2 KORINT 9 - DAÜLANGPÜ LAIHING (BSI)

Jempü Khristanthü Shing Moila

¹ Shaang vaipüthü kü dou dükhen nang ngei am kü nyanghen napü neshiü;

² mehenangkü am kü sheühhüpü mong nyüke shei ngei nyingnyüke, hatü ngei Macedonia am touei changmeipeyü am nangkü hih. Akhaia leipü jeihinaüthüi müvang mebü sheühhen temei nyüke shei ngei ephei. Am nyakpükenpai jom longi mongshin phukteke.

³ Shejao ngei am nangkü changmeipeyü angsha khih shei nehuhühen shingvaishi ngei jeihinaüthü shomphünyeih; shejüang ngei am kü epükei am temei nyuhen.

⁴ Hei nevaijema Macedonia am hanei ngei mü peijü am netemi nyujema, am jung ne-e-i hami hajük hapa dousho nangkü monglemtükpeyü veüpong vaihen khih.

⁵ Hanangkü ngei jeihinaüthü kü ngei shekü yeihshi mebü am thümhen, hatü ammi lahpü thintho temei nyuhen ehen vaipü khih shei ngei deihpeih; shejüang hapayü kangeishungei nevai, ammi shuohhüei shuohpü khih shei huhen.

⁶ Ha deihtuh: Üpai kaungshi hainya, kaungshi vethen, hatü üpai bhashahshi hainya bhashahshi vethen.

⁷ Am peüi laophülei mongi aokpükei shuohtuh; nemongyaki nevai, nevaijü kangeishungei nevai; mehenangkü Kahvangi mongongshi shuohpü am kü bamnyüpeih.

⁸ Düngei lemphü changshi nyupai ammi doumei peü kü bhashahshi hanteiaokhen shingvaishi Kahvangi am kü lemphü moihiman bhashahshi shuohhen aokshi nyüpeih.

⁹ Ha nyangei nyüke: “Büpai taopathü kü bhashahshi shuohnyeih; büpa bampü den kü nyunyeih.”

¹⁰ Üpai sheili haipü am kü sheilivang changshi shuoh, hatü hahhen hahying shuoh, büpai haihen ammei sheilivang dahühen, hatü ammei daülangshemshepü vethen dahühen.

¹¹ Ammi nekaungi longi shuohpü nangkü lem peü kü am shemmei leihen; hapai ham homei Kahvang kü menvih shuohhen vamhühen.

¹² Ammi dükpü hapa dousho-ü Kahvangei nanglakthüi napü kü shuohpü mon nevai, shejao Kahvang kü menvih longi shuohpü kao aüh-ei yenhünyüke.

¹³ Ammi dükpü hapa dousho homei Khristalei shahjangmei kü lah-ei ammi ven danpü hatü ammi jom mü hatü mih peü mü nekaungi hanteipü homei ammi Kahvang müknyinshekhangnyüke.

¹⁴ Peü mü nyeipü Kahvang phahji büpai am kü shuohpü nangkü jomi am ongyangnyüke, hatü jomi am shing phopnyüke.

¹⁵ Nih-ei neaokpü büpalei thintho shingvaishi Kahvang kü menvih shuohtuh.