2 ONGPATHÜ 23 - DAÜLANGPÜ LAIHING (BSI)

Josiah-i Vangpüshuwpü Ne Lingei Leipü

¹ Hapheikü ongpai Judah hatü Jerusalem kü nyupü behethü peü chemi nyükei thaihü.

² Büpai Shembüpalei shemei Judah hatü Jerusalem nanglakthü, ngongpathü, thibüthü hatü longpü maanpü nanglakthü peü müei aongteke. Shembüpalei shemei dangpü vangpüshuwpü laitap leipü shahthü peü jom peüi danshi büpai ieteke.

³ Ongpai shemnyü touei yaongtü Shembüpa phei mühen, büpalei shahkungnyüthü, vanglemthü peü büpalei mongdang hatü laangha kempai vangpüshuwpü laitapei nyangei nyupükei dükhen shei Shembüpa touei vangpüshuwpü ling.

⁴ Hapheikü ongpai Hilkiah ngongchong hatü sheühteipü ngongpathü, hatü Phopshem shaden yompüthü kü Phopshem mongeipü Baal kahvang, Asherah nyüha kahvangthü, hatü lithathü kü khümshingkü noteipü douhinangthü ngaikei shei ngeükhüam shuoh. Büpai hathü Jerusalem haolei Kidron Kahjilei deiyei aw kü jaktük, hatü hapalei depla Bethelei dei.

⁵ Judah ongthüi Judah jilathü hatü Jerusalem shonei vaümchongthü, Baal kahvang, vanghe, lennyü, kahdoknyüthü hatü lithathü kü ayingshü jakei khümhen shingvaishi jepü ngongpathü peü ngongpa dousho kübü dohtük.

⁶ Büpai Shembüpalei Phopshem leipü Asherah nyüha kahvangei lajei chingnyü haolei Kidron Kahjilei deiyei aw kü jaktük, hatü hapa depla yah-ei khih mü ngümtü ching mahngchongei haitük.

⁷ Büpai Phopshemei büm yupüthülei yow bentük; halei nyühathüi Asherah nyüha kahvang kü khümhen ashak dakhamteke.

⁸ Büpai Judah leipü ngongpathü peü müei dei, hatü ngongpathüi ayingshü jakei moila shuohteipü moidüthü peü Geba kübü Beer-sheba thahshi sheihtük. Chingnyülei shüshingkü laknyongphi lemei chingnyü kü governor vaihampü Joshua-i lingpü shadenei shüpü lem touei nyupü moidüthü peü bentük.

⁹ Hathü ngongpathü kü Jerusalemei Shembüpalei moidülei chongnephojao jomei küphü ngongpathü mü daw neshihpü aan hahhamteke.

¹⁰ Josiah ongpai Ben-Hinnom Kahjilei nyupü Topheth metouei lebü kahvangthü kü khümteipa, hapa shing sheihtük; hanangkü üpaiyao hatouei Molekh kahvang kü laophülei hapeü aw kü jakei moila neshuoh-aok.

¹¹ Judah ongthüi vanghe kü khümhen shingvaishi daütüktü Shembüpalei Phopshem shaden touei tuhpü koyeithü büpai deitükkem, hatü vanghe kü khümshingkü noteipü koyei kharithü aw kü jaktük. Hathüyü lakchongbü Nathan Melekhei shem kübü taishi nevai, shaden yopailei nyuteke.

¹² Ahazlei dokpa dung-am adokei Judah ongthüi lingpü moidüthü, hatü Shembüpalei Phopshem chingshelei Manasseh ongpai lingpü moidüthü büpai benei yaktük. Büpai haleipü hathü benei deiyei khih mü nihtüktü Kidron Kahjilei nyüp kei yaktük.

¹³ Israel amei ongpa Solomoni Sidon amei jiühitnalaipü Astartes nyüha kahvang, Moab amei jiühitnalaipü Kemosh kahvang, Ammon amei Molekh kahvang, hathü kü khümhen shingvaishi Jerusalem heongphi kü hatü Olive Kahshang pehephi kü vepü moidüthü peü sheihtük.

¹⁴ Josiah ongpai yaong shemnyüthü nihtükkem, Asherah nyüha kahvangei lajeithü bapei yaktük, hatü büpai hapa shingthü kü shennyakei vangi matük.

¹⁵ Nebatei cheha Jeroboami Bethelei lingpü moidü, mepa homei Israel am mang thahhü, büpai hapayao bentük. Büpai vaümchongthü awi haptük hatü khih mü nihtük hatü Asherah kahvangao aw kü jaktük.

¹⁶ Hapheikü Josiah-i shineileyei veishingkü shangching philei büpai mahngchong eeyei büpai haleipü vangtaothü yah-ei moidülei hapa sheihhühen shingvaishi jak. Hapayü Kahvangei shah Kahvang shennyak homei yeihshi eyei nyupü jiühühen dhaümteke.

¹⁷ Ongpai, “Ngei eepü mahngchong yaongü meheang?” shei phe. Hahepak kü chingnyü leipü shennyakthüi, “Hapayü Bethel leipü moidü kü eelaei epü, mepa dou nüngi shaang dükpa, hapa jung teteivanei epü Judah leipü peipü Kahvang shennyakei mahngchong khih” shei e.

