2 ONGPATHÜ 2 - DAÜLANGPÜ LAIHING (BSI)

Elijah Vangsholei Anlangpü

¹ Mechem Shembüpai Elijah alüngleple kü vangsholei anlanghen hepak ngoipa, Elijah hi Elisha nyi Gilgal lemei daiyei nyu.

² Elijah-i Elisha kü, “Nüng hatouei chongkei; mehenangkü Shembüpai ngei Bethelei deishihnyu khih” shei e. Shejao Elisha-i, “Vanyangyem Shembüpa, hatü nüngei men kü enyeih, ngei nüng netuhphongpih” shei e. Hanangkü jiji chemi Bethelei yiü.

³ Bethelei nyupü thibüthü khong hük peiyei Elisha kü, “Shembüpai shinnyih nüngei shembü nüng toueipü yahlanghen shei nyingpü je?” shei phe. Elisha-i, “Hih, ngei nyingnyeih, shejao hapa jung telangmaankei” shei e.

⁴ Hapheikü Elijah-i büpa kü, “Nüng hatouei chongkei, Shembüpai ngei Jerikolei deishihnyu khih” shei e. Shejao Elisha-i, “Vanyangyem Shembüpa, hatü nüngei men kü ngei enyeih, ngei nüng netuhphongpih” shei e. Hanangkü jiji chemi Jerikolei yiü.

⁵ Jerikolei nyupü thibüthü khong hük peiyei Elisha kü, “Shembüpai shinnyih nüngei shembü nüng toueipü yahlanghen shei nüngi nyingpü je?” shei phe. Elisha-i, “Hih, ngei nyingnyeih, shejao hapa jung telangmaankei” shei e.

⁶ Hapheikü Elijah-i Elisha kü, “Nüng hatouei chongkei, Shembüpai ngei Jordanei deishihnyu khih” shei e. Shejao Elisha-i, “Vanyangyem Shembüpa, hatü nüngei men kü enyeih, ngei nüng netuhphongpih” shei e. Hanangkü jiji chemi dai.

⁷ Hapheikü thibüthü khong hük jom pinyipüanao jiji phei müei daiyei Elijah hi Elisha nyi Jordan yungyenei uopü shing kübü ajüki khaatei heihtü jomphongao uoteke.

⁸ Hahepak kü Elijah-i büpalei ashak yah-ei temtü yung kü bhei, hatü jiji kahvan kü yung manghomdai thahshi laknyong lakdah philei yung handai.

⁹ Mechem jijinyi yung hompa, Elijah-i Elisha kü, “Ngei nüng toueipü anlanghen shekü ngei nüng kü mehe dükhahhüpüshang eshih” shei e. Elisha-i, “Nüngei ngan mükjüp phaihan shing nyi ngei kü yahshih” shei e.

¹⁰ Elijah-i büpa kü, “Nüngi wongpü dou yüpü khih, shejao mechem nüng toueipü ngei anlanghen, nüngi ngei kü veijema, nüngi hapa danghen, hei nevaijema nedangpih” shei e.

¹¹ Jiji shah eteiyaki kami nyushingkü ngangahük kü aw koyei khari keiha aw koyei hüki jijinyi aa kü heihtü Elijah-ü alüngleple-i vangsholei anlang.

¹² Elisha-i ha eetü lenei, “Opa! Opa! Israel amei koyei kharithü hatü koyei shennyakthü!” shei e. Elisha-i hajük kü Elijah ne-ee. Hanangkü büpai büpalei ashak kü düktü nyi anei shaaktük.

¹³ Büpai Elijah leipü vüjapü ashak homei yah, hatü nyokei leiyei Jordan yungkungei yaongteke.

¹⁴ Büpai Elijah leipü vüjapü ashak yah-ei yung kü bheitü, “Elijahlei Shembüpa Kahvang melei nyüpa?” shei e. Mechem büpai yung kü bheipa, hahepak kü laknyong lakdah kü yung handaitü büpa kahvan kü kamei lei.

¹⁵ Jeriko leipü thibüthüi tailei büpa eeyei, “Elijahlei ngan Elisha kü bakshi nyüke” shei e, hatü jomphongi büpa touei peiyei aümei sha.

¹⁶ “Veituh, nüng chongphobüthü hamphong khongkü wong kohpü shennyak pinyipüan nyüpeih. Nüngei shembü yemnüng hathü deishihshah. Üpai nyingpa, Shembüpalei laanghai büpa müei daiyei kahshang nevaijü kahji haneilei tuh-ei shiühen aokpeih” shei jomphongi e. Elisha-i jangei, “Tah, hathü tedeishih” shei e.

¹⁷ Shejao büpai jomphong kü tah shei ehen veüshi jomphongi büpa kü nyeanteke. Hanangkü büpai, “Jomphong deishihtuh” shei e, hatü jomphongi shennyak pinyipüan shomei nyih jem thahshi yem, shejao jomphongi büpa nedang.

¹⁸ Mechem jomphongi Jerikolei Elisha touei nyokei leipa, büpai jomphong kü, “Tedai shei ngei amphong kü ela?” shei e.

Elisha-i Yashanpü Dou Dükpü

¹⁹ Shaang hapa chingnyü kübü shennyakthüi Elisha kü, “Hapa chingnyü-ü shinghiphei ahshi-üng meishi, ha nüngiyao eeyei nyüke. Shejao yung nemei, hatü kahdok kü betjükvungjük nejüknyu” shei e.

²⁰ Büpai, “Ngei touei chilimji ja hük kü hüm shihtü deikei” shei e. Hanangkü jomphongi büpa touei ha deijateke.

²¹ Hapheikü büpai yunglok touei ha notü heih-ei hapa hüm halei langtü, “Shembüpai hapakei enyüke: ‘Ngei ha yung daühütüktih. Hajük kü mechemao dipü mahpü nevamhüpih nevaijü kahdok kü betjükvungjük nejüki nenyupih’ ” shei e.

²² Hanangkü Elisha-i epü shah keiha shinnyih thahshi hapa yung daülangi nyüpeih.

²³ Elisha-i Jeriko leipü layaongei Bethel yemei aong. Büpa lemei kamei nyushingkü chingnyü leipü bahanaüthü hanei vamei büpa kü yaüeilungei, “Shangpaangpa lüdaituh! Shangpaangpa lüdaituh!” shei e.

²⁴ Büpai yaakei leiyei jomphong kü veitü Shembüpalei men kü jomphong kü thaüvaü. Hahepak kü sheptao chenyü nyi yingnyü leipü vamei bahanaüthü jom pinyipünyi thahshi shükei jütük.

²⁵ Haleipü büpai Karmel Kahshangei aong, hatü haleipü Samarialei nyokei leidai.