2 ONGPATHÜ 13 - DAÜLANGPÜ LAIHING (BSI)

Israel amei Jehoahaz Ongpa

¹ Judah kü Ahaziahlei cheha Joash-i ong vaipü bong hapüjempabü kü Jehoahazlei cheha Jehu-i Samarialei Israel amei ong vai, hatü büpai bong anpünyet vanglem lem.

² Büpai Shembüpa touei mehe mang, ha dük, hatü Israel am mang thahhüpü Nebatei cheha Jeroboamei mang lem kü kamei büpai hathü kübü neyan.

³ Hanangkü Shembüpai Israel am kü longi mongshihpü nangkü hepak luangi Aram am Hazael ongpa, hatü Hazaelei cheha Ben-Hadad nyilei lak kü nyokei leiyei shuoh.

⁴ Hahepak kü Jehoahaz-i Shembüpa kü phop, hatü Shembüpai Israel am kü Aram ongpai shüveipü eetü hapa phoppü kü jangteke.

⁵ Shembüpai Israel am kü jom yanghen nangkü yangbü hük shuoh, hatü Aram amei lakmong kübü yangteke. Hanangkü shongei kei-üng Israel am jomei shemei nyu.

⁶ Shejao jomi Israel am mang thahhüpü Jeroboam am shemei mang kübü neyan hatü nedoh-i hapa kü nyu, hatü Samarialei Asherah kahvangei lajeiyao lakshing tuh.

⁷ Hanangkü koyei veshan pinyipüan, koyei khari an, hatü la mü daiyei hokpü veshan haja an mü lenei Jehoahazlei veshan lebü ne-ao; mehenangkü Aram ongpai kübhih leishi shuopei mahtükkem.

⁸ Jehoahaz-i dükaokpü douthü kemei Israel Ongthülei Büshah Laitap kü nyangei nyüpeih.

⁹ Jehoahaz di, hatü Samarialei chepa amei mahngchongei vü, hatü cheha Jehoash-i büpa kü jeiyei ong vaiteke.

Israel amei Jehoash Ongpa

¹⁰ Judah kü Joash-i ong vaipü bong hapüanpünyetpabü kü Jehoahazlei cheha Jehoash-i Samarialei Israel ong vaiteke, hatü büpai bong anpüvok vanglem lem.

¹¹ Büpaiyao Shembüpa touei mang dük, hatü Israel am mang thahhüpü Nebatei cheha Jeroboamei mang lem kü kamei nedoh-i hathü kü nyu.

¹² Shaang Jehoash-i vanglem lemshingkü vampü douthü, büpai dükaokpü douthü, hatü Judah ongpa Amaziah mü hokpü kemei Israel Ongthülei Büshah Laitap kü nyangei nyüpeih.

¹³ Jehoash di, hatü Samarialei chepa amei mahngchongei vü, hatü cheha Jeroboam II büpa kü jeiyei ong vaiteke.

Elisha Didaipü

¹⁴ Shaang Elisha nemei-i tüng, hatü hapa dinshan kübü neyangaokhen mü nyushingkü Israel ongpa Jehoash-i büpa thümnüng yiüei büpa kü, “Opa! Opa! Israel amei koyei khari hatü koyei veshan” shei thep.

¹⁵ Elisha-i, “Lah hük hatü lahhan hanei yahtuh” shei e, hatü büpai hapakei yah.

¹⁶ Hahepak kü, “Hapa lah lakei notuh” shei büpai Israel ongpa kü e. Mechem büpai hapa yahjapa, Elisha-i ongpalei lak kü shoungteke.

¹⁷ Hahepak kü büpai, “Heongphi ümha shaden aptuh” shei e, hatü büpai hapa ap. “Kaptuh” shei Elisha-i e, hatü büpai hapa kaptük. Hahepak kü büpai, “Hapayü Shembüpalei aokpü lahhan, Aram am neüaokhen lahhan! Nüngi Aram am Apheklei chemjalak kü neüaokhen” shei e.

¹⁸ Hapheikü Elisha-i ongpa kü, “Lebü lahhanthü yah-ei kahdok kü bheituh” shei e. Hanangkü ongpai lahhan yah-ei kahdok kü jempa bheitü doh.

¹⁹ Hahepak kü Kahvang shennyaki büpa kü mongshih-ei, “Nüngi kahdok kü ngapa nevaijü vokpa thahshi bheihah shepü-ü; halangmeyü nüngi Aram am neütü chemjalak kü mahtükkemhen vaipeih. Shejao nüngi jom jempa mon neüaokhen” shei e.

²⁰ Elisha di, hatü mahng vütük. Shaang Moab ami bong ieyei ünyü hepak kü peiyei ching hahhamteke.

²¹ Chem hepak kü Israel ami shennyak hük mahng vüei nyushingkü ngangahük kü khong hanei chinghah peijapü eeyei jomphongi hapa mahng Elishalei mahngshalei shükshuohteke. Mechem hapa mahng Elishalei vang kü hongpa, hapa shennyak yem leiyei yaong.

²² Aram am Hazael ongpai Jehoahaz-i vanglem lempü yangkemei kü Israel am kü shüvei.

²³ Shejao Shembüpai jom kü phahjiei deih; mehenangkü büpai Abraham, Isak hatü Jakob mü vangteishuwteipü nangkü jom kü yahyang shinshang hu. Shinnyih thahshi büpai jom nemahtük nevaijü büpa toueipü nechangtük.

²⁴ Mechem Aram am Hazael ongpa didaipa, cheha Ben-Hadadi büpa kü jeiyei ong vai.

²⁵ Hapheikü Jehoahazlei cheha Jehoash-i shao vehok hepak kü chepa Jehoahaz leipü yahlangpü jilathü Hazaelei cheha Ben-Hadadei lak leipü aetei lei. Jehoash-i jempa thahshi büpa neü, hatü Israel amei jilathü nyokei lei.