¹⁸ Josiah-i, “Hapakei nyemnyu; üpaiyao büpalei vangtao tenüngtük” shei eteke. Hanangkü jomi büpalei vangtao hatü Samaria leipü peipü thibüthülei vangtao hapakei neyaktüki hatouei tuh.

¹⁹ Büpai Bethelei dükpü keiha Josiah-i Israel ongthüi Samaria chingthülei lingpü vaümchongthü, mepai Shembüpa mongshihhüpa, büpai hathü bentük hatü sheihtük.

²⁰ Josiah-i hapa vaümchongthü leipü ngongpathü moidü shangei jü hatü jomphong shangkü shennyakei vangtaothü jakteke. Hapheikü büpa Jerusalemei nyokei leidai.

Hompü Mo

²¹ Josiah ongpai nanglakthü peü kü, “Vangpüshuwpü lai kü nyangei nyupükei Shembüpa, ammei Kahvang kü dhüm shuoh-ei Hompü Mo hahtuh” shei eteke.

²² Israel kü shahphenbüthüi müpü nyihthü, nevaijü Israel hatü Judah kü ongthüi vanglem lempü mepa hepak kao hapa keipü Hompü Mo nehahham;

²³ shejao Josiah ongpai vanglem lempü bong anpüshetpabü kü Jerusalemei Shembüpa kü hapa Hompü Mo moteke.

Josiah-i Yeiyahüpü Lebü Douthü

²⁴ Ngongchong Hilkiah-i Phopshemei dangpü lai kü nyangei nyupü shahkungnyüthü dükhen shingvaishi Josiah ongpai Jerusalem hatü Judah kahdok peü leipü laang kü shah eteipü, lashüh dokpüthü hatü shemongei khümteipü kahvang, lajeithü, hatü kung amei jiühitnalaipü douhinang peü yaktükkem.

²⁵ Mongdang, laangha hatü wong kempai Mosa Shahkung kü nyupükei jiüshi dükei Shembüpa touei heihpü ongpa büpa she kao hatü büpa phei kao nenyu.

²⁶ Shejao Manasseh ongpai dükpü mang nangkü Shembüpai Judah am kü mongshihpü büpai neyahlang.

²⁷ Hanangkü, “Ngei Israel am changtükpü keiha, ngei Judah amao changtükhen, hatü ngei Jerusalem hatü ngei jepü Chingnyü yaktükhen, hatü ‘Ngei kü khümhen shing’ shei ngei epü hapa Phopshemao yaktükhen” shei Shembüpai eteke.

Josiah-i Vanglem Lempü Dohpü

²⁸ Josiah-i dükpü lebü douthü, hatü büpai dükpü douthü kemei Judah Ongthülei Büshah Laitap kü nyangei nyüpeih.

²⁹ Josiah ong vaipü nyih kü Ijip ong Pharaoh Neko-i Euphrates yungyen thahshi Assyria am kü sheühhen aong. Josiah ongpai büpa mü ponghen heih; mechem Pharaoh Neko-i büpa Meggodolei heüpa, büpai büpa jütük.

³⁰ Büpalei chongphobüthü Megiddo leipü büpalei mahng koyei khari kü shihtü Jerusalemei leiyei büpalei mahngchongei vüteke. Hapa kahdok kübü nanglakthüi Josiah-lei cheha Jehoahaz ong vaihen je, hatü chepalei shing kü ong vaihüteke.

Judah amei Jehoahaz Ongpa

³¹ Mechem Jehoahaz Judah amei ong vaipa, büpalei nyübüh bong hapüjem nyuteke, hatü büpai Jerusalemei lenyang jem ong vaiteke. Chenyü-ü Libnah am Jeremiahlei yiükha Hamutal nyu.

³² Chebü chepa ami dükpükei büpai Shembüpa touei mehe mang nyu, ha dük.

³³ Mechem Pharaoh Neko-i büpa Hamath kahdok Riblahlei khoklat kü tuhpa, büpai vanglem lempü dohdaipeih; hanangkü büpa Jerusalemei vanglem nelemaok, hatü Judah am kü ngin dok 3, 000 hon dok 30 bom yüei yahhampeih.

³⁴ Pharaoh Neko-i Josiahlei cheha Eliakim chepa Josiahlei shing kü jeiyei ong vaihü, hatü büpa kü Jehoiakim shei men jeiteke. Shejao Pharaoh Neko-i Jehoahaz Ijiplei müei yiü, hatü halei büpa di.

Judah amei Jehoiakim Ongpa

³⁵ Ijip ongpai yüpü bom shuohhen shingvaishi Jehoiakimi nanglakthü kü laophü laophü kü mop peipü aimü hon hatü ngin shathai thaiteke.

³⁶ Jehoiakim vanglem lemei chongpang shingkü büpa bong hapünga behe nyu; büpai Jerusalemei bong anpühük ong vaiteke. Chenyü-ü Rumah am Pedaiahlei yiükha Zebidah nyu.

³⁷ Chebü chepa ami dükpü keiha büpai Shembüpa touei mepa mang nyu, ha dük.