2 SAMUEL 14 - DAÜLANGPÜ LAIHING (BSI)

Absalom Jerusalemei Leipü

¹ David ongpai cheha Absalom deih-ei ongyangnyüke shei Zeruiahlei cheha Joabi nying.

² Joabi Tekoalei shomei kon kohpü nyüha hük müei lei. Büpai pinnyü kü, “Mahng theppü ashak ümtü mahng theppükei lingtuh; melivungla meheyao tenyio, shejao dipü am kü nyih longi mahng thepei nyupükei lingtü,

³ Ongpa touei peiyei hathü shah hapakei eyeishuoh” shei e, hatü mehe ehen Joabi pinnyü kü ventü deishih.

⁴ Hapa Tekoa am nyühai ongpa touei peiyei büpa kü dhüm shuohei kahdokei dhe aümei shatü, “Oh ongpa, ngei kü sheühshih” shei e.

⁵ Ongpai pinnyü kü, “Nüngei shanghah meheang?” shei phe. Pinnyüi, “Ngelei baha didai; ngeiyü sheyü vaümnyü khih.

⁶ Nüng chongphobü ngelei yeshang nyi nyuhampeih, hatü nyih hük kahlei üpaiyao jiji kü banghen neshiüi deyei hüki hükpa kü baptü jütük.

⁷ Shaang phang kemei nüng chongphobü khüei yaongnyüke. Jomi laophülei jeihinaü jüpü shennyak hamei lak kü yahkei; hamiyao büpa jütükhen shei enyüke. Jomphongi hapakei ngelei hapeü hük mon aoei nyupao jütüktü ngelei bahalei men neshiüi kahdok shak kübü ngelei bahalei li hümtükhen khih” shei e.

⁸ Ongpai hapa nyüha kü, “Shemei leiyei chongkei, hatü ngei nüngei men kü ngeükhüam hük yahphahen” shei e.

⁹ Shejao Tekoa am hapa nyühai büpa kü, “Oh ngelei shembü ongpa, pungpü kemei ngei hatü opalei shem am kü nyemhet, shejao ongpa hatü büpalei ong uoshingü pungpü neshiüi nyemnyu” shei e.

¹⁰ Ongpai jangei, “Nüng kü hanei ami lemhük dangkao ephüjema, büpa ngei touei deikei, hatü büpai hajükü nüng kü meheyao ne-ephapih” shei e.

¹¹ Pinnyüi, “Bhüh yempü ami ngelei hapeü nejütükhen shingvaishi ongpai Shembüpa nüngei Kahvang kü phopshih” shei e. Büpai “Vanyangyem Shembüpalei men kü enyeih, anhalei sholah hükao kahdokei nevüshihpih” shei e.

¹² Shejema, “Nüngei chongphobüi ngelei shembü ongpa kü shah hük eküshah” shei hapa nyühai e. Büpai, “Etuh” shei e.

¹³ Hapa nyühai, “Kahvangei nanglakthü khüei hapakei dou dükhen mehekei temnya? Nüngi hapakei shaang epü shah-i nüng nyingi nyonghahnyüke; nüngi laophülei hapeü laongei daiyei nyupü mehekei neleinya?

¹⁴ Kahdokei haitükpü yung nyipabü nethaiaokpükei jen peü didaihen. Shejao Kahvangi yangnyu yah-ei nelüdaiang; büpa toueipü yanei lüdaipü shennyak düngei büpa mebü yanei neanghen shingvaishi lem yemnyüke.

¹⁵ Shaang ngelei shembü ongpa kü hapa ehen peiküpeih; mehenangkü shennyakthüi ngei kü nyem shaopeih, hatü nüngei chongphobüi, ‘Ngei ongpa kü hapa ehen; üpai nyingpa, ongpai laophülei chongphobüi phepü dükphahen.

¹⁶ Mehenangkü ongpai bangtü ngei hatü ngelei hapeü Kahvangi shuohpü mükjüp kübü jütükhen shei epü shennyak leipü laophülei chongphobü yangphahen shei deihnyüpeih.’

