2 ONGPATHÜ 12 - DAÜLANGPÜ LAIHING (BSI)

Judah amei Joash Ongpa

¹ Shaang Israel kü Jehu ongpai vanglem lempü bong nyetpabü kü Joash-i Judah kü ong vai, hatü büpai Jerusalem kü bong pinyi thahshi vanglem lem. Chenyülei menü Beer-sheba am Zibiah shiüteke.

² Joash-i büpalei yangnyu den kemei kü Shembüpa touei mehe jiü, ha mon dük; mehenangkü Jehoiada ngongpai büpa kü meishi nyuhtükteke.

³ Shejoongpa lebü kahvang kü khümpü shingthü büpai nemangtük, hatü nanglakthüi nedoh-i halei jakpü moila shuoh-ei khümhamteke.

⁴ Joash-i ngongpathü kü nyükei, “Shembüpalei shemei daülangpü moila vaishi koei peipü lop, shangkuk iepü kübü peipü lop, nyülompaja-i lahpü moila, hatü mongongpü moila lop kemei thaituh;

⁵ shuohbüthüi moilapü lop peü ngongpathüi thaiyei yowtuh, hatü hapa lopi phopshem mangdaipü leiyei lingtuh” shei e.

⁶ Shejao Joash-i vanglem lempü bong hapüjem ngoidaijao ngongpathüi phopshem mangdaipü neling.

⁷ Hanangkü Joash ongpai Jehoiada ngongpa, hatü lebü ngongpathü nyükei, “Ammi phopshem mangdaipü mehekei nelingnya? Hanangkü shaang mü leitü ammi yahpü lop ammei lakei tetuh, shejao phopshem linghen shuohtüktuh” shei e.

⁸ Ngongpathüi hajük kü nanglakthü leipü lop nethaihen, hatü jom nyingi phopshemao nelinghen shei mongteiteke.

⁹ Hapheikü Jehoiada ngongpai lop pela yah-ei shaküp kü sha lowtü phopshemei shüpü lakdah philei moidü touei haüteke. Shaden yompü ngongpai nanglakthüi phopshemei moila shuohpü lop kemei pelalei shih.

¹⁰ Mechem jomi pelalei lop longi nyupü nyinghenshang, ongpalei laknyangbü hatü ngongchong peiyei hapa lop ietü khoungthü kü shihteke.

¹¹ Mechem lop ieyei temhenshang, jomi hapa lop phopshem lingpü dousho kü veipü shennyak kü shuohhamteke, hatü jomi hapa lopi phopshem lingpü mistri, shem vepüthü,

¹² yaong dhüngpü hatü yaong bappüthü kü shuohhamteke. Jomi Shembüpalei shem linghen shingvaishi taukta shakei yaong shangei tem, hatü phopshem lingei leihen shingvaishi lebü nadang kemei lanteke.

¹³ Phopshemei moila shuohpü lopi ngini lingpü pati, chilimji, amit nevaijü awshong nevaijü honi ngini mepa dükhiüm shingvaishiyao hapa lop netük.

¹⁴ Mehenangkü hapayü phopshem lingpüthü kü mon lat shuohteke.

¹⁵ Dou kü veipüthüi longi shahhing kü veipü nangkü dou dükbüthü kü nanglat shuohhen nangkü shuohpü lop kü hengteihen meheyao nadang neshiüi nyu.

¹⁶ Pungpü moila hatü mang moila kü peipü lop Shembüpalei shemei yah-ei nelei; mehenangkü hapayü ngongpathülei hean nyuteke.

¹⁷ Hahepak kü Aram am Hazael ongpai Gath chingnyü hah, hatü omei yah. Shejao mechem büpai Jerusalemao hahhen yaongpa,

¹⁸ Judah ongpa Joash-i Judah amei ongthü Jehoshaphat, Jehoram hatü Ahaziah hathüi daüeitüktü tuhpü daülangpü douthü, hatü büpa nyingi shuohpü thinthothü mü Shembüpalei shem, hatü ongshemei nyupü hon kemei yah-ei Aram am Hazael ongpa kü shomtük. Hanangkü Hazael ongpai Jerusalem nehah-i nyokei leidai.

¹⁹ Shaang Joash ongpai dükpü dou lemphüli Judah Ongthülei Büshah Laitap kü nyangei nyüpeih.

²⁰ Büpalei lakchongbüthüi büpa khüei phaüshah showtü aongei Sillalei yiüpü lem Beth-Millolei büpa jütük.

²¹ Büpa jütükpü lakchongbüthüyü Shimeathlei cheha Jozakar hatü Shomerlei cheha Jehozabad nyu. Büpa di, hatü David Chingnyülei chepa am mü mahng vü. Büpa kü jeiyei cheha Amaziah ong vaiteke.