2 KORINT 5 - DAÜLANGPÜ LAIHING (BSI)

¹ Jen nyupü kahdoknyü leipü ashakshem tendaijema, laki nevepü Kahvang leipü shem hük vangsholei den kü nyüpeih shei jeni nyingei nyüke.

² Vangsho leipü jenei nyushing jen kü owphahen ongyangei shaangpü hapa ashakshemei jen mongshangei thepnyüpeih;

³ mehenangkü mechem jeni ha owhen jen bümkong nenyuhen.

⁴ Jeni hapa ashakshem kü nyuyaki jeni thepnyüpeih, hatü hanggovih chettü nyunyeih; mehenangkü jeni ne-owi nenyuhünyu; shejao jenei vangsho leipü nyushing owtü nyuhünyüke, shejüang mehe dibenüng nyu, hayü yangnyuyemi lühtükhen.

⁵ Shaang hapa mükhong shingvaishi jen temhüpeyü Kahvang, hatü mehe peikahen nyu, hapa vangpü vaishi jen kü Laangha shuohteke.

⁶ Hanangkü ham düngei monglempü nyüpeih. Jeni hapa büm shem kü nyupü thahshi Shembüpalei shem kübü daiyei nyüke.

⁷ Jeni müki eepai nevai, hinglempai kamnyüpeih.

⁸ Hih, ham monglempü nyüpeih, hatü hapa büm kübü yanei daiyei Shembüpa mü shemei nyuhenang lümei deihnyüke.

⁹ Hanangkü hami hapa büm shem kü nyujao nevaijü yanei daijao büpa mong hahhühenü hamei mükhong.

¹⁰ Mehenangkü jen peü Khristalei shahphenpü uoshing touei yaonghen, hatü halei shennyak peü mei vaijao ten vaijao hapa kahdoknyü büm kü mehe dük, ha shing lat danghen.

Khrista Homei Mongjempü

¹¹ Hanangkü Shembüpa kü nyemhenü mehe ha hami nyingei mih yawhhen khenyeih. Ham meheshang ha Kahvangi nyingdai, hatü ammei mongeiyao ham nyingei shiühen shei ngei monglemnyeih.

¹² Hami am touei ham nang vihhah-ei ne-enyih, shejao ham nangkü am changmeiyei deihhen hepak mei shuohnyeih; shejüang ammi mongdangei nyupü kü nevei-i shakdokei eepü kü changmeipüthü kü shahnyok shuoh-aokhen.

¹³ Hamphong sholi neshiüpü am kei nyujema, hapayü Kahvangei men kü nyüke, shejao ham kü jiüpü sholi kohshi eejema, hapayü am shingvaishi nyüke.

¹⁴ Khrista bampai jen kü vanglem lemnyüke; mehenangkü peü shing shennyak hük di shei hami nyingteke; hanangkü peü diteke.

¹⁵ Üam yemmü nyu, hajük kü laophü shing nenyuhen, shejao üpa di hatü jom peü shing yangei lei, büpa nangkü nyuhen shingvaishi büpa peü shing diteke.

¹⁶ Hanangkü, shaang mü leitü hami üpa kao kahdoknyü phai aimü neveinyih; chem hami Khristayü phai aimü nyingjao hajük kü hapa aimü nenyingnyih.

¹⁷ Hanangkü hanei ami Khrista kü nyujema, büpayü ja bühpü; chang lemphü peihdaiteke, veituh, lemphü ja leiteke!

¹⁸ Ha kemei Kahvang leipü; büpai laophü touei Khrista homei jen mongjemei leihü, hatü jen kü mongjemhühen dousho shuohteke;

¹⁹ hapa lappai, Khrista kü Kahvangi laophü touei kahdoknyü mongjemei leihüteke. Kahvangi hangkulei mangthü itei netuh, hatü büpai ham kü mongjemei leihühen shahjangmei nangei tuh.

²⁰ Hanangkü hamphongü Khrista shing lembüthü; mehenangkü Kahvangi hamphong homei nanglakthü kü nyükhen phepü nangkü Khristalei men kü hami khümnyeih, Kahvang mü mongjemei leituh.

²¹ Mehenangkü büpa kü jen Kahvang daülangshemshepü leihen shingvaishi jenei men kü büpai mang nenyingpü hük mang leihüteke.