2 ONGPATHÜ 19 - DAÜLANGPÜ LAIHING (BSI)

Hezekiah-i Isaiah Leipü Sheühpü Napü

¹ Mechem Hezekiah-i ha danpa, büpai laophülei ashak shaaktük, hatü dhoila ashak ümtü Shembüpalei shemei dai.

² Büpai ongshem veibü Eliakim, laknyangbü Shebna hatü ngongpa behethü jom peü dhoila ashak ümtü Amozlei cheha Isaiah thibü touei shom.

³ Jomi büpa kü, “Hezekiah-i hapakei enyüke: Shinnyih-ü shangpongpü, hanghipü hatü veü pongpü nyih khih. Jenü nyüha hük naü bühhen hepak ngoidaijü hapa naü bühhen wong neshiüpükei hetteke.

⁴ Assyria ongpai büpalei Rabshakeh shomei vanyangyem Kahvang kü longi yaüeilungei eteke, hatü hapayü Shembüpa nüngei Kahvangi ha dan, hatü Shembüpa nüngei Kahvangi hathü shah nangkü büpa kü hanghi shuohhen. Hanangkü aoei nyupü nanglakthü shingvaishi nüngi phoptuh” shei e.

⁵ Mechem Hezekiah ongpalei chongphobüthü Isaiah touei peipa,

⁶ Isaiah-i jomphong kü, “Ammei shembü kü, ‘Shembüpai hapakei enyüke’ shei etuh: Ngei kü yaüeilungei Assyria ongpai büpalei chongphobüthü homei epü shah danei nüng tenyem.

⁷ Ahpühupü ngeü danhen mü ngei büpa kü laangha hük shuohhen, hatü büpa laophülei kahdokei nyokei leihen, hatü ngei büpa laophülei kahdokei yani mahhühen” shei e.

Assyria ami Nyipabü Nyemshaopü

⁸ Mechem Rabshakeh leipa, büpai Assyria ongpayü Lakhish leipü lüdaiteke shei danei büpa mü pongteinüng heihjashingkü ongpayü Libnah am mü hokei chongjateke.

⁹ Shaang Sennakeribi Kush am Ijip ongpa Tirhakah büpa mü hokhen aongkünyükeja shei danei büpai shao Hezekiah touei phongmokbüthü shomei,

¹⁰ “Hezekiah ongpa kü hapakei etuh: ‘Assyria ongpalei lak kü Jerusalem neshuohpih’ shei nüngi mongnyangpü Kahvangi nüng telutelemhü.

¹¹ Hingmei, Assyria ongpai jatthü kü mekei dük, mekei chemjalak kü lihümtükpa, ha nüngi danei nyüke. Shejema nüng yangaokhen khih je?

¹² Gozan, Haran, Rezeph hatü Tel Assarlei nyupü Eden am hathü jatthülei kahvangthüi hamei bühipai mahtükpü kübü yangshuohla?

¹³ Hamath ongpa, Arpad ongpa, Sepharvaim chingnyü leipü ongpa, Hena ongpa nevaijü Ivvah ongpa melei melei nyüpa?” shei hapa shah eteke.

¹⁴ Hezekiah-i phongmokbüthü leipü lai dangei ieteke. Hapheikü Shembüpalei shemei aongei Shembüpa touei hapa paanteke,

¹⁵ hatü Hezekiah-i Shembüpa kü, “Oh Shembüpa, Israel Kahvang, cherubim nyi aa kü ong uoshing kü uopüba, kahdoknyü ongchingthü peü shak kü nüng monha Kahvang; nüngi vangsho hatü kahdoknyü lingpeih.

¹⁶ Nüngei dhaong shangshih, Oh Shembüpa, hatü banglangshih; Oh Shembüpa, nüngei mük vamei veishih; Vanyangyem Kahvang kü yaüeilungei epü Sennakeribei shah kü bangtuh.

¹⁷ Hingmei mü, Oh Shembüpa, Assyria ongthüi lebü jatthü mahtükkemteke, hatü jomei kahdokthü lavüngtoiyei yakphongteke,

¹⁸ hatü jomei kahvangthü shennyakei laki pü hi yaong yah-ei lingpü vaijao kemei aw kü jaktük hatü mangtükteke.

¹⁹ Hanangkü shaang, Oh Shembüpa, hamei Kahvang, kahdoknyü ongchingthü peüi Oh Shembüpa, nüng monha Kahvang shei nyinghen shingvaishi nüngi ham büpalei lak kübü yangshih shei phopnyüpeih” shei phopei e.

