2 KORINT 11 - DAÜLANGPÜ LAIHING (BSI)

Paul hatü Shahshem Phongshanthü

¹ Ngei maani nelipü kü am nenteiaokei chongkütuh; shejao ammi hapayü dükei heiteke.

² Kahvangi keiha ngeiyao am kü mükhüh-ei deihnyüke. Mehenangkü ngei amphongü baha hük, Khrista mü daülangpü pai mü ngühpü nela hük keiha shem yemhühen lahtüktih.

³ Shejao biüei glüp homei Ev luhahpükei Khrista kü ammi mong kemei hatü daülangpai lanei shuohpü kübü lemnyongei mülanghen khih shei ngei yingei deihnyüke.

⁴ Mehenangkü hanei ami am touei peiyei hami chongvenpü Jisu jung mü lenei lebü jisu jung chongvenphüjü, nevaijü ammi yahpü laangha mü lenei lebü laangha jung nyuhphüjü, nevaijü ammi yahpü shahjangmei mü lenei lebü shahjangmei chongvenphüjü ammi hapayü temtüktü nyupükei yahnyüke.

⁵ Ngeiyü hathü longpü phongshanthü mü phangpa kübü maanpü phongshan nevai shei ngei deihnyüke.

⁶ Epü kü ngei meishi netemnelempü vaihen aok, shejao nyingpühingpü phikü nevai; hingmei lem peü kü hatü dou peü kü hami am kü ha lekei hutepih.

⁷ Am longhühen nangkü ngei maanpü leitü am kü lat neyah-i Kahvang shahjangmei angkü chongvenpai ngei mang thahpü je?

⁸ Am kü sheühhen tata kü ngei lebü attoithü leipü sheühpü yahpai ngei jom leipü gühpü kei leiteke.

⁹ Mechem ngei am mü nyupa, ngei napü hepak kü amphong üpa kao hanggovih neshuoh; mehenangkü ngei napü peü Macedonia leipü peipü jeihinaüthüi shuohpeih. Hanangkü mehe lem vaihen vaijao ngei am kü hanggovih neshuoh hatü shao-üng neshuohhen.

¹⁰ Khrista shahhing ngei kü nyupü nangkü ngei changmeipü hapayü Akhaia moidoi leiyao nedohhühen.

¹¹ Mehekei? Ngei am kü nebamnyu hiang? Ngei bampü Kahvangi nyingnyüke.

¹² Lebü phongshanthüi changmeihen hatü hami dükpü dou hükkeipü jomiyao düknyeih shei ngam yahhen kübü bangtükhen shingvaishi ngei shaang mehe dou düknya, ha nedoh-i dükei daihen.

¹³ Mehenangkü hakei changmeipüthüyü shahshem phongshanthü, lueilemei dükpüthü; jom nyingi Khristalei phongshanthü shei yeiyaei hunyüke.

¹⁴ Tethama! Kahshih-i dangkao vangngailei phongshan shei laophü nyingi yeiyaei hunyeih.

¹⁵ Hanangkü büpalei chongphobüthüi daülangshemshepülei chongphopüthü shei yeiyaei hupü kü thamahen neshiü. Dohpülei jomei douthüi shangpükei jomi danghen.

Pauli Phongshan Hük Keiha Shangpongpü

¹⁶ Shao ngei enyeih: üpaiyao ngeiyü ngapa khih shei tedeih; hapakei deihjema ngeiyü ngapa hük kei yahtuh, shejüang ngeiyao maani payü changmeihen.

¹⁷ Mehe ngei nyingi monglemei changmeiyei enya, hapayü Shembüpalei wongi ngei ha enyu nevaipih, shejao ngapa hük keiha enyeih.

¹⁸ Longshi shingi hangku phai kü changmeipü nangkü ngeiyao changmeihen.

¹⁹ Laophü nyingi kon kohpeih shei etü ngapathü mü am nyunyüke.

²⁰ Hanei ami am aa leihüjü nevaijü am lomohhüjü, nevaijü am nangkü jom vangmeijü nevaijü am tai kü manlangjü nevaijü ammei dhe kü apjü ammi hathü kü meheyao neenyu.

²¹ Hami ha dükhenü longi wong nekoh shei ngei veüyaki enyeih. Shejao hanei ami lemhük kü changmeihen mü nyujema, ngei ngapa hük keiha enyeih– ngeiyao ha kü changmeihen nyüpeih.

²² Jom mon Hebrew am je? Ngeiyao hih. Jom mon Israel am je? Ngeiyao hih. Jom mon Abrahamei hühihathü je? Ngeiyao hih.

²³ Jom mon Khrista chongphobüthü je? Ngei ngapa hük keiha enyeih– ngeiang meipüba hih. Ngei longi kheyei dou düktih, hepak longi kü khoklatei küptih, dihen mü longi üphahtih.

²⁴ Shan nga kü Jehoda ami hapüanpüshü thahshi bheiphopeih.

²⁵ Jempa thahshi ngei kü nyiamlüngi hatpeih. Chem yaongi shükphopeih. Jempa thahshi yungchingei jahas mangei ponghahpeih; nyih hük ya hük ngei yungchingei bhongei nyupeih;

²⁶ yendai longi kü yungchingei gühpathü homei, ngelei nanglakthü homei, Kung am homei, chingnyülei, phaülei, yungchingei, shahshem jeihinaü nyahinaüthü homei vongshüh kü nyupeih;

²⁷ Dou dükpü hatü ponghahpü, neshinechongpü longi, aeipülepü, düngei hahying neshiüi, wohongei bümkong nyupeih.

²⁸ Lebü douthü mü lenei, attoithü deihpai ngei nyihjeih hanggovih chettü nyunyeih.

²⁹ Mechem hanei am wong nekoh-i leihen, ngeiyao wong nekoh-i leinyüke; mechem hanei am huluh shuohhen, ngei ha kü mongmangi manyüke.

³⁰ Ngei changmeijema, ngei wong nekohpü douthü hupü kü ngei changmeihen.

³¹ Kahvang hatü Shembüpa Jisulei Pa-i (büpa den kü moihimantuh) ngei shahshem ne-epü nyingei nyüpeih.

³² Aretas Ongpa phang kübü Damaska leipü governor-i ngei yephen Damaska chingnyü penyüshathü yomlangteke,

³³ shejao ngei mühdow kü shihtü chingpe bhamvo homei kahdokei shanshih-ei ngei büpalei lak kübü yangpeih.