2 KORINT 4 - DAÜLANGPÜ LAIHING (BSI)

Haümdük Mongei Mop

¹ Hanangkü hami Kahvang phahji homei hapa dousho dükpü nangkü hami mong nelainyih.

² Hami veübenüng douthü hatü jopü douthü yaktüktih; hami ühingnakai nedüknyih, nevaijü Kahvangei shah shahshem neleihünyih; shejao shahhing ngaiheyei epai ham nyingi peülei mongdeih kü Kahvang touei menvih shuohnyeih.

³ Hamei shahjangmei joei nyujema, hapayü mahdaipüthü touei joei nyüke.

⁴ Jom nang keyü Kahvangei lajei, Khristalei müknyinshekhang shahjangmei vangngai jomi ne-eehühen shingvaishi hapa kahdoknyü kübü kahvangthüi nevaipüthülei mongdang mük phüngtükteke.

⁵ Mehenangkü hami laophü jung nebaongnyih; hami Jisu Khristayü Shembüpa, hatü hamü Jisulei men kü ammei aathü shei baongnyeih.

⁶ Mehenangkü Kahvangi, “Vangnyak kü vangngai khanghütuh” shei e, hatü Jisu Khristalei dhe kü Kahvang müknyinshekhang nyingpü vangngai jen kü shuohhen shingvaishi büpai jenei mongdang kü vangngai khangpeih.

⁷ Shejao jenei hapa haümdük kü hapa mop nyüpeih, shejüang peü mü nyeipü nganü jen leipü vampü nevai, shejao Kahvangei shei lekhünyüke.

⁸ Ham peü lemei shangpongpeih, shejao nengümtük, üathama kü nyu, shejao lahan mong mahdaitü nenyu,

⁹ shüveipü ponghah, shejao neyakphong; nemei-i üphah, shejao nejütük;

¹⁰ hamei büm kü Jisulei yangnyu lekei eehühen shingvaishi düngei hamei büm kü Jisu dipü koshi nyunyeih.

¹¹ Mechem ham yemmü nyunya, hamei hangku phai kü Jisulei yangnyu eehühen shingvaishi hami düngei Jisulei men kü dihen kü lanei shuohtüknyeih.

¹² Hanangkü ham kü dipai dou düknyüke, shejao am kü yangnyuyemi dou düknyüke.

¹³ “Ngei hinglem, hanangkü ngei epeih” shei laihingei nyangei nyupükei hapa aihük laangha ham kao nyupü nangkü hamao hinglemnyeih hatü hami enyüpeih.

¹⁴ mehenangkü Jisu Khrista dipü kübü yangei leishihpübai hamphongao Jisu mü yangei leishihhen, hatü büpa nyushingei hamao amphong mü müei daihen.

¹⁵ Hih, lemphüli am nanglei danghen shingvaishi nyüke, shejüang hapa phahji nanglak nyeipüba nyeipüba touei yanei daishingkü Kahvang müknyinshekhang shing menvih nyeinya dahen.

Hinglempai Nyupü

¹⁶ Hanangkü hami mong nelainyih. Hamei shakdok büm viüei wong nekohjao hamei mongpa laanghayü nyihjeih ja leinyüpeih.

¹⁷ Mehenangkü hapa maanpü hatü kansho hük shangpongpü homei ham shing shetei neaokpü nedohnetenpü müknyinshekhang temnyanyüke;

¹⁸ mehenangkü mehe eehen aok, ha kü hami neveinyih, shejao mehe ne-eeaok ha kü veinyeih; mehenangkü mehe eeaoknya, hayü kanja shing, shejao mepa ne-eeaok, hayü den shing nyüke.