2 KORINT 6 - DAÜLANGPÜ LAIHING (BSI)

¹ Jen chemi büpa mü dou dükshingkü Kahvang phahji angkong kü neyahhen hami am kü enyeih.

² Büpai hei enyüke: “Yahhüpü hepak kü ngei am kü bangtepih, hatü yemleipü nyih kü ngei am kü sheühtepih.” Veituh, shaangü yahhahhüpü hepak; veituh, shaangü yemleihen nyih.

³ Hamei chongphopü dousho kü meheyao pungpü nedanghühen shingvaishi hami üpalei lem kao huluh yaong netuhnyih,

⁴ shejao lem peü kü ham nyingi Kahvang chongphobüthü shei shangpong kü, ponghahpü kü, vongshüh kü,

⁵ üphahpü kü, khoklatei, mophicheü kü, nyiuhinang kü, neshinechongpü kü, aeipü kü;

⁶ daülangpai, danaokpai, inyainyempai, shinshangpai, laangha kü daülangpai, hingshangi bampai,

⁷ shahhing epai hatü Kahvangei ngani laknyong lakdah kü daülangshemshepü phunglang mü;

⁸ dhüm kohpü hatü nekohpü, menten hatü menmei kü munenei hutepeih. Hamphong keyü shahshem epü am kü kei nopeih, shejao hami shahhing epeih;

⁹ peüi nyingei tuhtü nenyingteipü am kü kei nopeih; ham didainyu kei shejao veituh, ham yemmü nyüpeih; hanghi yahphüjao nejütük;

¹⁰ mongmangnyu kei shejao düngei mongong kü, taopathü kei, shejao longi shemmei kei, meheyao ne-angnyu kei shejao lemphü angpükei nyunyeih.

¹¹ Hami am Korint am kü ngaiheyei etepih; hamei mongü am kü bhashahshi aptüktü nyüpeih.

¹² Hami am kü bampü nedohangpih, shejao ammi ham kü bampü dohdaiteke.

¹³ Ngei hashihthü kü kei am kü enyeih– ammei mongdang bhashahshi aptuh.

Vanyangyem Kahvangei Phopshem

¹⁴ Ammi nevaipüthü mü pang hük kü tepaai. Mehenangkü daülangpü hatü mang nyi melei jempa? Nevaijü vangngai-i vangnyak mü melei jempa?

¹⁵ Khrista hatü Belial nyi melei shepshaihen? Nevaijü vaipü ami nevaipü am mü mehe hean nyüpa?

¹⁶ Kahvang phopshem mü lajei melei shepshaihen? Mehenangkü jenphongü vanyangyem Kahvangei phopshem; Kahvangi ha eteke: “Ngei jom kü nyuhen hatü jom mü kamhen; ngei jomei Kahvang vaihen, hatü jomphongü ngelei nanglak vaihen.

¹⁷ Hanangkü jom kübü vamdaituh, hatü jom toueipü khaatei nyutuh shei Shembüpai enyüke. hatü nedaüpü mepa kao tehong; shejema ngei am mongongshi yahhen,

¹⁸ hatü ngei ammei Pa vaihen, hatü amphongü ngelei hapeüthü vaihen shei Jeiyong Shembüpai enyüke.”