2 ONGPATHÜ 7 - DAÜLANGPÜ LAIHING (BSI)

¹ Elisha-i jangei, “Shembüpalei shah bangtuh. Shembüpai hapakei enyüke: Ngenyih shaang kei Samaria penyüshalei ngin phahük kü atta dok jem nevaijü barley aung dok vok yukahen” shei e.

² Hahepak kü ongpai mongnyangpü lakchongbü hüki Kahvang shennyak kü, “Shembüpai vangsho shaden aptü khüpeilangei hahying shomlangmao ha nevamküpih” shei e. Elisha-i, “Nüngi hapa vampü laophülei müki eehen hih, shejao nüngi hapa nehah-aokpih” shei e.

Aram Veshanthü Nyaidaipü

³ Shaang chingnyü penyüsha haolei ngombüthü jom ali nyu. Jom hüki hük mü, “Jen dipü thahshi mehekei hamü nyuhen?

⁴ Jeni chingnyü mongei shüshah shei ejao ching mongkü shaühile nyupü nangkü jen dihen khih. Hamü uoshi nyujao jen dihen khih. Hanangkü jen Aram amei baümtapei aongei laojashah; jomi jen yangphüjema yemmü nyuhen, jomi jen jüphüjema, jen dihen” shei e.

⁵ Hanangkü pibom kü jom Aram amei baümtapei aong. Shejao mechem jomi baümtap jung phihük ngoipa, halei shennyak hükao nenyuja;

⁶ mehenangkü Shembüpai Aram am kü koyei kharithü, koyeithü, hatü veshanthü khong longpülei ngeü danhü, hatü jom jom hüki hük kü, “Israel ongpai Hit hatü Ijip ongthü jen mü khüei hokhen chüngei nyupü khih” shei etei.

⁷ Hanangkü jomei ashakshemthü, koyeithü hatü gaduthü peü tuhphongtü pibom kü jom nyaidai. Jomi baümtap hei-üng yakphongtü yanglem yemei nyaidaikem.

⁸ Ngombüthüi baümtap jung phihük ngoiyei ashakshem hükei shüteke. Jomi hahying hah, hatü haleipü hon hi ngin, ashakviha yah-ei daiyei jotükkem. Shejao jom leilemei baümtap hükei shü, hatü haleipü dou hanei yah-ei hathüao jophong.

⁹ Hahepak kü jomi hüki hük kü, “Jeni mehe düknya, hayü nejiüpü dou khih. Hapayü shahjang meipü nyih khih; hayü jen nyingi jolangnyu khih. Jeni vangngaipü thahshi ha ne-ejema, hingmei hanghi danghen khih. Hanangkü jen chem leiyei ongpalei lakchongbüthü kü ejashah” shei etei.

¹⁰ Hanangkü jomi Aram amei baümtap leipü Samarialei leiyei chingnyü penyüsha yompüthü kü, “Ham Aram amei baümtapei peipeih, shejao shennyak hükao ne-ee, meheyao nedan, shejao koyei hatü gaduthü shenshi, hatü ashakshemthü hei-üng tuh-ei nyuküpeih” shei ejateke.

¹¹ Penyüsha yompüthüi hapa shahjang yan, hatü ongshemei shahjang shom.

¹² Ongpai nyak kü paoei büpalei chongphobüthü kü, “Aram ami jen khüei dükpü kon ngei am kü eküshah. Jen aeipülepü jomi nyingei nyüke, hatü jen hahying yemei daijahen, hahepak kü jen yemmü yepei leihen, hatü jenei chingnyülei shühen shei deihshi jomei baümtap tuhtü daiyei phaü mongei joshi nyüpeih” shei e.

¹³ Büpalei lakchongbü hüki, “Chingnyülei aoei nyupü koyeithü khongkü kuknga yahtü shennyak hanei shomshah. Daipüthüao hatouei aoei nyupü Israel am keiüng lomohshasha hih. Daipüthüao aopüthü kei-üng mahkemshasha hih. Hanangkü hanei am shomei mehe vampüshang baong dangshah” shei e.

¹⁴ Hanangkü jomi shennyak nyi jetü koyei khari nyi kü uotü Aram am veshanthü kü mehe vamjapa nyingei leikei shei ongpai jomphong shom.

¹⁵ Hanangkü jomi Jordan thahshi jom phei kü dai; Aram ami nyemei nyaishingkü lemyang kü ashakviha hatü douhinangthü yakphong. Hapa keiha phongmokbüthü nyokei leiyei ongpa kü shah-om aokjateke.

¹⁶ Hapheikü shennyakthü daiyei Aram amei baümtap bomei lei. Hanangkü Shembüpai epü keiha atta dok jem kü, hatü barley aung dok vok kü lop pha hük kü yuteke.

¹⁷ Shaang ongpai mongnyangpü lakchongbü hük ongpalei peshaden yomei tuhphong. Kahvang shennyaki büpa touei ongpa peijashingkü epü keiha shennyakthüi hapa shennyak peshadenei la-i shoupei jütük.

¹⁸ Mehenangkü Kahvang shennyaki ongpa kü, “Ngenyih shaangkei Samaria penyüshalei ngin pha hüki atta dok jem nevaijü barley aung dok vok shakaokhen hih” shei eshingkü,

¹⁹ hapa lakchongbüi Kahvang shennyak kü, “Shembüpai vangsho shaden aptü khüpeilangei hahying shomlangmao ha nevamküpih” shei jangei epeih. Kahvang shennyaki jangei, “Nüngi hapa vampü laophülei müki eehen, shejao nüngi hapa nehah-aokpih” shei e.

²⁰ Büpa kü hapa jiüshi dhaümteke; mehenangkü shennyakthüi büpa kü peshadenei la-i shoupei jü.