2 ONGPATHÜ 16 - DAÜLANGPÜ LAIHING (BSI)

Judah amei Ahaz Ongpa

¹ Remaliahlei cheha Pekah Israel kü ong vaipü bong anpünyetpabü kü Jothamei cheha Ahaz-i Judah kü ong vaiteke.

² Ahaz-i vanglem lemei chongpang shingkü nyübüh bong kukha nyu, hatü büpai Jerusalemei bong anpüvok vanglem lem. Chebü Davidi dükpükei nevai-i büpai Shembüpa büpalei Kahvang touei mehe jiü, ha nedük,

³ shejao büpai Israel ongthülei lem kü kam. Lebü jatthüi dükteipü jiühitnalai vanglem keiha büpai laophülei hapeü aw kü jakei lajei kü moila shuoh. Hanangkü Israel am shekü Shembüpai hapa kahdok kübü jom changtükpeih.

⁴ Büpai vaümchongthü, shangtaothü kü hatü püphang peü touei jakpü moila hatü ayingshü jakpeih.

⁵ Hahepak kü Aram am Rezin ongpa hatü Israel am Remaliahlei cheha Pekah ongpa nyi Jerusalemei hokhen aong, hatü Ahaz shümei yah, shejao jijinyi-i büpa neneüaok.

⁶ Hahepak kü Aram am Rezin ongpai Judah am changtüktü Aram am kü Elah kahdok nyokei lei. Hahepak kü Edom am Elahlei yiüei shinnyih thahshi halei nyunyeih.

⁷ Ahaz-i Assyria am Tiglath-Pileser ongpa kü phongmokbüthü shomei, “Ngeiyü nüngei chongphobü hatü nüngei ong naü-eepa. Hanangkü ngei mü hokpü Aram ongpa hatü Israel ongpa nyilei lak kübü nüng aongei ngei yangtuh” shei e.

⁸ Ahaz-i Shembüpalei shem hatü ongshemei nyupü hon hi ngin yah-ei Assyria ongpa kü thintho hük vaishi shom.

⁹ Assyria ongpai hapa kü khüambakei aongei Damaska hah, hatü haleipü shennyakthü Kirlei shetei dei, hatü Rezin ongpayü jütük.

¹⁰ Mechem Ahaz ongpai Assyria ongpa Tiglath-Pileser mü pongteinüng Damaskalei heihpa, büpai Damaskalei moidü hük eeyei Uriah ngongpa kü hapa moidülei jung kemei meishi nih-ei nyangtü leishih.

¹¹ Hanangkü Ahaz ongpai Damaska leipü shomshuohpü kei-üng Uriah ngongpai moidü hük Ahaz ongpa mangleija shekü ling.

¹² Mechem ongpa Damaska leipü nyokei leipa, hatü moidü eepa, büpai hatouei heih-ei ha shangei aong,

¹³ hatü hapa kü jakpü moila shuoh, hatü moidülei yiü moila hatü mongjempü iy moila haiteke.

¹⁴ Moidü ja hatü Shembüpalei shem nyi aa kü Shembüpa kü daüei tuhpü melangnyiam moidüyü büpai chaiyei deiyei büpalei moidü jalei apshaphi lemei tuhteke.

¹⁵ Ahaz ongpai Uriah ngongpa kü hapa ngeükhüam shuoh-ei, “Longpü moidü ja kü dhom mü hatü om mü jakei shuohpü moilathü, ongpalei jakpü moila, hatü hahying moila, hatü hapa kahdok kü nyupü nanglakthüi shuohpü jakpü moila, hahying moila hatü yiü moila kemei halei shuohtuh. Hapa moidü kü jakpü moilathülei iy hatü lebü moilalei iy kemei haituh, shejao melangnyiam moidüyü ngei phongyomteihen tuhtuh” shei e.

¹⁶ Ahaz ongpai epükei Uriah ngongpai lemphüli dük.

¹⁷ Ahaz ongpai Phopshem leipü chongnyiam yaong bhaokei yah, hatü haleipü chilimji yahlang. Büpai melangnyiami lingpü mohohbaong kü shongpü Yungching yah-ei chongnyiam yaong kü haüteke.

¹⁸ Assyria ongpa mongmeihühen nangkü Ahaz ongpai ong uoshing haüteipü dü Phopshem leipü shing chaitük, hatü Phopshemei ongpa shüteipü shaden küptük.

¹⁹ Ahaz ongpai dükpü lemphüli Judah Ongthülei Büshah Laitap kü nyangei nyüpeih.

²⁰ Ahaz di, hatü büpa David Chingnyülei ongthülei mahngchongei vüteke, hatü cheha Hezekiah-i büpa jeiyei ong vaiteke.