Biblia Todo Logo
Bìoball air-loidhne

- Sanasan -

2 ONGPATHÜ 9 - DAÜLANGPÜ LAIHING (BSI)


Israel amei Ong Vaihen Jehu Jepü

1 Hahepak kü Elisha thibüi thibüthü khong kübü thibü hük nyükei büpa kü, “Shünglok loktuh, hatü hapa mainga shong yah-ei Ramoth-Gileadei daituh,

2 hatü mechem nüng hatou ngoihenshang, Nimshilei cheha Jehoshaphat, Jehoshaphatei cheha Jehu yemtuh. Büpalei küphüthü toueipü yanei dungnuk mongei shütuh,

3 hatü hapa mainga shong leipü mainga yah-ei büpalei shangjing kü langtuh, hatü büpa kü, ‘Shembüpai nüng Israel kü ong vaihen jepüja’ shei etuh, hatü nephei-i sha apei yahshi nüng mokdaituh” shei e.

4 Hanangkü nethe thibüpai Ramoth-Gileadei dai.

5 Mechem büpa hatou ngoipa, büpai veshan mübüthü chemi uoshi heüteke. Büpai, “Ngei shahjang hük koshi nyüpeih” shei e. “Hamphong khongkü üpa kü?” shei Jehui phe. “Nüng kü” shei büpai e.

6 Jehu yaongei shem mongei shüteke. Hahepak kü thibüpai Jehulei shangjing kü maingai langtü, “Shembüpa, Israel Kahvangi hapakei enyüke: ‘Ngei ngelei nanglak Israel shak kü ong vaihen nüng jenyeih.

7 Nüngi nüngei shembü Ahab am shem jütükkemtuh, hatü ngei ngelei chongphobü thibüthü, hatü ngelei lebü chongphobüthülei iy Jezebel homei yenhüpü bhüh yemhen hih.

8 Mehenangkü Ahab am shem kemei mahhen. Ngei Israel kü Ahab kübü bahanaü kemei aa vaituh, aa nevaipü vaituh mahtükkemhen.

9 Ngei Ahab am shemü Nebatei cheha Jeroboam am shem keiha, hatü Ahijahlei cheha Baasha am shem kei leitükhen.

10 Jezreel kahdokei Jezebelei bümü shithüi hahhen, hatü üpaiyao pinnyülei mahng nevühen’ ” shei e. Ha ephongtü büpai sha apei mokdai.

11 Mechem Jehu büpalei küphü lakchongbüthü touei vamjapa, jomphong khongkü hüki, “Lemphüli meishi-üng vaaikhihma yo? Mehekei hapa ngapayü nüng yemei peiküpüja?” shei phe. “Ammi hapa shennyak mepa keipüang ha nyingei nyüke” shei Jehu-i e.

12 Jomi, “Hayü shahshem khih. Ham kao eshih!” shei e. Büpai ngei kü, “Shembüpai hapakei enyüke: Nüngü Israel kü ong vaihen jepü khih” shei ephopeih.

13 Hahepak kü jomi shülangi jomei ashak nyiukei büpalei lateenei nyem. Hapheikü jomi amit vüngei, “Jehuyü Ongpa!” shei len.


Jehu-i Joram hatü Ahaziah Jüpü

14 Hanangkü Jehu, Jehoshaphatei cheha, Nimshilei chehüi Joram ongpa khüei phaüshah show. Shaang Joram hatü Israel am kemei Aram am Hazael ongpa kü shomshi Ramoth-Gileadei nyu,

15 shejao Aram am Hazael ongpa khüei hokshingkü Aram ami büpa kü ma shashuohpü nangkü hapa kü junghahnüng Joram ongpayü Jezreelei leidaitü nyu. “Ammi mongei deihjema, amphong üpaiyao hapa chingnyü leipü laoei daiyei hapa shahjang Jezreelei te-e” shei e.

16 Hapheikü büpa koyei khari kü uotü Jezreelei dai; mehenangkü Joramü halei tüngei nyu, hatü Judah am Ahaziah ongpayü büpa mü pongteihen yiüei nyuteke.

17 Jezreelei shangdü hük kü veyompü shennyak hüki Jehu hatü büpalei veshanthü ngoijapü eeyei büpai, “Veshanthü hanei peiküpü ngei eenyüke” shei nyük. “Hathüyü mongjempa hi vepa shangkü pheyuhen koyei veshan hük deishihtuh” shei Jorami eteke.

18 Hanangkü koyei veshan büpa mü heüteinüng heih-ei büpai, “Ongpai mei deihshi peiküpü vaaikhihma? shei enyüke” shei e. Jehu-i jangei, “Nüngi hapa chingmei kü mehe linghen? Ngei phei mükei” shei e. Shangdü leipü veyombüi, “Phongmokbü heih-ei jom ngoitepih, shejao büpa nyokei neleikünyu” shei e.

