2 ONGPATHÜ 5 - DAÜLANGPÜ LAIHING (BSI)

Naaman Ngomdin Kübü Meipü

¹ Shaang Naamanü Aram ongpalei veshan mübü hük nyu, hatü büpa kü ongpai longi monghah; mehenangkü büpa homei Shembüpai Aram am aokpü danghü. Büpayü monglongpü veshan nyuteke, shejao ngomdin kohshi nyu.

² Aram ami Israel am mü hokshingkü veshan hüki Israel leipü nela hük yepei lei, hatü pinnyüi Naamanei shembünyü chongphoei nyu.

³ Pinnyüi laophülei shembülanyü kü, “Ngelei shembü Naamani paoh Samarialei nyupü thibüpa touei peijalangmeyü büpai büpalei ngomdin meitükaokhah shepeih” shei e.

⁴ Israel am nelanyüi ha epü danei Naamani ongpa touei peiyei ha jung ejateke.

⁵ Aram ongpai jangei, “Shejema leituh. Ngei Israel ongpa kü nüng mü lai hük shomhen” shei e. Hanangkü Naamani lop haja hapüan, hon haja vok, hatü jeiteihen büm-ow lem an thahshi kotü layaongei dai.

⁶ Büpai koei daipü Israel ongpa kü shompü lai kü hapakei nyangteke: “Hapa lai mü ngelei chongphobü Naaman nüng touei büpalei ngomdin meihahhen shingvaishi shomphünyeih” shei nyang.

⁷ Mechem Israel ongpai hapa lai iepa, büpai laophülei büm-ow shaaktü, “Ngeiyü Kahvang je? Ngei mih jütü yangei leishih-aokhen je? Mehekei hapa shennyaki ngomdin kohpü shennyak meihütuh shei shah shompa? Büpayü ngei mü hokhen lem yemhen khenyu khih” shei e.

⁸ Shejao mechem Kahvang shennyak Elisha-i Israel ongpai büm-ow shaaktükpü jung danpa, büpai ongpa kü hapa shah shom. “Nüngi mehekei nüngei büm-ow shaaktükpa? Hapa shennyakü ngei touei deishih; shejüang büpai Israel kü thibü hük nyüke shei nyinghen” shei e.

⁹ Hanangkü Naamani büpalei koyeithü, hatü koyei kharithü mütü heih-ei Elishalei shem shadenei yaong.

¹⁰ Elisha-i büpa kü eshuohhen shingvaishi phongmokbü hük shomei, “Daiyei Jordan yungyenei nyetpa thahshi paütuh, shejüang nüngei büm chemjalak kü daüei meidaihen hih” shei eteke.

¹¹ Shejao Naamani mongshih-ei, “Ngei touei büpa vamei yaongtü Shembüpa, büpalei Kahvang men kü nyüktü makaw kü büpalei laki dükei ngelei ngomdin meiphahen je shei deihpeih shei eyaki lüdai.

¹² Israel amei yungyenthü meyü Damaska leipü Abana hatü Pharpar yungyenthü-üng meipü nevaipü je? Ngei hathülei daiyei nepaütükaokhen je?” shei e. Hanangkü büpai mongshih-ei nyokei lüdai.

¹³ Shejao büpalei chongphobüi büpa touei heih-ei, “Opa, thibüpai nüng kü lemhük douwong dükhen epü vailangmeyü nüngi ha nedükhen vaipü hiang? Büpai nüng kü, ‘Paütüktuh hatü daüdaituh’ shei epü kü nyeipü mehe nyüpa?” shei e.

¹⁴ Hanangkü büpa yiüei Kahvang shennyaki epü keiha Jordan yungyenei nyetpa thahshi hingteke, hatü büpalei büm hashihlei büm kei lei, hatü din chadai.

¹⁵ Hapheikü Naaman hatü büpa mü nyupüthü peü Kahvang shennyak touei nyokei leiyei büpa touei yaongtü, “Israel mü lenei kahdoknyü kü meleiyao Kahvang neshiü shei nyingteke. Chingmeilemlingei nüngei chongphobü leipü hapa laklei yahtuh” shei e.

¹⁶ Elisha-i, “Ngei chongphopü ngelei vanyangyem Shembüpalei men kü ngei vangei enyeih, ngei hapa laklei neyahpih” shei e. Naamani hapa yahtuh shei nyean, shejao büpai ha neyah.

¹⁷ Hanangkü Naamani, “Nüngi ngelei laklei neyah-ü shei ejema, gadu nyi kosham kahdok shoei shemei leihahnüng yahshih; mehenangkü sheyü nüngei chongphobü ngei hajük kü Shembüpa mü lenei lebü Kahvang kü moila neshuohpih.

¹⁸ Shejao Shembüpai nüngei chongphobü kü hapa dou lemhük shingvaishi mang nyemtükpha: Mechem ngelei ongpai Rimmon phopshemei khümnüng shühenshang, büpai ngelei lak kü khaaitü ngeiyao Rimmon phopshemei aümei khümnyeih; Shembüpai hapa nangkü nüngei chongphobü kü mang nyemtükpha” shei e.

¹⁹ Elisha-i, “Meishi leite” shei e, hatü Naaman layaongei lei. Shejao mechem Naaman büpa toueipü kansho hük daiyei nyupa,

²⁰ Kahvang shennyak Elishalei chongphobü Gehazi-i, “Ngelei shembüi hapa Aram am Naamani koei peipü meheyao neyah-i ahshiüng yaüshole kü deishihtükteke. Vanyangyem Shembüpalei men kü ngei büpa phei mokei daiyei büpa leipü lemhük yahhen” shei deih.

²¹ Hanangkü Gehazi-i Naaman pheikü changei dai. Mechem Naamani shennyak hanei büpa phei mokjapü eepa, büpai büpa mü pongteinüng koyei khari leipü shüh-ei, “Lemhük shahhidou nyüpü je?” shei phe.

²² Gehazi-i, “Hih” shei e. “Shaang-üng thibüthü khong kübü nethe nyi phaüshang kahmük Ephraim leipü ngei touei peiküpeih. Chingmeilemlingei jijinyi kü ngin haja jem hatü nyipa jeiteihen büm-ow shuohtükütuh shei ehen büpai ngei nüng touei shompeih” shei e.

²³ Naamani, “Ngin haja vok-ang yahhahtuh” shei e. Büpai büpa kü nyeanei ngin haja vok khoung nyi kü shihtü shateke, hatü nyipa jeiteihen büm-ow shuoh-ei büpalei chongphobü nyi Gehazi shekü shom.

²⁴ Mechem Gehazi-i kahshang ngoipa, büpai jijinyi leipü khoung yah-ei shem mongei shüei tuh. Büpai Naamanei chongphobü nyi leishihtük.

²⁵ Hapheikü büpa shem mongei shüei laophülei shembü Elisha touei yaongteke. “Gehazi, nüng melei nyupa?” shei Elisha-i phe. Gehazi-i, “Nüng chongphobü ngei meleiyao nedaiangpih” shei e.

²⁶ Shejao Elisha-i büpa kü, “Mechem hapa shennyak nüng mü pongnüng koyei khari leipü shühpa, hahepak kü ngelei laangha nüng mü nenyupü vaishi je? Hapayü lop, büm-ow, olive kahthü, nyalingngupai, mi, mohoh nevaijü nyüha, hatü baha aa yahhen hepak je?

²⁷ Hanangkü Naamanei ngomdin nüng hatü nüngei hühiha kü den kü bahhen” shei e. Hapheikü Elisha toueipü Gehazi lüdai, hatü büpa shüdao kei shoshi ngomei nyuteke.