2 PETER 1 - DAÜLANGPÜ LAIHING (BSI)

Selam Shah

¹ Simon Peter, Jisu Khristalei chongphobü hatü phongshan hüki jenei Kahvang hatü Yemleipü Jisu Khrista daülangshemshepü homei ham keiha hinglempü douvang kei yahpüthü touei,

² Kahvang hatü Jisu jenei Shembüpa nyingpü kü changpüshapü phahji hatü chingmei ammei vaituh.

Kahvangi Nyükpü hatü Jepü

³ Büpalei müknyinshekhang hatü meipai jen kü nyükpü büpa nyingpü homei yangnyu hatü Kahvang nyinghen shingvaishi napü lemphü büpalei ngan homei jen kü shuohteke.

⁴ Hathü homei büpai jen kü longi longpü hatü douvang lahpüthü shuohteke, shejüang hathü homei ammi Kahvang nyingnyoi kü hean yah-aokhen hatü mangi yahhahhüpü homei kahdoknyü kü vamhüpü ten kübü yangaokhen.

⁵ Ha tata kü am hinglempü kü meipü ühen kentuh, hatü meipü mü nyingpü,

⁶ hatü nyingpü mü ungeiaeipü, ungeiaeipü mü nenteiaokpü, nenteiaokpü mü Kahvang nyingpü;

⁷ Kahvang nyingpü mü jeihinaü bamteipü, hatü jeihinaü bamteipü mü bampü nyutuh.

⁸ Mehenangkü hathü meipü ammei vaihüjema hatü am mü nyeinya dahüjema, hathüi jenei Shembüpa Jisu Khrista nyingpü kü am wong nekoh-i hatü betjük nejüki neleihühen.

⁹ Shejao üpai hathü taoei nyu, büpayü lekei ne-eepü hatü mükphüngpa, hatü peihdaipü mangthü daütükpü betükpü shennyak.

¹⁰ Hanangkü jeihinaü nyahinaüthü, nyeinya vaishi am kü nyükpü hatü jepü lekhen kentuh; ammi ha dükjema am huluh neshuohpih.

¹¹ Mehenangkü hapa lem kü jenei Shembüpa hatü Yemleipü Jisu Khristalei nedohnetenpü ongching kü shühen am shing changshi yahphahen.

¹² Hanangkü ammi hathü nyingei hatü am touei peiküpü shahhing kü chonglingei nyujao ngei am kü hathü dou nang düngei deihhen enyeih.

¹³ Ngelei hapa büm yem nyupü thahshi am kü ha douthü deihhühenü jiüpü khih shei ngei deihnyüke.

¹⁴ Sheyü ngei didaihen lomi ngoikahen shei ngei nyingnyüke, hatü hayü jenei Shembüpa Jisu Khristai lekei ngei kü ephütepih.

¹⁵ Ngei dipheikü jiüjiü hepak kü ammi hathü douthü deih-eilehen shingvaishi ngei khehen.

Khristalei Müknyinshekhang Eepüthü

¹⁶ Mechem hami ngan hatü jenei Shembüpa Jisu Khrista peipü am kü nyinghüpa, hami kon kohshi lingpü yimpilathü phei müei ne-e, shejao hamphongü büpalei müknyinshekhang müki eepü denbüthü hih.

¹⁷ “Hapayü ngei bampü Ha, ngei büpa kü mong hahnyeih” shei Jeiyong Müknyinshekhangi epü büpa touei hapa ngeü peishingkü büpa Pa Kahvang leipü dhüm hatü müknyinshekhang dangpeih.

¹⁸ Ham büpa mü daülangpü kahshangei nyushingkü vangsho leipü peiküpü hapa ngeü hamiyao dantepih.

¹⁹ Hanangkü jen mü thihivamei shahthü longi lekei nyüpeih. Ammi ha kü meishi mong shuoh-ei dükaokhen; mehenangkü hapayü vangngai vamei nepnüng litha ammei mong kü mangkhang thahshi shangmang shing kü awdük nyapükei nyüke.

²⁰ Shongpü kü am peüi ha nyingtuh; Laihing kübü thihivam shah mepayao shennyak hüki deihhahpü kübü nevamnyih.

²¹ Mehenangkü thihivam shah-ü shennyaki mongpü kübü nevam, shejao Laangha Daülangpai jom müpai shennyakthüi Kahvang leipü yah-ei epeih.