¹⁷ Nüngei chongphobüi, ‘Ngelei shembü ongpalei shah-i ngei nyiushem meihühen; mehenangkü ngelei shembü ongpayü Kahvangei phongshan kei mang hi mei kemei nyingaoknyüpeih. Shembüpa, nüngei Kahvang nüng mü düngei nyutuh’ ” shei e.

¹⁸ Hahepak kü ongpai hapa nyüha kü, “Ngei mehe phehenshang jiüshangi shahnyok neshuoh-i tetuhlang” shei e. Hapa nyühai, “Ngelei shembü ongpai etuh” shei e.

¹⁹ Ongpai, “Hathü shahhidou kü Joabei ju shüei nyüpü hiang?” shei phe. Hapa nyühai jangei, “Ngelei shembü ongpa yemmü nyupü thahshi ngelei shembü ongpai epü kübü üpayao nyonghidah kü lepteihen neaokpih. Hih, hapayü nüngei chongphobü Joabi hapa dükhen ephopeih hatü büpai-üng ngei mehe ehen kemei ephopeih.

²⁰ Nüng chongphobü Joabi hapa shahhidou yeiyahühen shingvaishi ha dükpeih. Shejao ngelei shembü kü Kahvangei phongshan kü nyupü kihikon keiha kahmük kü mehe vamnya lemphü nyingnyüpeih” shei e.

²¹ Hapheikü ongpai Joab kü, “Meiteke, ngei hapa dükhen”. “Daituh, hatü nethepa Absalom müei leikei” shei e.

²² Joabi dhüm shuoh-ei David touei kahdokei dhe aümei shatü ongpa kü moihimanshuoh. Joabi, “Ngelei shembü ongpa, shinnyih nüngei chongphobü kü nüngi monghahnyüke shei nyingteke; mehenangkü ongpai laophülei chongphobüi phepü shuohteke” shei e.

²³ Hapheikü Joabi Geshurlei heih-ei Absalom müei Jerusalemei lei.

²⁴ Shejao ongpai, “Büpa büpalei shemei leiyei nyuhütuh, büpa ngei mü tepongteihü” shei e.

²⁵ Shaang Israel kempü kü Absalom nethe meipü jung vih-ei epükei üpayao ehen mü nenyu. Shangnyüshang kübü lajaang laishi ajükao eelashing neshiüi meishi nyuteke.

²⁶ Mechem büpai sho japhenshangkü büpai hepak hepak kü sho longi vih-ei leijü mon japhamteke, hatü hapa japtükpü shuo dokshuohjü ongpalei dok aimü dok nyi nyuhamteke.

²⁷ Absalomei hapeü nethe jem hatü nela hük nyu. Hapa yiükhalei menü Tamar, hatü pinnyü nela longi meishi nyu.

²⁸ Absalomi ongpa mü nepongtei-i vangbong nyi thahshi Jerusalemei nyu.

²⁹ Hahepak kü Absalomi ongpa touei Joab deishihnüng shei nyüknüng shom, shejao Joab büpa touei nepeija. Hanangkü büpai shao nyipabü nyüknüng shom, shejao büpa nepeija.

³⁰ Hahepak kü büpai büpalei chongphobüthü kü, “Veituh, Joabei barley kah ngelei kah yopailei nyüpeih. Halei heih-ei aw hapeishuoh” shei e. Hanangkü Absalomei chongphobüthüi kah kü awi hapshuoh.

³¹ Haphei küang Joabi Absalomei shemei heih-ei, “Mehekei nüngei chongphobüthüi ngelei kah kü awi happhopa?” shei phe.

³² Absalomi Joab kü, “Veituh, ngei nüng ongpa touei shomei, ‘Mehekei ngei Geshur leipü leipa? Ngei shingvaishi antolei nyupüang meihen vaipü khih. Hanangkü ngei shaang ongpalei dhe eehüangke, hatü ngei lemhük dangkao pungpü vaijema büpai ngei nyemjütük shei eshuohnüng ngei nüng büpa touei shomhen nyüknüng deiphopeih’ ” shei e.

³³ Hanangkü Joab ongpa touei peiyei büpa kü ha jung eshuoh. Hahepak kü ongpai Absalom kü nyük, hatü büpa peiyei ongpa touei kahdokei dhe aümei sha hatü ongpai Absalom kü om kü jüpteke.