2 KORINT 10 - DAÜLANGPÜ LAIHING (BSI)

Pauli Phongshan Vaipü Wong

¹ Khrista nenteiaokpü hatü inpünyaipü homei ngei, Pauli am kü khümei enyeih– ngei am mü dhe dhe gongei thaijü veüpükei nyunyeih, shejao mechem yanei daihen am touei monglongshi nyunyeih.

² Mechem ngei am touei peihenshang hangku phai aimü ham nyunyu khih shei deihpüthü touei ham nyuhen jiüpü lem aimü monglongshi nenyuküpih shei ngei am kü pheyei enyeih.

³ Hingmei, hamphongü hangku kei nyunyeih, shejao hangku phai aimü hami vehok nehoknyih.

⁴ Mehenangkü hamei vehok phunglangü kahdoknyü hangkulei phunglang nevai, shejao vepalei dung mangaokhen Kahvangei ngan nyüpeih.

⁵ Hami Kahvangei kihikon khüei shah dakteipü hatü changmeipai lem bangtükpü bentüknyeih, hatü hami deihpü lemphü Khristalei ven danhen nangkü yepei tuhlangnyeih.

⁶ Mechem am ven danpü changeishahen, hami ven nedanpü peü hanghihühen temei nyüpeih.

⁷ Amphongü shakdok leipü dou kü mon veinyüke. Amphong hanei ami hamphongü Khristalei shei monglemei nyujema, amphong Khristalei vaipükei hamphongao Khristalei shei deih-ei dangtuh.

⁸ Am bentükhen nangkü nevai, shejao am linghen nangkü Shembüpai shuohpü hamei wong kü ngei maani nyeishi changmeiyei nyujoong ngei hapa kü veüei nedeihpih.

⁹ Ngelei lai homei ngei am kü nyemshaonyu kei nyemtedeih shei ngei deihnyüke.

¹⁰ Mehenangkü hanei ami, “Büpalei laiyü mangshi hatü wong kohshi khih, shejao büpa jen mü nyujü wong nekohnyu, hatü büpalei shah-ü yahlak neshiü” shei enyüke.

¹¹ Ham nenyupü hepak kü lai homei hami mehe enya, hayü nyupü hepak kü ha dükhen shei hapa keipü shennyakthüi nyingtuh.

¹² Longi shaoshi deihpüthü mü ham nyingi khong khong kungei nelingnyih, nevaijü neshetteinyih. Shejao jom hüki hük mü shetteipai hatü hüki hük mü phenteipai jomi chudeih meipü nehunyu.

¹³ Shejao hami jiüpü lem mü lenei nechangmeihen, shejao Kahvangi ham kü shuohpü kahsho mong kü mon am ngoishi dükhen.

¹⁴ Mechem ham am touei peipa, hami lakham nyeiyei nejaiangpih; Khristalei shahjangmei koei am thahshi peipeyü hamphong shongpü nyuhampeih.

¹⁵ Mih-i düktükpü dou kü hami jiüpü mü lenei nechangmeinyih; shejao hami monglempeyü am vaipü kü dashingkü am touei hami dou dükpü nyeinya longhen,

¹⁶ shejüang ammei kahdok peih-ei daiyei hami shahjang meipü chongvenaokhen, hatü lebü hanei ami düktükpü dou nangkü ham changmeiyei nedeihnyih.

¹⁷ Shejao, “Üpai changmeinya, büpai Shembüpa kü changmeituh.”

¹⁸ Laophü nyingi meipeih shei deihhahpü hapai nevai, shejao Shembüpai meiangpeih shei deihpü shennyak yahnyüpeih.