2 SAMUEL 13 - DAÜLANGPÜ LAIHING (BSI)

Amnon hi Tamar Nyi

¹ Davidei cheha Absalomei chenaü hük longi nela meishi nyu, hatü pinnyülei menü Tamar nyu, hatü Davidei cheha Amnoni pinnyü longi lümpü nangkü,

² büpai laophülei naüpeü Tamar deih-ei mongshangei tüngteke; mehenangkü pinnyü-ü pai mü ngühpü nela, hatü pinnyü kü lemhük kei dangkao dükhenü büpa shingvaishi neaokbenüng nyuteke.

³ Shaang Amnonei mongjempa hük Davidei chenaü Shimeahlei cheha Jonadab shei nyu. Jonadabü longi nahpü shennyak hük nyuteke.

⁴ Büpai Amnon kü, “Nüngü ongpalei ha hih shei nepjeih dheha ne-aongi mon eenyüke. Nüngi ngei kü ha ne-ephahen je?” shei phe. Amnoni büpa kü, “Ngei ojeilei chenaü Tamar longi lümangke” shei e.

⁵ Jonadabi büpa kü, “Nüngi nüngei shinshingei lemtuh, hatü tüngpükei hutuh, hatü mechem ampa-i nüng kü veinüng peikahen, nüngi büpa kü, ‘Ngelei naüpeü Tamar-i lemhük hahhen nyemyahpha, pinnyüi ha ngei eeshi nyemcheü hatü ngei ha kü veitü pinnyülei lak leipü hapa hahhen hih’ shei eyeishuoh” shei eteke.

⁶ Hanangkü Amnonü tüngpeih shei güh bheyei lemshi nyu. Mechem ongpai büpa kü veihen peijapa, Amnoni ongpa kü, “Chingmeilemlingei naüpeü Tamar ngei touei peiyei ngei hahhen aan nyemlingpha hatü ngei pinnyülei lak kübü ha hahhen hih” shei e.

⁷ Hanangkü Davidi ongshemei Tamar kü shah shomei, “Anjei Amnonei shemei heihtuh, hatü büpa kü hahying hanei lingeishuoh” shei e.

⁸ Hanangkü Tamar-i chejei Amnonei shemei büpa lempü touei heih. Pinnyü-i aan nyetpü hanei yah-ei ngümtü büpai eeshi aan lingteke.

⁹ Hapheikü pinnyü-i nükshung kü aan shihtü büpa kü shuoh, shejao büpai nehahpih shei e. Amnoni, “Hatoueipü shennyakthü peü deitüktuh” shei e. Hanangkü peü büpa toueipü lüdaikem.

¹⁰ Hapheikü Amnoni Tamar kü, “Aanü shiteipü dungamei shükei; halei ngei hahhen hih” shei e. Hanangkü Tamar-i pinnyüi lingpü aan yah-ei chejeilei shinshingei shüjateke.

¹¹ Shejao mechem pinnyüi büpa yopailei aan shuohhen heihjapa, büpai pinnyü kü khaaitü pinnyü kü, “Naüpeü, heihkei, ngei mü lüngei lemkütuh” shei e.

¹² Pinnyüi, “Ojei, tah, ngei kü hapakei tenyeankei; mehenangkü henüng keipü dou Israel kü nedüknyih; nüngi henüng dou ten tedükkei.

¹³ Ngei shingvaishiyao henüng veü mekei etü koaokhen? Nüng shingvaishiyao nüngü Israel kü peü mü nemeipü shennyak leihen. Chingmeilemlingei ongpa kü eshuohhü, büpai ngei nüng mü shem yemhen kü tah sheiyü ne-ekahen” shei e.

¹⁴ Shejao büpai pinnyüi epü nebang; hatü pinnyü mü büpaüng wong kohpü nangkü büpai kangei pinnyü mü shi.

¹⁵ Hapheikü Amnoni pinnyü kü longi jiühit. Büpai pinnyü kü bampü mao nyeishi jiühit. Amnoni pinnyü kü, “Paoei lüdaituh!” shei e.

¹⁶ Shejao pinnyüi büpa kü, “Ojei, anyoh, nüngi ngei kü dükpü dou meyü ngei deishihtükpü hapa-üng nyeishi nemeipeih” shei e. Shejao büpai pinnyüi epü nebang.

¹⁷ Büpai büpalei chongphobü nyükei, “Hapa nyüha hatoueipü shüei ngaitüktuh hatü pinnyü ngaitüktü sha küpshih” shei e.

¹⁸ Hanangkü büpalei chongphobüi pinnyü ngaitüktü sha küp. Pinnyü-ü büm-ow bhagthuh lushi lak-üng thahshi thuhshi nyu; mehenangkü ongei yiükha pai mü ngühpü nela-i hapakei owhamteke.

