2 PETER 3 - DAÜLANGPÜ LAIHING (BSI)

Shembüpa Yiühen Lahpü

¹ Bampü küphüthü, shaang hapai nyipabü lai ngei am kü nyangnyeih. Ngei ha lai nyiyü am kü kenhingmongha chudeih vamhen nangkü deihhen shingvaishi ngei khenyüpeih.

² Peihdaipü hepak kü daülangpü thihivamthüi epü shahthü hatü Shembüpalei shahkung hatü ammei phongshanthü homei Yemleipübai epü shahthü deih-ei dangtuh.

³ Shongpüba kü ammi ha nyingtuh; dohpü nyih kü yaüpülungpüthü mih kü yaüei hatü jomei iyjeiphailei kü nyupüthü peikahen,

⁴ hatü jomi, “Büpa yiükahen lahpü melei nyüpa? Jenei bühipathü dikemteke, shejao chongpangpülei lingpü lakshing lemphüli shaang thahshi dainyüke!” shei enyüke.

⁵ Hepak longi daiteke, Kahvangei shah-i vangshothü vamhüpeih, hatü kahdoknyü-ü yung kübü vamhüpeih hatü yung homei vamhüpeih shei epü shahhing jomi nyingshangi yaktüknyüke.

⁶ Hapa yungi hapa hepak kübü kahdoknyü bünghiyang longpai mahhüteke.

⁷ Shejao hapa aihük shah-i shaangpü vangsho hatü kahdoknyü mahtükhen shahphenpü nyih mangngoi thahshi Kahvang nenyingpüthü aw kü jakhen tuh-ei nyüke.

⁸ Shejao bampü küphüthü, hapa dou hük ammi tebetük: Shembüpa mü nyih hükü vangbong haja hük keiha, hatü vangbong haja hükü nyih hük kei nyüke.

⁹ Shembüpai lahtükpü nangkü hanei ami deihpükei kaaei nenyu, shejao üpayao nemahtükhüei, shejao peü mong lepei leihahhüpü nangkü am mü nenteiaokei danei nyüke.

¹⁰ Shejao Shembüpalei nyih gühpa hük leshi peikahen, hatü hapheikü vangshothü ngeü longpü mü peihdaihen, hatü vangsho leipü douthü kemei awi hahtükhen, hatü kahdoknyü hatü haleipü lemphü shamtükhen.

¹¹ Hanangkü douthü lemphü hapakei mahdaihen vaipü nangkü menüng keipü daülangpü hatü Kahvang nyingpü yangnyu ammi nyuei,

¹² Kahvang yiükahen shülangpü nyih danhenang? Mehenangkü hapa nyih vangshothü awi hahtükhen, hatü awshami lemphü douthü nyaüdaihen.

¹³ Shejao büpai lahpü aimü daülangpüthülei shem vangsho ja hatü kahdoknyü ja jeni omdannyeih.

Dohpü Nangthong Shah

¹⁴ Hanangkü bampü küphüthü, ammi ha douthü danshingkü ammi büpa mü chingmei kü kawhikang hatü eela neshiüi nyushi büpai am eehen mü kentuh,

¹⁵ hatü jenei Shembüpa nenteiaokpü lappeyü yemleipü shei deihtuh. Hapa keiha jenei jeihinaü Pauli büpa kü Kahvangi yahshuohpü kihikon aimü am kü nyangteke.

¹⁶ Büpalei lai peü kü hathü aihük jung eyei nyangnyüke. Büpalei laithü kü nyinghen wongpü douthü maani kohshi nyüke; hapayü nenyingpüthü hatü shing nenüngpüthüi laophü mahhen mü Laihing kü jomi dükpükei nyongnyongi lingtüknyüke.

¹⁷ Hanangkü bampü küphüthü, ammi ha yeihshi nyingphei vütei-i shahkung mangpü shennyakthüi pungpü kü am müei nedaihen, hatü am yangei nyupü laphen kübü nedohhen kenhingtuh.

¹⁸ Shejao phahji hatü jenei Shembüpa hatü yemleipü Jisu Khrista nyingpü kü longtuh. Büpa kü shaang hatü nedohnetenpü nyih thahshi düngei müknyinshekhang vaituh! Amen.