ittai kü, “Mehekei amphongao ham mü daikünya? Nyokei leidaituh, hatü ongpa ja mü nyutuh; mehenangkü amphongü laophülei kahdok tuhtü peiyei nyupü kungpa shennyakthü mon.

²⁰ Amphongü menyih-üng peiyei nyupü mehekei shinnyih ngei mü amao nyaihühen? Ngei dangkao melei dainya nenyingi dainyu khih. Nüngei nanglakthü mütü nyokei leituh hatü Shembüpa bampü, hatü monglemaokpü am mü nyute” shei e.

²¹ Shejao Ittai-i ongpa kü, “Vanyangyem Shembüpalei men kü, hatü ngelei shembü ongpa nyupü thahshi, melei ngelei shembü ongpa nyuhen, dijao yangjao haleiüng nüngei chongphobü nyuhen” shei e.

²² Davidi Ittai kü, “Shejema shaa, dainüng” shei e. Hanangkü Gath am Ittai-i büpalei shennyakthü hatü büpa mü nyupü shemongthü peü mütü dai.

²³ Nanglakthü peü peih-ei daishingkü kahmük kempai wongmü thep; ongpayao Kidron kahji homei dai, hatü nanglakthü kemei yingnyü lemei dai.

²⁴ Ngongpa Zadokao halei nyu, hatü Levi am kemei büpa mü Kahvangei Vangpüshuwpü Pela paitü dai. Nanglakthü chingnyü leipü vamei mangdaikem thahshi Kahvangei Vangpüshuwpü Pela haüshi ang. Abiathar-ao halei haoshi nyu.

²⁵ Hapheikü ongpai Zadok kü, “Kahvangei Vangpüshuwpü Pela chingnyülei leiyei tuhphongtuh. Shembüpai ngei kü phahjiei deihjema, büpai ngei shao halei müei leihen, hatü ngei hapa Pela hatü büpalei nyushing eehühen.

²⁶ Shejao büpai, ‘Ngei nüng kü mong nehahnyih’ shei ejema, büpa kü mehe mei büpai ha ngei kü nyemdükpha; ngei temei nyüpeih” shei e.

²⁷ Ongpai shao Zadok ngongpa kü, “Nüngü hapeü Ahimaaz hatü Abiatharlei cheha Jonathan nyi nüng mü mütü chingnyülei meishi leituh.

²⁸ Ngei payü nüng leipü shah mangshompha thahshi jahpanei yung taenshingei chongkahen hih” shei e.

²⁹ Hanangkü Zadok hi Abiathar nyi Kahvangei Vangpüshuwpü Pela kotü Jerusalemei leiyei nyu.

³⁰ Shejao Davidü büpalei shangjing kü jümtü thepyaki lakong kamei Olive Kahshangei aongei nyu. Büpa mü nyupü nanglakthü kemei shangjing kü jümtü thepyaki aong.

³¹ Mechem David kü, “Ahithophelao Absalom mü omshi nyükeja” shei eshuohpa, Davidi, “Oh Shembüpa, Ahithopheli epü shahnyingthü kemei ngashahyoishah leitükhütuh” shei phop.

³² Mechem David shangtao ngoipa, büpai Kahvang kü khümei nyushingkü Ark am shennyak Hushai büpa mü pongteinüng büpalei bhagthuh-ao shaaktüktü shangjing kü kahdok nyiotü pei.

³³ Davidi büpa kü, “Nüng ngei mü daiküjema ngei shingvaishi hanggovih vaihen khih.

³⁴ Shejao nüng chingnyülei nyokei leiyei Absalom kü, ‘Oh ongpa, ngei nüngei chongphobü vaiküshah; peihdaipü hepak kü ngeiyü ampalei chongphobü vaihampeih, shejao shaang ngei nüngei chongphobü vaiküshah’ shei eyeishuoh. Shejüang Ahithopheli epü shahnyingthü kemei kü ngei leimao nüngi aokpü danghen.

³⁵ Zadok hatü Abiathar ngongpa nyi halei nüng mü nyukahen. Hanangkü nüngi mehe mehe ongpalei shemei eteipü danhenshang Zadok hi Abiathar ngongpa nyi kü eyeishuoh.

³⁶ Zadokei cheha Ahimaaz hatü Abiatharlei cheha Jonathan nyiyao jiji mü halei nyüpeih, hatü jom homei nüngi danpü kemei ngei kü shah-om nyemyahpha” shei e.

³⁷ Hanangkü Davidei mongjempa Hushai chingnyülei leiyei Absalom Jerusalemei ngoipü hepak kü jiüshi ngoi.