2 ONGPATHÜ 8 - DAÜLANGPÜ LAIHING (BSI)

Shunamlanyü Nyokei Leipü

¹ Shaang Elisha-i Shunamlanyü, üpalei cheha yangei leishihpa, pinnyü kü, “Nüngei shem am müei daiyei nüngi mongpü shingei nyutuh; mehenangkü Shembüpai hapa kahdok kü shaühile hük peihühen temei nyüke, hatü hapayü bong nyet nyukahen” shei e.

² Hanangkü Kahvang shennyaki epükei hapa nyühanyüi dükhen layaong, hatü jom shem am daiyei Philistia kahdokei bong nyet nyuteke.

³ Bong nyet dohpü lemei pinnyü Philistia kahdok leipü nyokei leiyei ongpa touei pinnyülei kahdok shemshing yününg pei.

⁴ Shaang ongpai Kahvang chongphobü Gehazi kü, “Elisha-i dükpü yashanpü douthü ngei kü eshih” shei eteiyei nyu.

⁵ Mechem büpai ongpa kü Elisha-i didaipü yangei leishihpü jung ejaei nyupa, Elisha-i cheha yangei leishihpü nyühanyüi ongpa kü pinnyülei kahdok, hatü shemshing yününg peiteke. Gehazi-i, “Ngelei shembü ongpa, nyühanyüyü hapa hih, hatü Elisha-i cheha yangei leishihpü pinnyülei chehayü hapa hih” shei e.

⁶ Ongpai nyühanyü kü hapa jung pheteke, hatü pinnyüi büpa kü hapa jung eteke. Hanangkü ongpai pinnyülei shahhidou henghen lakchongbü hük je, hatü büpa kü, “Pinnyülei kahdok kemei, hatü pinnyü lüdaipü nyih mebü shinnyih thahshi hapa kü dangpü lat kemei nyokei shuohtuh” shei e.

Elisha hatü Aram am Ben-Hadad Ongpa

⁷ Elisha Damaskalei heihpü hepak kü Aram am Ben-Hadad ongpayü tüngei nyu. Mechem ongpa kü, “Kahvang shennyak Elisha peiyei nyükeja” shei eshuohpa,

⁸ büpai Hazael kü, “Nüngi thintho hanei temtü hapa Kahvang shennyak mü pongteinüng heihtuh, hatü büpa homei ngei hapa dinshan kübü yangaoküla shei Shembüpa kü nyemphekününg heihtuh” shei e.

⁹ Hanangkü Hazaeli Elisha mü pongteinüng Damaskalei vampü doumei lemphüli thaiyei ut pinyi kü hanggo kohütü heih. Büpai shem mongei shüei büpa touei yaongtü, “Aram am anha Ben-Hadad ongpai ngei nüng touei, ‘Ngei tüngpü meiüla?’ shei phenüng shompü khih” shei e.

¹⁰ Elisha-i jangei, “Shembüpai büpayü didaihen khih shei ngei keyü huphopeih, shejao leiyei, ‘Nüng tüngpü meihen hih’ shei etuh” shei e.

¹¹ Büpai Hazael kü veüshi mük khangei vei, hatü büpa thep.

¹² “Ngelei shembü, nüng mehekei thepnya?” shei Hazaeli phe. Büpai jangei, “Mehenangkü nüngi Israel am kü dükhen nemeipü douthü ngei nyingnyüke. Nüngi jomei pe showtükpü chingnyüthü awi haptükhen, jomei nethethü nüngi jükemhen, jomei maanpü hashihthü yah-ei kahdokei shüktü jütükhen, hatü jomei büm nekongpü nyühathülei vom shaakei jükemhen khih” shei e.

¹³ Hazaeli, “Nüngei chongphobü ngei, shi hi ookao nehiepai hapa keipü dou dükaokhen khih je?” shei e. Elisha-i jangei, “Nüngü Aram amei ong vaihen khih shei Shembüpai ngei kü huphopeih” shei e.

¹⁴ Hazaeli Ben-Hadad touei nyokei leijashingkü, “Elisha-i nüng kü mekei ephopa?” shei büpa kü phe. “Büpai ngei keyü nüng tüngpü meihen khih shei ephopeih” shei Hazaeli e.

¹⁵ Shejao nyihphei büpai ashak chetlüpü yah-ei yung kü hingtü ongpalei dhe kü jümteke, hatü ongpa didai. Hapheikü Hazaeli ongpa kü jeiyei ong vaiteke.

Judah amei Jehoram Ongpa

¹⁶ Israel kü Ahabei cheha Jorami ong vaipü bong ngapabü kü Jehoshaphatei cheha Jehorami Judah kü ong vaihen pang.

¹⁷ Büpa ong vaipü hepak kü büpalei nyübüh bong hapüanpü nyi nyu, hatü büpai Jerusalem kü bong shet vanglem lem.

¹⁸ Büpai Ahab am shemi dükpükei Israel ongthülei lem kü kam; mehenangkü büpai Ahabei yiükha yah. Büpai Shembüpa touei mang dou dükteke.

¹⁹ Shejao laophülei chongphobü Davidei men kü Shembüpai Judah am nemahtükhü. Büpai David kü awdük shuohhen, hatü büpalei hühihathüi nedoh-i vanglem lemhen shei lahtük.

²⁰ Jehoram vanglem lempü hepak kü Edom am Judah am khüei yaong, hatü jom lompü ong haümtü nyu.

²¹ Hahepak kü Jehorami büpalei koyei kharithü peü yah-ei Zairlei heih. Edom ami büpa hatü büpalei koyei kharithü shümlang, shejao büpa hapa show kübü yang, hatü veshanthü nyaiyei shemei leidaikem.

²² Hanangkü shinnyih thahshi Edom ami Judah am khüei yaongnyüpeih. Hahepak kü-üng Libnah amao khüei yaong.

²³ Jehorami dükpü lemphüli Judah Ongthülei Büshah Laitap kü nyangei nyüpeih.

²⁴ Jehoram di, hatü David Chingnyü kü ongthülei mahngchongei vü, hatü cheha Ahaziah-i büpa kü jeiyei ong vaiteke.

Judah amei Ahaziah Ongpa

²⁵ Ahabei cheha Jorami Israel kü ong vaipü bong anpünyipabü kü Jehoramei cheha Ahaziah-i Judah kü vanglem lemei pang.

²⁶ Mechem Ahaziah ong vaipa, büpalei nyübüh bong hapünyi nyuteke, hatü büpai Jerusalem kü bong hük vanglem lem. Chenyülei menü Athaliah nyu; pinnyü-ü Israel ongpa Omrilei chehü nyuteke.

²⁷ Büpai Shembüpa touei mang dou dükei Ahab am shemi kampü lemthü kü kam; Ahab am shemi dükpükei dük; mehenangkü büpayü yiükhila lemei Ahab am shem mü shenteipü nyu.

²⁸ Ahaziah-i Ahabei cheha Joram mü Ramoth-Gileadei Aram ongpa Hazael mü khüei hokhen dai, hatü vehokei Joram ma yah.

²⁹ Aram amei ongpa Hazael mü Ramoth-Gileadei hokshingkü Aram amei lak kü ma yahpü kü junghahhen shingvaishi Joram ongpayü Jezreelei leiyei nyu. Hahepak kü Jehoramei cheha Ahaziah, Judah amei ongpai Ahabei cheha Joram ma yahpü nangkü pongteinüng Jezreelei yiüteke.