2 ONGPATHÜ 18 - DAÜLANGPÜ LAIHING (BSI)

Judah amei Hezekiah Ongpa

¹ Israel kü Elahlei cheha Hoshea-i ong vaipü bong jempabü kü Hezekiahlei cheha Ahaz-i Judah kü ong vaiteke.

² Ong vaipü hepak kü büpalei nyübüh bong hapünga nyu, hatü büpai Jerusalemei bong hapüshü vanglem lem. Chenyü-ü Zekhariahlei yiükha Abijah nyu.

³ Büpai chebü Davidi dükpükei Shembüpa touei mehe jiü, ha dük.

⁴ Büpai vaümchongthü, daülangpü yaongthü, hatü Asherah kahvangei lajeithü yaktük. Büpai Mosai lingpü melangnyiam biü khih mü mangtük; mehenangkü hapa hepak thahshi Israel ami hapa kü ayingshü jakei moila shuohhamteke. Hapa kü Nehushtan shei nyükteke.

⁵ Hezekiah-i Shembüpa, Israel amei Kahvang kü hinglem. Judah kü büpa keiha üpa ongpayao büpa shekü hatü büpa pheikü nenyu.

⁶ Mehenangkü büpai Shembüpa kü wongshongi shong, hatü büpa phei müpü nedoh; Shembüpai Mosa kü shuohpü shahkungnyüthü peü dük.

⁷ Shembüpa büpa mü nyu; büpai dükpü lemphü kü aokpü dang. Büpai Assyria ongpa khüei yaong, hatü büpai büpa chongnepho.

⁸ Büpai Philistia am Gaza thahshi, hatü hapalei kahmük kemei shangdü kübü chingnyü chingpe thahshi hahtük.

⁹ Hezekiah ongpai vanglem lempü bong alipabü kü, hatü Israel am Elahlei cheha Hoshea ongpai vanglem lempü bong nyetpabü kü Assyria am Shalmaneser ongpai Samaria hahnüng aongei shüm,

¹⁰ hatü bong jempabü dohpü philei Assyria ami omei yahlang. Hanangkü Samariayü Hezekiah-i vanglem lempü bong vokpabü kü, hatü Israel kü Hoshea-i vanglem lempü bong shüpabü kü hahtükteke.

¹¹ Assyria ongpai Israel am Assyrialei wüpei deiyei Habor Yungnyü yopailei Gozan kahdok Halah chingnyülei tuh, hatü haneiyü Media chingnyüthülei tuh.

¹² Hathü kemei jomi jomei Kahvangei ven nedanpü homei vam; jomi büpa mü vangteishuwteipü Shembüpalei chongphobü Mosa homei shuohpü mangtük. Jomi shahkungnyü nebang nevaijü nedük.

Assyria ami Jerusalem kü Nyemshaopü

¹³ Hezekiah ongpai vanglem lempü bong anpüalipabü kü Assyria am Sennakerib ongpai penyü showtükpü Judah amei chingnyüthü kemei omei yahlang.

¹⁴ Hanangkü Judah ongpa Hezekiah-i Lakhishlei nyupü Assyria ongpa kü, “Ngei pungteke. Ngei toueipü lüdaishih, hatü nüngi mehe yühenshang, ngei shuohhen hih” shei shahjang shomei e. Assyria ongpai Judah am Hezekiah ongpa kü ngin dok haja an, hatü hon dok haja hük yüteke.

¹⁵ Hezekiah-i Shembüpalei shem hatü ongshemei nyupü ngin kemei shuohtük.

¹⁶ Hahepak kü Judah ongpa Hezekiah-i Shembüpalei shem shaden kü, hatü shaden shemnyü kü büpai jümpü hon kemei nyiukei Assyria ongpa kü shuohtük.

¹⁷ Assyria ongpai Tartan, Rabsaris, hatü Rabshakeh hathüi mütü veshan longi Lakhish leipü Jerusalemei Hezekiah ongpa touei shom. Jomi Jerusalemei peiyei Dokpa Yungkuk leipü yunghow touei ashak dhopüthülei lemei yaong.

¹⁸ Jomi ongpa kü nyükshingkü ongshem veibü Hilkiahlei cheha Eliakim, laknyangbü Shebna, hatü Asaphei cheha Joah, nyangbü jomphong vamei heih.

¹⁹ Rabshakeh-i jomphong kü, “Longpü Assyria ongpai hapakei enyüke: Nüngü mehe kü mongnyangshi nyunya?

²⁰ Shah nganga epai ponghok vanshenghen shingvaishi kon hatü wong hih shei deihnyu je? Ngei khüei yaonghen mü nüng üpa kü mongnyangtü yaongnya?

