2 PETER 2 - DAÜLANGPÜ LAIHING (BSI)

Shahshem Thibüthü hatü Hanghi

¹ Shejao shahshem nyuhbüthü am nanglak khongkü vamteke, hatü ha aihük mü amphong khongkü shahshem nyuhbüthü vamkahen. Jomi joei tenbenüng chudeih koei peikahen; jomi jom angei leipü Shembüpa yaktükhen, hatü laophü nyingkü lomi mahhen koei peikahen.

² Hapa keiha longshi shing jomei nedaünelangpü lemthü kü mühen, hatü ha nyuhbüthü homei shahhing lem ten leitükhen.

³ Jom hahnempai jomei lupülempü shahthüi am leipü thüei jom nanglei danghen. Jom khüei shahphenhen shelei mebü temei nyüke, hatü jom mahtükhühen Hük shishi nenyu.

⁴ Mehenangkü Kahvangi mang thahpü vangsho phongshan dangkao neyangi molo awlei shüktük hatü shahphenpü mangngoi thahshi chüpü shangmangei nyiamvüi shatü tuhjema;

⁵ hatü Kahvang nenyingpü kahdoknyü kü bünghiyang yah-ei peishingkü daülangshemshepü shahjang kobü Noah mü jom nyet mon yangtü büpai aivang kahdoknyü dangkao yangei netuhjema;

⁶ hatü Sodom hi Gomorrah chingnyü nyi kübhih leiyei mahtük, hatü Kahvang nenyingpü am kü mehe peinya ha lappü leihüjema;

⁷ hatü shahkung nebangpü nühinam kohpü yangnyuthü homei shanghah-ei nyupü daülangpü shennyak Lot büpai yangjema,

⁸ (mehenangkü hapa daülangpü shennyak nyihjeih jom mü nyu, hatü büpai eepü hatü danpü shahkung nebangpü jomei douthü homei büpalei daülangpü laangha hanghiyei nyu,)

⁹ shejema, Shembüpai mekei etü Kahvang nyingpüthü dokpü kübü yanglanghen nyingei nyüke, hatü shahphenpü nyih mangngoi thahshi nedaünelangpüthü hanghi kü tuhhen,

¹⁰ anyei vaishi üami laophülei phai iyjeiphailei mang kü mü, hatü Kahvang ngan yaktük hathü shingvaishi nyuhen. Jomphong mahmong longei changmeinyüke, hatü jomi müknyinshekhangpü vangsho shanthü kao yaüeilunghen nenyemnyu.

¹¹ Vangsho phongshanthü wong hatü ngan nyeinya kohjao SHEMBÜPAleipü hathü khüei nethaüvaünyu.

¹² Hathüyü sholi mongdang neshiüpü yemhimakthü, mangpü phaüyemthü yepei jütükhen nangkü shaanpüthü, jomi mehe nenying ha kü thaüvaünyüke, hatü mechem ha yemhathü jühen, jomao jütükhen.

¹³ Jomi nejiüpü dükpü nangkü jomao shanghahnyüke. Nyihnüng mongong monglehenü mong hambenüng shei jomi deihnyüke. Ammei mohitap kü jom hahyingei mongmeipeyü veübenüng hatü kawhikang nyüke.

¹⁴ Jomei mük mükbongjuyungi maei mang kü hüneshemnyu. Jomi shing nenüngpüthü yawh-ei yahnyüke; jomü hahnempü mongdang jükshi nyüke; jomü thaüvaütükpü hashihthü nyüke!

¹⁵ Jomi kangshangpü lem tuhtü Beorlei chehai nejiüpü dükpülei lat kü bampü Balaamei lem kü nyongei dainyüke,

¹⁶ shejao büpai pungei dükpü nangkü shah ne-epü gadui büpa kü lohshuoh, hatü thibülei ngadou nedükhüi yepei tuh.

¹⁷ Hathüyü yung neshiüpü yunglok, hatü vanglüki deipü phumthü; mehenangkü jom shingvaishi shangmang vangnyak jaoei nyüke.

¹⁸ Mehenangkü jomi changmeipü hatü ngashah enyüke, hatü phai yahhahhüpü jiühitnalai homei pungei nyupü khong kübü yangei daijapü shennyakthü yawh-ei yahnyüke.

¹⁹ Jomi hathü kü bümei lahnyüke, shejao jomphongü mangei aathü nyüke; mehenangkü shennyakü laophü kü mepai neü, hapalei aa leidainyeih.

²⁰ Jenei Shembüpa hatü Yemleipü Jisu Khrista nyingpü homei kahdoknyülei ten kübü yangpheikü, jomi shao ha kü manei neühahjema, shongpü laphen meyü jomphongü dohpülei-üng nemeipüba nyunyeih.

²¹ Daülangshemshepü lem nyingtü jom kü shuohpü daülangpü shahkung kü ngaümphei lepphongtü dailei meyü hapa nenyingpü-üng jom shingvaishi meipüba.

²² Jomphong nangkü hapa kandok shah nyi jiüpeih: “Shi-i laophüi bhaipü touei nyokei leinyeih,” hatü, “ooki hangha lakhenü ookshoilei shoinüng nyokei leinyeih.”