¹⁹ Tamar-i pinnyülei shangjing kü depla nyio, hatü pinnyüi owshi nyupü bhagthuh lupü shaaktüktü pinnyülei laki shangjing kü düktü thepyaki leiteke.

²⁰ Chejei Absalomi pinnyü kü, “Anjei Amnon nüng mü nyupü je? Shaangü nenmü chongkei, naüpeü, büpayü anjei khih; nüngi mong kü ahshi nemei-i tedeih” shei e. Hanangkü Tamar-ü chejei Absalomei shemei ie kü neshihpü shennyak kei nyu.

²¹ Mechem David ongpai hathü douthü jung danpa, büpa longi mongshih, shejao büpai Amnon kü hanghi neshuoh; mehenangkü büpayü hashongpa vaipü nangkü büpai büpa kü bamteke.

²² Shejao Absalomi Amnon kü tenao ne-e, meiyao ne-e; mehenangkü chenaü Tamar kü douten dükpü nangkü Absalomi Amnon kü longi jiühit.

Absalomi Amnon Jüpü

²³ Vangbong nyi daipheikü Absalomei mimum jappüthü Ephraim viong yopailei Baal Hazorlei nyushi büpai ongpalei yeshangthü peü kü nyükteke.

²⁴ Absalomi ongpa touei peiyei, “Nüng chongphobüthüi mimum japhen shennyakthü dangteke; hapa kü ongpa hatü nüngei chongphobüthü ngei mü deiphaüla?” shei phe.

²⁵ Shejao ongpai Absalom kü, “Anyoh, ngelei hapeü, ham peü payü nedaiküshah; nüng kü ahshi hanggovih vaihen khih” shei e. Büpai büpa kü nyean, shejao büpa nedai-i moihiman mon shuohteke.

²⁶ Hapheikü Absalomi, “Hapakei-üng ejema naüpeü Amnon dangkao ngei mü nyemdaikei” shei e. Ongpai büpa kü, “Mehekei büpa nüng mü deihahhenang?” shei e.

²⁷ Shejao Absalomi büpa kü Amnon hatü ongpalei yeshangthü peü daituh shei mang-e thahshi longi nyeanteke. Absalomi ongpa hüki tempükei mo tem.

²⁸ Hahepak kü Absalomi büpalei chongphobüthü kü, “Amnoni mechem yiüi chokei mongongshi chongkahen veituh, hatü mechem ngei amphong kü, ‘Amnon jütuh’ shei ephahenshang, büpa jütuh. Am tenyem; ngei ngeükhüam shuohnyeih; monglongtuh hatü wong kohtuh” shei e.

²⁹ Hanangkü Absalomei chongphobüthüi Amnon kü Absalomi epükei dük. Hahepak kü ongpalei yeshangthü kemei laophülei gadu kü uotü nyaidaikem.

³⁰ Jom leipü lemei nyushi David touei, “Absalomi ongpalei hapeüthü peü hükao ne-ao-i jütükkemtekeja” shei shahjang pei,

³¹ Ongpai yaongei büpalei ashak kemei shaaktüktü kahdokei lem, hatü büpalei chongphobüthüi jomei ashak kemei shaaktüktü büpa touei yaong.

³² Shejao Davidei chenaü Shimeahlei cheha Jonadabi, “Ongpa, nüngi hapeüthü kemei jütükteke shei tedeih; Amnon mon jüpüja. Amnoni chenaü Tamar kü douten dükpü nyih mebü pangei Absalomi dükhen shei deihshi nyupü dükpü khih.

³³ Anhapeüthü kemei jütükteke shei epü shahjang kü mongteshang; Amnon mon jüpüja” shei e.

³⁴ Shejao Absalom laongei lüdai. Shaang yomshi nyupü veshani ngangei veishuohshingkü khong longpü hük Horonaim lemeipü kahshang lemei leijaei ee. Yombüi heih-ei David kü, “Horonaim philei kahshang lemeipü leikei-i eenyüke” shei e.

³⁵ Jonadabi ongpa kü, “Veituh, nüng chongphobüi epü keiha anhapeüthü leiteke” shei e.

³⁶ Büpai hapa eyei kemhinüng chehapeüthü leiyei ngoi, hatü jomi ngeüwong anei thep, hatü ongpa hi büpalei chongphobüthü peü shahyaki thep.

³⁷ Absalom laongei daiyei Geshur am Ammihudei cheha Talmai touei pei. Davidi cheha nangkü nyihjeih mahng thep.

³⁸ Absalom Geshurlei laongei daiyei vangbong jem thahshi nyu.

³⁹ Shejao mechem ongpai Amnon nangkü mahng theppü young lakpa, büpai cheha Absalom nang ongyangei deih.