²¹ Veituh, Ijip amü lak kü hühhahhen nevaijü aokhahhen mü nihdaipü bhuknyü lenshuoh kei nyüke; nüngi jom kü mongnyangshi nyüke. Ijip ongpa Pharaoh kü mongnyangpüthü peü hapakei mon pongnyüpeih.

²² Shao nüngi ngei kü, ‘Hami Shembüpa, hamei Kahvang kü mongnyangnyeih’ shei ejema, Judah hatü Jerusalem kü, ‘Ammi Jerusalemei hapa moidü touei khümtuh’ shei etü hapalei vaümchongthü hatü moidüthü Hezekiah-i yaktükpü ha nevaipü je?

²³ Shaang heihkei hatü hamei shembü Assyria ongpa mü eteituh. Nüngi shennyakthü uohüaokhen vaijema ngei nüng kü koyei haja nyi yahphahen hih.

²⁴ Nüngi koyei khari hatü koyei veshanthü nangkü Ijip am kü monglemjao nüngi mekei etü Assyria am peü mü maanpü veshan mübü mü khüei hokaokhenang?

²⁵ Nyeinya vaishi SHEMBÜPAleipü shah neshiüpü kü ngei ching hahhen hatü mangtükhen shei peipü je? Shembüpa, büpai-üng aongei ngei kü hapa kahmük khüei yaonghen, hatü mahtükhen ephopeih” shei e.

²⁶ Hahepak kü Hilkiahlei cheha Eliakim, Shebnah hatü Joah nyi-i Rabshakeh kü, “Chingmeilemlingei nüngei chongphobü henji kü Aramaic shah mü eshih; henjinyi-i dannyüpeih. Chingnyü bham shangei nyupü nanglakthüi danshi Hebrew shah mü te-ekei” shei e.

²⁷ Shejao Rabshakeh-i jangei, “Ngelei shembüi ammei ongpa hatü am kü mon ha ehen shompü je? Ammi keiha laophülei nühinam hahhen hatü shien yinghen hamü uoshi nyupü nanglakthü kü ne-ehen je?” shei e.

²⁸ Hahepak kü Rabshakeh-i yaongtü Hebrew shah mü wongmü lenei nyüktü, “Longpü Assyria ongpalei shah bangtuh!

²⁹ Ongpai hapakei enyüke: Hezekiah ongpai am kü telutelemhah. Büpai ngelei lak leipü amphong neyangaokpih.

³⁰ Hezekiah-i Shembüpa kü hinglemtuh shei am kü yawhpüyangpü phei temü; mehenangkü büpai, ‘Hingmei Shembüpai jen yangphahen; hapa chingnyü Assyria ongpalei lak kü neshuohpih’ shei epü kü mongtelem.

³¹ Hezekiah-i epü tebang. Assyria ongpai hapakei enyüke: ‘Ngei mü chingmei lingtuh, hatü ngei touei shakei vamdaikei. Ngei am wüpei mangdeilang thahshi am peüi laophülei nyalingngupai, hatü adhajük hahaokhen, hatü laophülei yungdük kübü yung yingaokhen;

³² hapheiküang ngei peiyei ammei kahdok keipü kahdokei hahying hatü yiüja vampü kahdok, aan hatü nyalingngupai vampü kahdok, olive pü hatü nyahjiü maei nyupü kahdokei ngei amphong deilanghen. Dilem nevai yangnyu nyuhen lem jetuh.’ Hezekiah-i epü kü tebang; mehenangkü büpai amphong kü, ‘Shembüpai jen yangphahen’ shei eyei amphong lemnyong kü münyüke.

³³ Assyria ongpalei lak kübü mepa jatei kahvangi laophülei kahmük yangaokpa?

³⁴ Hamath hatü Arpad amei kahvangthü melei nyüpa? Sepharvaim, Hena hatü Ivvah amei kahvangthü melei nyüpa? Jomi ngelei lakmong leipü Samaria chemao yangaokla?

³⁵ Hathü kahmükthülei kahvang üpai laophülei kahmük ngelei lakmong leipü yangei nyüpa? Shejemü mekei etü Shembüpai ngelei lakmong leipü Samaria yangaokhen?” shei eteke.

³⁶ Shejao nanglakthüi meheyao shah kü neleitei-i nenmü nyu; mehenangkü ongpai jomphong kü, “Ammi büpalei shah kü teleitei” shei etüktü nyu.

³⁷ Hapheikü Hilkiahlei cheha Eliakim ongshem veibü, laknyangbü Shebna, hatü Asaphei cheha nyangbü, Joah hathüi Hezekiah touei jomei ashak shaaktükkemtü peiyei Rabshakeh-i mehe eshuohpa, ha peü büpa kü ejateke.