19 Hapheikü büpai nyipabü koyei veshan hük shomei deishih, hatü büpai jom thahtü büpai, “Ongpai mei deihshi peiküpü vaaikhihma yo? shei enyüke shei e. Jehu-i jangei, ‘Nüngi hapa chingmei mü mehe linghen? Ngei phei mükei’ ” shei e.

20 Shao shangdü leipü veyombüi, “Büpayao jom ngoitepih, shejao büpa nyokei neleikünyu. Koyei khari müpü kü veishuohjü Nimshilei cheha Jehu-i müpükei eenyüke; mehenangkü büpaiyü ngapai müpükei münyüpeih” shei e.

21 Jorami, “Temtuh” shei e, hatü jomi büpalei koyei khari tem. Hapheikü Israel amei ongpa Joram hatü Judah amei ongpa Ahaziah nyi laophü laophülei koyei khari kü uotü Jehu mü pongteinüng daiyei jijinyi-i büpa mü Jezreel am Nabothlei kahlei pongtei.

22 Mechem Jorami Jehu eepa, büpai, “Jehu, mei deihshi peiküpü vaaikhihma yo?” shei e. Jehu-i jangei, “Anyü Jezebeli dükpü mükbongjuyung, hatü phongyom hingletpü nedoh-i nyupü thahshi mehe chingmei nyuaokhen?” shei e.

23 Hahepak kü Jorami, “Ahaziah, shaiteke!” shei etü nyokei leitü mokdai.

24 Hahepak kü Jehu-i büpalei lah ngaiyei Joramei dok baong kü kap, hatü lahhani mongdang bhaoshi kaptü büpa koyei dokshang leipü vüteke.

25 Jehu-i büpalei koyei khari lakchongbü Bidkar kü, “Büpa phukei ankei, hatü Jezreel am Nabothlei kahlei shükphongtuh. Mehenangkü ji chepa Ahab pheikü koyei khari kü uotü daishingkü Shembüpai büpa nangkü hapa tetshahvanshah eküpü deihnyaai khihma:

26 ‘Ngei menyih eepü Nabothlei iy, hatü chehathülei iy nangkü ngei lah-ei enyüpeih, hapa kahmoi kü-üng ngei bhüh yemhen shei Shembüpai enyüke.’ Hanangkü shaang hapa phuktuh, hatü Shembüpai epü shah keiha Nabothlei kahlei yakphongtuh” shei e.


Judah Ongpa Ahaziah Jütükpü

27 Mechem Judah amei ongpa Ahaziah-i ha eepüshang, büpa Beth-Haggan lemei mokdai. Jehu-i “Büpayao jütuh!” shei lenyaki changei dai. Jomphongi Ibleam yopailei Gur lemei aongpü lemei büpa kü kaw sheüteke, shejao büpa Megiddolei heih-ei halei di.

28 Büpalei lakchongbüthüi koyei khari kü shihtü büpalei mahng Jerusalemei leiyei David Chingnyülei chebü chepa amei mahngchongei vü.

29 Ahabei cheha Jorami Israel kü ong vaipü vangbong anpühükpabü kü Ahaziah-ü Judah kü ong vaiteke.


Jezebel Onglanyü Jüpü

30 Hapheikü Jehu-i Jezreelei heih. Mechem Jezebeli ha danpa, pinnyüi mük kü ow ling, hatü shohiyang lingtüktü ümha shaden homei veiteke.

31 Jehu shaden homei shüjashingkü pinnyüi, “Mei deihshi peiküpa yo? Oh laophülei shembü Zimri jütükpü shennyak!” shei e.

32 Jehu-i ümha shadenei ngangei veitü lenei, “Ngei philei üpa nyüpa? Üpa nyüpa?” shei e. Ban tüktükpü shennyak nyi jem vamei büpa kü veishuohteke.

33 Büpai, “Pinnyü yepei shükei shanshih” shei e. Hanangkü jomi pinnyü yepei shükei shanshih, hatü pinnyülei iy bhamba kü, hatü koyeithü kü phaatteke. Jehu-i büpalei koyei hatü koyei kharithüi pinnyülei mahng kü nyeüteke.

34 Jehu ongshem mongei shüei hahying. Hapheikü büpai, “Hapa thaüvaütükpü nyühalei mahng jungtuh, hatü mahng vütüktuh; mehenangkü pinnyü-ü ongpalei yiükha hih” shei e.

35 Shejao mechem jomi pinnyülei mahng vününg heihjapa, shangjing vangkong, lakvang lavang mü lenei meheyao aoei nechongja.

36 Mechem jom nyokei leiyei büpa kü ha jung ejapa, büpai, “Shembüpai büpalei chongphobü Tishbe am Elijah homei hapakei epeih: ‘Jezreel kahdokei shithüi Jezebelei phai hahhen;

37 Üpaiyao hayü Jezebel khih shei nenyingaokhen mü Jezreel kahdokei Jezebelei bümü nühinam kei yaüshi nyuhen’ ” shei eteke.

Phom Naga Bible - DAÜLANGPÜ LAIHING

Copyright © 2005 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan