2 KORINT 1 - DAÜLANGPÜ LAIHING (BSI)

Selam Shah

¹ Paul, Kahvangi mongpü homei Khrista Jisulei phongshan, hatü jenei jeihinaü Timoti nyi-i, Akhaia kü nyupü daülangpüthü peü omshi Korint kü nyupü Kahvangei attoi touei,

² Jenei Pa Kahvang hatü Shembüpa Jisu Khrista leipü phahji hatü chingmei nyute.

Pauli Kahvang Men Vihpü

³ Kahvang hatü jenei Shembüpa Jisu Khristalei Pa, phahjilei Pa hatü nyiushemmei peülei Pa moihimantuh.

⁴ Jeni Kahvang leipü dangpü nyiushemmei yah-ei shangpongei nyupüthü nyiushem meihühen shingvaishi büpai jen shangpong kü nyiushem meihünyeih.

⁵ Mehenangkü Khrista shangpongpü jen shingvaishi changshi nyupü keiha, Khrista homei jenei nyiushemmei changshi nyüpeih.

⁶ Ham shangpongjema hapayü am nyiushem meihen hatü yemleihen shingvaishi; ham nyiushem meijema, hayü am nyiushem meihen shingvaishi, hatü hamiyao shangpongpü hapa aihük shangpong ammi munenpü nyingei nyüke.

⁷ Am shingvaishi hamei monglem nejenlennyih; mehenangkü ammi hamei shangpong kü hanteipükei ammi hamei nyiumeiyao hanteihen shei nyingnyüke.

⁸ Jeihinaü hatü nyahinaüthü, hami Asialei ponghahpü shangpong ammi nyemnying shei deihnyüke; yangnyu nyuhen mong mahshi hami neko-aokhen mü hanggovih kophopeih.

⁹ Hamü dishasha khih shei mongei deihpeih; hapayü hami laophü kü mong nenyanghen shejao dipü kübü yangei leishihpü Kahvang kü monglemhen nangkü vampeih.

¹⁰ Dihen vongshüh kübü yangphopü büpai nedoh-i ham yangphahen; shao büpai ham yangphahen shei hami büpa kü monglemnyeih.

¹¹ Ammi ham mü phoppü kü omei sheühpü keiha longi phoppü homei ham kü shuohpü moihiman shingvaishi hamei men kü longshi shing menvih shuohhen.

Paulei Küpjan Yeiyapü

¹² Shaang ham changmeipü hatü hamei mongdeih denpeyü hapa hih: Hami hapa kahdoknyülei anyei vaishi am mü shahngai eshi, shüeinyiükei kahdoknyü kihikoni nevai, shejao Kahvang phahji homei nyupeih shei hamei mongi denpü shuohnyüke.

¹³ Ammi mehe iehen aok hatü nyingaok, ha mü lenei meheyao hami am kü nenyang; dohpü ngoishi ammi ha nyingaokhen shei monglemnyeih.

¹⁴ Ammi ham nang maani mon nyingnyüke; ammi ham nangkü changmeipü keiha Shembüpa Jisulei nyih kü hami am nangkü changmeihen.

¹⁵ Ha ngei lekpü nangkü ammi moihiman shing nyi danghen shingvaishi shongei ngei am thümhüei deihpeih.

¹⁶ Ngei Macedonialei heihpü lem kü ngei am thümhüei deihpeih, hatü ammi ngei Judealei shomhen nangkü Macedonia leipü am touei leihen deihpeih.

¹⁷ Ngei ha küpjan lingpeyü meishi nedeih-i lingpeih shei deihpü je? Ngei ngelei küpjanü kahdoknyü hangku yemya kü hepak hük kü-üng, “Hih, hih” hatü “Nevai, nevai” shei ehen temtü lingnyu hiang?

¹⁸ Shejao Kahvangü shahhing vaipü nangkü am touei hamei shah-ü, “Hih hatü nevai” shei ne-e.

¹⁹ Mehenangkü Kahvang Ha, Jisu Khrista, üpa jung Silvanus hatü Timoti hamphongi am kü baongnya, hayü, “Hih hatü nevai” shei nevai, shejao büpa kü hapayü düngei, “Hih” shei nyüpeih.

²⁰ Mehenangkü büpa kü Kahvangi lahpeyü, “Hih” shei nyüpeih. Ha tata kü büpa homei Kahvang müknyinshekhangei “Amen” shei hami enyeih.

²¹ Shejao Khrista kü am mü ham chongwonghüpü hatü ham thiteiphuei jepeyü Kahvang;

²² büpai ham kü füoshang shüngei hatü vangpü hük vaishi hamei mongkü büpalei laangha shuohpeih.

²³ Shejao am yanghen nangkü ngei nyipabü Korintlei nepeipeih shei ngei Kahvangü ngelei denbü vaishi nyüknyeih.

²⁴ Hapayü hami am hinglempü shak kü shembü vaihen nangkü nevai, shejao am vaipü kü wongshongi yaongpü nangkü am mongonghen shingvaishi hamü am mü chemi dou dükbüthü hih.