2 ONGPATHÜ 14 - DAÜLANGPÜ LAIHING (BSI)

Judah amei Amaziah Ongpa

¹ Jehoahazlei cheha Jehoash ongpai vanglem lempü bong nyipabü kü Judah am Joashlei cheha Amaziah ongpai vanglem lemei pang.

² Büpa vanglem lemei pangpü hepak kü büpa nyübüh bong hapünga nyu, hatü büpai Jerusalem kü bong hapüshü vanglem lem. Chenyü-ü Jerusalem lapeü Jehoaddin nyu.

³ Büpai Shembüpa touei mehe jiü, ha dük, shejao chebü David kei payü nevai; büpai dükpü lemphüli chepa Joash-i dükpükei dük.

⁴ Shejao büpai vaümchongthü payü neyaktük; nanglakthüi nedoh-i vaümchongthülei jakpü hatü lebü moilathü shuohhamteke.

⁵ Büpai ongching wong lakei shümhinüng chepa ongpa jütükpü lakchongbüthü büpai jütük.

⁶ Shejao Mosa Shahkungnyü Laitap kü, “Hapeüthülei mang nangkü nyühipa nejühen, nevaijü nyühipalei mang nangkü hapeüthü nejühen; mehenangkü laophülei mang nangkü laophü laophüi dihen” shei Shembüpai epü nyangei nyupü keiha büpai chepa jütükpü shennyakthülei hapeüthü nejütük.

⁷ Büpai Edom am haja an thahshi Hüm Kahjilei jü, hatü vanglük mü Sela omei yah; büpai hapa kü Jokthe-el shei nyük, hatü shinnyih thahshi hapa men nyüke.

⁸ Hapheikü Amaziah-i Jehoahazlei cheha, Jehulei chehü Israel amei Jehoash ongpa touei phongmokbüthü shomei, “Peikei, ji dhe dhe gongei hokshah” shei chüngteke.

⁹ Shejao Israel amei ongpa Jehoash-i Judah amei ongpa Amaziah kü shahnyok shompeyü, “Chem hepak kü Lebanon leipü hühbhao hüki Lebanon leipü cedar pü kü, ‘Nüngei yiükha ngelei hapeü mü shem yemhen yahshih’ shei shah shomshuohpüja, shejao Lebanon leipü phaüyem hük peiyei hapa hühbhao la-i shuoptükpüja.

¹⁰ Hayü khih nüngi Edom am neüteke, hanangkü shaang nüngi changmeinyüke. Nüngi dangpü menmei kü mong hüshemei shemei nyudaituh. Mehenangkü nüng mü Judah amao omei dohhen mü mehekei nüngi shanghah vongshüh yemhahnya?” shei e.

¹¹ Shejao Amaziah-i hapa nebang; hanangkü Israel am Jehoash ongpa aongei Judah kahdok Beth-Shemeshlei Judah ongpa mü thep pongteke.

¹² Judah amü Israel ami neühahtü peü shemei nyaiyei leidaikem.

¹³ Israel am Jehoash ongpai Joashlei cheha, Ahaziahlei chehü Amaziah, Judah amei ongpa Beth-Shemeshlei yepteke. Hapheikü Jehoash-i Jerusalemei peiyei Ephraim Shaden kübü Gomer Shaden thahshi feet kho vok hükshing mangtük.

¹⁴ Büpai Shembüpalei shem hatü ongshem leipü hon hi ngin, hatü dounyünangba kemei yahlang. Büpai yombüthüao yah-ei Samarialei leidai.

¹⁵ Jehoash-i dükpü lemphüli hatü büpai Israel ongpa Amaziah mü hokpü jung peü Israel Ongthülei Büshah Laitap kü nyangei nyüpeih.

¹⁶ Jehoash di, hatü Israel amei ongthü mü Samarialei vüteke, hatü cheha Jeroboam II büpa kü jeiyei ong vaiteke.

Judah amei Amaziah Ongpa Dipü

¹⁷ Jehoahazlei cheha Israel am Jehoash diphei kü Judah am Joashlei cheha Amaziah ongpa vangbong anpünga nyu.

¹⁸ Amaziah-i dükpü lemphüli Judah Ongthülei Büshah Laitap kü nyangei nyüpeih.

¹⁹ Jerusalemei Amaziah jühen shei phaüshah show, hanangkü büpa Lakhishlei paüdai, shejao jomi vepa shomei büpa halei jütük.

²⁰ Büpalei mahng koyei kü shihtü leiyei Jerusalemei chebü chepa am mü David Chingnyülei vüteke.

²¹ Hapheikü Judah ami Azariah bong anpüvok nyushi chepa Amaziah nangjeiyei ong vaihü.

²² Chepa Amaziah didaipheikü büpai Elath aetei leitü meishi lingei leitü Judah amei vaiteke.

Israel amei Ongpa Jeroboam II

²³ Joashlei cheha Amaziah-i Judah kü ong vaipü bong anpünga pabü kü Jehoashlei cheha Jeroboam Samarialei Israel amei ong vai, hatü büpai bong pinyipü hük vanglem lem.

²⁴ Büpai Shembüpa touei mang dük, hatü Israel am mang thahhüpü Nebatei cheha Jeroboamei mang kübü neyan.

²⁵ Gath Hepher leipü thibü, Amittailei cheha Jonah, büpalei chongphobü homei Shembüpa, Israel Kahvangi epü keiha büpai Israel amei kahdok Lebo-Hamath kübü Arabah Yungching thahshi aetei lei.

²⁶ Shembüpai Israel am aa hatü bümei kemei shahyaki shangpongpü eeteke, hatü jom kü sheühhen üpayao nenyu.

²⁷ Shembüpai vangsho phangkü Israel amei men thitei yaktükhen hih shei eyei nenyupü nangkü büpai Joashlei chepa Jeroboamei lak homei jom yangteke.

²⁸ Jeroboami dükpü dou lemphüli, büpai hokpü hatü mekei büpai Judah amei kahdok vaihampü Israel am kü Damaska hatü Hamath nyokei leipa, hathü peü Israel Ongthülei Büshah Laitap kü nyangei nyüpeih.

²⁹ Jeroboam di, hatü büpa ongshemei mahngchongei vü, hatü büpa kü jeiyei cheha Zekhariah ong vaiteke.