2 ONGPATHÜ 11 - DAÜLANGPÜ LAIHING (BSI)

Judah amei Athaliah Onglanyü

¹ Mechem Ahaziah ongpalei chenyü Athaliah-i cheha jütükpü danpa, pinnyüi ongpalei shem am peü li hümtükhen ngeükhüam shuoh.

² Shejao Joram ongpalei yiükha, Ahaziahlei chenaü Jehoshebeah-i Ahaziahlei cheha Joash, ongpalei hapeüthü mü jütükhen nyupü khong kübü joei yah-ei lüdai. Pinnyüi büpa mü büpa kü junghen nyüha hük, büpa nejütükhen shingvaishi Athaliah kü joei lüngbangei tuh.

³ Athaliah-i vanglem lempü hepak kü büpayü büpa kü jungpü nyüha mü phopshem mongei bong vok thahshi joshi nyu.

⁴ Shejao bong nyetpabü kü Jehoiada ngongpai ongpa yompü, hatü ongshem yompü veshanthü shak kü lakchongbüthü kü nyüknüng deishih-ei büpa touei Shembüpalei shemei peihüteke. Büpai jom mü vangpüshuwpü ling, hatü Shembüpalei shemei jom lahhütü büpai jom kü ongpalei cheha hushuohteke.

⁵ Büpai jom kü shahkung shuoh-ei, “Mechem ammi Sabbath nyih douei daihenshang, amphong phaihan jem khong kü phaihan hüki ongshem yomhen,

⁶ Phaihan hüki Sur peshaden yomhen, hatü phaihan hüki yombüthülei ngaümphei leipü peshadenei ongshem yomhen,

⁷ hatü am khong nyi Sabbath nyih dou kü daipüthüiyao ongpa shonei Shembüpalei shem yomhen;

⁸ laophü laophülei lakei lahhilaong notü Joash ongpa yomhen; hatü üam am yopailei heihkahenshang jütuh. Ongpa daipü leipü peü kü ammi büpa mü nyutuh” shei e.

⁹ Lakchongbüthüi Jehoiada ngongpai epükei dük, hatü jom peüi Sabbath nyih dousho kü nedai-i nyupüthü hatü dou kü daipüthü peü müei Jehoiada ngongpa touei pei.

¹⁰ Büpai lakchongbüthü kü Shembüpalei shemei tuhpü David ongpalei phungthü hatü inyüshungthü shuoh,

¹¹ hatü yombüthü peüi laophülei lakei lahhilaong notü shem kü apsha pehe shinei, moidü hatü shem shinei shing peü philei ongpa yomei yaong.

¹² Hapheikü Jehoiada-i ongpalei ha Joash müei ngai, hatü büpa kü ong athen thenhütü büpai büpa kü vangpüshuwpü lai hük shuoh-ei ong vaihen je. Jomi büpa ong vaihen je, hatü, “Ongpa, yangnyu shoshoshi nyutuh!” shei lak apei len.

¹³ Mechem Athaliah onglanyüi yombüthü hatü lakchongbüthülei ngeü danpa, pinnyüi Shembüpalei phopshemei nanglakthü touei heih.

¹⁴ Pinnyüi veishuohjü jomei büyem kü nyupükei ongpa hük shemnyü touei yaongshi ee. Lakchongbüthü hatü amit vüngpüthü peü ongpa touei, hatü nanglakthü peü mongongpai amit vüng. Hahepak kü Athaliah-i pinnyülei ashak shaaktü, “Ngei pungteke! Ngei pungteke!” shei lenei e.

¹⁵ Jehoiada-i Athaliah phopshem chingshelei nejühüpü nangkü büpai veshan lakchongbüthü kü, “Veshan laap nyi aa kü pinnyü müei deilangtuh; pinnyü yanghen peiküpüthüao jütüktuh” shei e. Mehenangkü ngongpai, “Pinnyü Shembüpalei shemei tejü” shei e.

¹⁶ Jomi pinnyü yepei ongshemei müei leiyei Koyei Shadenei pinnyü jütük.

¹⁷ Hahepak kü Jehoiada-i Shembüpa hi ongpa hatü nanglakthü aa kü jomphongü Shembüpalei nanglakthü shei vangpüshuwpü ling. Shao büpai ongpa hi nanglakthü aa kao vangpüshuwpü ling.

¹⁸ Hapheikü nanglakthü peü kemei Baal kahvangei phopshemei heih-ei haleipü moidüthü, hatü lajeithü peü khih mü mangtük, hatü moidü tüngei Baal kahvangei ngongpa Mattanao jomi jütük. Ngongpai Shembüpalei shem kü yombüthüi yomei tuhphong.

¹⁹ Hahepak kü büpa mü ongpa hatü ongshem yompü veshanthüi ongpa kü shonei yahtü Phopshem kübü ongshem thahshi, hapheikü nanglakthü peü mütü yiüteke. Joash-i veshanthülei peshaden lemei shütü ong uoshing kü uohü.

²⁰ Hapakei nanglakthü peü mongong, hatü ongshemei Athaliah jüpü nangkü chingnyüyü vüngmaki nyuteke.

²¹ Joash nyübüh vangbong nyet nyushi Judah kü ong vaiteke.