2 SAMUEL 11 - DAÜLANGPÜ LAIHING (BSI)

David hatü Bathsheba

¹ Ha bong sheileilila hepak kü ongpa vehokei daiteipü hepak kü Davidi büpalei lakchongbüthü hatü Israel am veshanthü peü Joab mü vehokei shom, hatü jomi Ammon am hatü Rabbah shümei yah, shejao Davidü Jerusalemei nyu.

² Nyih hük om hepak kü David shipü paoei shem adokei aongei kamteiyei nyu. Shem adok shangeipü büpai nyüha hük hangha lakei ee. Hapa nyühayü longi nela meipü nangkü,

³ Davidi shennyak hanei hapa nyüha jung phenüng shom. Hapa shennyaki, “Hapayü Eliamei yiükha, Hit am Uriahlei chenyüha Bathsheba khih” shei e.

⁴ Hahepak kü Davidi pinnyü mühen shennyak shom. Pinnyü büpa touei müei pei, hatü büpai pinnyü mü shi. Pinnyü hangha daipü doh-ei daütüktü nyuteke. Hapheikü pinnyü shemei nyokei lei.

⁵ Pinnyüi David kü shah shomei, “Ngei büm nekongi daiteke” shei e.

⁶ Hanangkü Davidi Joab kü shah shomei, “Ngei touei Hit am Uriah shomshih” shei e.

⁷ Mechem Uriah büpa touei peijapa, Davidi büpa kü Joab mekei nyu, veshanthü mekei nyu, hatü vehok mekei daipa shei phe.

⁸ Hahepak kü Davidi Uriah kü, “Shemei leiyei nyiumeiyei nyutuh” shei e. Hanangkü Uriah ongshem tuhtü lao, hatü büpa phei kü ongpa leipü thintho hük büpa phei müshi shom.

⁹ Shejao Uriah-i shemei nelei-i ongshem chingshe shadenei ongpalei chongphobüthü mü paümteke.

¹⁰ “Uriah shemei neleiang” shei mechem David kü eshuohpa, Davidi Uriah kü, “Nüng hajük taipü leipü leipeyü mehekei shemei neleipa?” shei phe.

¹¹ Uriah-i David kü, “Vangpüshuwpü Pela, Israel hatü Judah am kemei ashakshemei nyüke, hatü ngelei mübü Joab hatü ngelei shembülei chongphobüthü kemei koshoyalei baümtap vetü nyüke. Mekei etü ngei shemei leiyei hah-ei yingei shembünyü mü paümhenang? Nüng yemmü nyupü thahshi hatü nüngei laangha nyupü thahshi ngei hapakei mechemao nedükpih” shei e.

¹² Hahepak kü Davidi Uriah kü, “Shinnyih-ao hamü themtuh, hatü ngenyih ngei nüng leishihhen” shei e. Hanangkü Uriah-i ha nyih Jerusalemei them. Nyihphei,

¹³ Davidi büpa mü chemi hahyinghen büpa kao nyük, hatü büpa yiüi chokhü. Shejao om kü Uriah-i shemei nelei-i ongshem yompü shemei yombüthü mü paüm.

¹⁴ Nepnüng dhom mü Davidi Joab kü lai hük nyangtü Uriah mü shom.

¹⁵ Hapa lai mongei, “Longi mangpü thepju kü Uriah deishihtuh, hatü büpa nyemjütüknüng amphong dok lepdaituh” shei nyangtü shom.

¹⁶ Joabi mechem chingnyü shümpüshang, melei mangpü vepathü nyu, ha büpai nyingei nyu.

¹⁷ Chingnyü leipü shennyakthü vamei Joab mü hok, hatü Davidei veshanthü hanei mah, hatü Hit am Uriah-ao omshi mah.

¹⁸ Joabi David kü vehok jung meishi nih-ei shom.

¹⁹ Büpai phongmokbü kü, “Mechem nüngi vehok jung ongpa kü shah-om aokhenshang,

²⁰ büpai mongshihkahen aokpeih, hatü nüng kü, ‘Mehekei ammi hokhen chingnyü kü hajük yoshi aongpa? Bham shangei yaongtü kapphahen shei nenyingpü je?

²¹ Jerub-Beshethlei cheha Abimelekh-ü nyüha hüki bham shangei yaongtü maiyaong bhiyei shüktü büpa Thebezlei jütükpü nenyingpü je? Amphong mehekei bham yopailei heihpa?’ shei ephahen aokpeih; hahepak kü nüngi, ‘Nüng chongphobü Hit am Uriah-ao jütükteke’ shei eyeishuoh” shei e.

²² Hanangkü mechem phongmokbü leiyei David ngoipa, Joabi etuh shei shompü shah-om kemei David kü eteke.

²³ Phongmokbüi David kü, “Hamei vepathü ham mü nyeinya wong kohpüba, hatü ham mü hokhen chingnyü mongeipü laoei koshoyalei vamküpeih, shejao hami jom penyüsha thahshi changei leishihpeih.

²⁴ Hahepak kü hanei ami bham shangei yaongtü lahhani kapphopeih; hanangkü ongpalei veshan hanei mahdaiteke; hatü nüngei chongphobü Hit am Uriah-ao mahdaitih” shei e.

²⁵ Davidi phongmokbü kü, “Nüngi Joab kü hapakei etuh, ‘Hapa kü shei nüng mongteshang, vehok keyü hük nevaijü hük payü mahnyüpeih. Nedoh-i hapa chingnyü laamtüktuh; Joab kü monglonghen ha etuh’ ” shei e.

²⁶ Mechem Uriahlei chenyühai chepaha didaipü danpa, pinnyüi mahng thep.

²⁷ Mahng theppü dohpheikü Davidi pinnyü shemei müei lei, hatü pinnyü büpalei shembünyü lei, hatü yeshang hük büh. Shejao Davidi dükpü doui Shembüpa mongmanghü.