Ongpa Touei Isaiahlei Shahjang

²⁰ Hahepak kü Amozlei cheha Isaiah-i Hezekiah ongpa kü shahjang hük shomei e: Shembüpa, Israel Kahvangi hapakei enyüke: Assyria amei ongpa Sennakerib nangkü nüngi phoppü ngei dantepih.

²¹ Büpa khüei Shembüpai epü shah-ü hapa khih: “Pai mü ngühpü Zion nela-i nüng yaktüknyeih, hatü thaüvaünyeih. Jerusalem nela-i nüng nyaishingkü ngaüm thauknyüpeih.

²² Nüngi hajük yaüpülungpü hatü eelapü üpaang? Üpa khüei nüngi nüngei ngeü annya, hatü changmei mük veinya? Hapayü Israel amei Daülangpü Hük khünyu khih!

²³ Nüngei phongmokbüthü homei Shembüpa kü eelateke, hatü nüngi, ‘Ngelei koyei kharithü mü ngei kahshangthü shaopülei aongtepih, Lebanon shangchingthülei aongtepih; Ngei haleipü peü mü shaopü cedar püthü, hatü awkaongpüthü agtepih; Ngei hapa phaüjung ngoitepih, hatü yinghilong chi thahtepih.

²⁴ Ngei kung kahdokei yungkuk shotepih, hatü haleipü yung yingtepih, Ngelei labha-i shuopei Ijip amei yungyenthüao cheptüktih’ shei eteke.

²⁵ Nüngi ha nedanangpü je? ngei ha tempheikü hepak longi daiteke, penyü showtükpü chingnyüthü nyüp yakshing leitükhen shei ngei aivang den mebü küpjan tempeih, hatü ha shaang dhaümnyu khih.

²⁶ Halei nyupüthü wong neshiüi mong mahdaiteke, hatü veü pongteke. Jomphongü kah leipü sheili hatü phenhani kei, hatü shem adok kü kohpü thüng longshekü vandaipükei nyüke.

²⁷ Shejao nüng uopü yaongpü, nüng daipü leipü, hatü nüngi ngei khüei depü nyingnyüpeih.

²⁸ Mehenangkü nüngi ngei mü depü nangkü, hatü nüng changmeipü ngelei peipü nangkü, ngei nüngei shong kü nyiamphaak, hatü nüngei ju kü nyiam ühhen, hatü nüng peipü lem kü ngei nüng nyokei leishihhen.”

²⁹ Hahepak kü Isaiah-i e, “Nüng shingvaishi nyangeihepü hük ha nyukahen, Oh Hezekiah: Shenüngü mehe nyingnying vamei jüknya, ha hahtuh, hatü bong nyipabü keyü mehe ha kübü vamei jükkahenshang ha hahtuh, hatü bong jempabü keyü sheituh, hatü vettuh; nyalingngupai sheituh hatü hapa betjük hahtuh.

³⁰ Aopü Judah am phang shao kah mongei tünglang yiühen, hatü shakei betjük jükhen;

³¹ mehenangkü Jerusalem leipü aopü shennyakthü, hatü Zion Kahshang leipü yangpü shennyakthü vamkahen. Shembüpa nyakpükenpai hapa dükkahen.”

³² Hanangkü hapayü Assyria amei ongpa nangkü Shembüpai epü shah-ü hapa khih: “Büpai hapa chingnyülei neshühen, nevaijü lahhan nekaphen. Büpai hatouei inyüshung notü nepeihen, nevaijü ching shümhen yaongpe neshowküpih.

³³ Büpai peipü lem kü-üng nyokei lüdaihen; Büpai hapa ching kü nepeiaokpih, shei Shembüpai enyüke.

³⁴ Ngei hatü ngelei chongphobü Davidei men kü ngei hapa chingnyü honglangtü yanghen.”

³⁵ Ha ya-üng Shembüpalei vangsho phongshan daiyei Assyria amei baümtap leipü veshanthü 1, 85, 000 jütük. Mechem shennyakthü nepphei paojapa, mahng monha maei nyuteke.

³⁶ Hanangkü Assyria amei Sennakerib ongpai baümtap benphongtü leidai. Büpa Ninevehlei leiyei halei nyu.

³⁷ Nyih hük büpa büpalei Nisrokh kahvangei khümshemei khümei nyushingkü cheha Adrammelekh hi Sharezer nyi-i büpa jüphongtü Ararat kahdokei nyaiyei lüdai. Cheha Esarhaddoni büpa kü jeiyei ong vaiteke.